ඇමරිකා එක්සත් ජනපදයේ ටෙක්සාස් ප්රාන්තයේ, නත්තල් දිනට පෙර දින රාත්රියේ ස්වයංක්රීය ටෙලර් යන්ත්රයක් (ATM) සොරා ගැනීමට දරන ලද ප්රයත්නයක් අසාර්ථක වී ඇත. සොරුන් විසින් සොරකම් කරන ලද SUV රථයක් සහ ලෝහ කේබලයක් භාවිත කරමින් මෙම ATM යන්ත්රය වෙළෙඳසැලෙන් පිටතට ඇදගෙන යාමට උත්සාහ දරා ඇති බව පොලිසිය ප්රකාශ කරයි.
ෆෝට් වර්ත් ප්රදේශයේ පිහිටි 7-Eleven වෙළෙඳසැලක මෙම සිදුවීම වාර්තා වන අතර, සැකකරුවන් දෙදෙනෙකු වෙළෙඳසැලේ ඉදිරිපස වීදුරු දොරවල් කඩා ATM යන්ත්රය පිටතට ඇදගෙන යන ආකාරය දැක්වෙන දර්ශන වයිට් සෙට්ල්මන්ට් පොලිසිය විසින් ප්රසිද්ධියට පත් කර ඇත. බදාදා අලුයම 4ට පමණ සිදුවී ඇති මෙම සිද්ධිය, මෑත සතිවල උතුරු ටෙක්සාස් පුරා වාර්තා වූ සමාන ආකාරයේ අපරාධ රැල්ලකට සම්බන්ධ විය හැකි බවට විමර්ශකයෝ සැක පළ කරති.
මෙම කොල්ලය සඳහා තද පැහැති ඇඳුම් වලින් සැරසී මුහුණු ආවරණය කරගෙන පැමිණි පුද්ගලයන් දෙදෙනෙකු සම්බන්ධ වී ඇති බව පොලිසිය පවසයි. ඉන් එක් අයෙකු ලෝහමය ආයුධයකින් වෙළෙඳසැලේ දොරවල් කඩා, වාහනයට සම්බන්ධ කර තිබූ කේබලයක් ATM යන්ත්රයේ ගැටගසා ඇත. මෙම ක්රියාව හේතුවෙන් වෙළෙඳසැලට දැඩි අලාභහානි සිදු වී ඇති අතර, වීදුරු කැබලි සහ වෙළෙඳ භාණ්ඩ වෙළෙඳසැල තුළත් රථගාල පුරාත් විසිරී තිබූ බව නිලධාරීන් විසින් නිරීක්ෂණය කරන ලදී.
සැකකරුවන් දෙවරක් උත්සාහ කිරීමෙන් අනතුරුව ATM යන්ත්රය වෙළෙඳසැලෙන් පිටතට ඇද ගැනීමට සමත් වුවද, ඔවුන් පලා යන අතරතුර එම යන්ත්රය වාහනයෙන් ගැලවී මඟ වැටී තිබේ. පසුව පොලිසිය විසින් එම ATM යන්ත්රය සොයා ගන්නා ලදී. අපරාධය සඳහා භාවිතා කළ කළු පැහැති SUV රථය ඩලස් නගරයෙන් සොරකම් කරන ලද්දක් බව විමර්ශනවලදී හෙළි වී ඇති අතර, නගරයේ සවි කර ඇති කැමරා පද්ධති සහ බලපත්ර තහඩු කියවනයන් (license plate readers) ආධාරයෙන් වෙළෙඳසැලට ආසන්නව, සැතපුම් භාගයක් පමණ දුරින් තිබී එම වාහනය සොයා ගැනීමට පොලිසියට හැකි වී තිබේ.
සිදුවීමට අදාළ වීඩියෝව මෙතැනින් click here
