මැලේසියාවේ හිටපු අග්රාමාත්ය නජිබ් රසාක් හට එරෙහිව දීර්ඝ කාලයක් තිස්සේ විභාග වූ 1Malaysia Development Berhad (1MDB) නඩුවේ තීන්දුව ප්රකාශයට පත් කරමින්, බලය අවභාවිතය සහ මුදල් විශුද්ධිකරණය සම්බන්ධයෙන් ඔහු වරදකරු බව එරට මහාධිකරණය පසුගිය සිකුරාදා (දෙසැම්බර් 26) තීරණය කරන ලදී. 2009 සිට 2018 දක්වා අග්රාමාත්ය ධුරය හෙබවූ නජිබ් රසාක්, රජය සතු ආයෝජන අරමුදලක් වන 1MDB වෙතින් රින්ගිට් බිලියන 2.2ක් (ඇමරිකානු ඩොලර් මිලියන 544.6ක්) අයථා ලෙස පරිහරණය කිරීම සම්බන්ධයෙන් බලය අවභාවිත කිරීමේ චෝදනා හතරකට සහ මුදල් විශුද්ධිකරණය කිරීමේ චෝදනා විසි එකකට වරදකරු බවට අධිකරණය විසින් තහවුරු කර තිබේ.
මෙම නඩුව විභාග කළ විනිසුරු කොලින් ලෝරන්ස් සෙක්වේරා විසින් නජිබ් රසාක්ට එරෙහිව ගොනු කර තිබූ චෝදනා 25ටම ඔහු වරදකරු බව නිවේදනය කළ අතර, බලය අවභාවිත කිරීමේ චෝදනා වෙනුවෙන් එක් චෝදනාවකට වසර 15 බැගින් ද, මුදල් විශුද්ධිකරණ චෝදනා වෙනුවෙන් එක් චෝදනාවකට වසර 5 බැගින් ද සිර දඬුවම් නියම කරන ලදී. මීට අමතරව, බලය අවභාවිත කිරීමේ චෝදනා වෙනුවෙන් රින්ගිට් බිලියන 11.38ක (ඇමරිකානු ඩොලර් බිලියන 2.8ක) දැවැන්ත දඩ මුදලක් ද නියම කෙරුණු අතර, එම දඩය නොගෙවන්නේ නම් එක් චෝදනාවකට වසර 10 බැගින් අමතර සිර දඬුවම් විඳීමට සිදුවනු ඇති බව විනිසුරුවරයා ප්රකාශ කළේය. මුදල් විශුද්ධිකරණ චෝදනා 21 සඳහා සොයා ගත නොහැකි වූ හෝ වියදම් කර ඇති අයථා මුදල්වල වටිනාකමට සමාන රින්ගිට් බිලියන 2.1ක දඩ මුදලක් ද පනවා ඇති අතර, නියම කරන ලද මෙම සිර දඬුවම් සියල්ල සමගාමීව ක්රියාත්මක වන බවත්, ඒවා ඔහු දැනට විඳින සිර දඬුවම අවසන් වූ පසු ආරම්භ වනු ඇති බවත් අධිකරණය නියෝග කළේය.
පැය 12කට ආසන්න කාලයක් පැවති මෙම නඩු විභාගයේදී විනිසුරුවරයා සිය තීන්දුව ප්රකාශ කිරීම සඳහා පැය පහකට ආසන්න කාලයක් ගත කළ අතර, 2011 සහ 2014 අතර කාලයේදී මෙම අපරාධ සිදුවී ඇති බව සඳහන් කළේය. තමන්ට එරෙහි චෝදනා දේශපාලන පළිගැනීමක් බවට නජිබ් රසාක් ගෙන ආ තර්කය ප්රතික්ෂේප කළ විනිසුරුවරයා, 1MDB හි බලය සහ තනතුර අවභාවිත කරමින් ඔහු කටයුතු කර ඇති බවට සාක්ෂි මගින් සනාථ වන බව අවධාරණය කළේය. විත්තිකරුගේ බැංකු ගිණුම්වලට අදාළ මුදල් ලැබුණු බව පිළිගත්තද, ඒවා අයිරා පහසුකම් හෝ පරිත්යාග ලෙස ලැබුණු බවට විත්ති පාර්ශ්වය කළ ප්රකාශ පැමිණිල්ලේ සාක්ෂි හමුවේ බිඳ වැටෙන බව විනිසුරු සෙක්වේරා පෙන්වා දුන්නේය.
මුදල් විශුද්ධිකරණ ක්රියාවලියේදී බහුලව භාවිතා වන "Layering" හෙවත් මුදල්වල මූලාරම්භය වසන් කිරීමේ ක්රමවේදය අනුගමනය කරමින් ටැනෝර් ෆිනෑන්ස් කෝපරේෂන් (Tanore Finance Corporation) හරහා නජිබ්ගේ පෞද්ගලික ගිණුමට මුදල් හුවමාරු වී ඇති බවත්, එය නැවත ටැනෝර් සමාගමට යවා ඇති බවත් විනිසුරුවරයා සඳහන් කළේය. මෙම වංචාවේ මහ මොළකරු ලෙස සැලකෙන ජෝ ලෝ (Jho Low) සමඟ නජිබ් රසාක්ට ඉතා කිට්ටු සබඳතාවක් තිබූ බවත්, ඔවුන් දෙදෙනා එක්ව යාත්රා චාරිකාවල පවා නිරත වී ඇති බවත් අධිකරණයේදී අනාවරණය විය. ජෝ ලෝ යනු හුදෙක් අතරමැදියෙකු නොව නජිබ්ගේ නියෝජිතයෙකු ලෙස 1MDB හි කටයුතු මෙහෙයවූ අයෙකු බව සාක්ෂි මගින් පැහැදිලි වන බව විනිසුරුවරයා පැවසීය.
සෞදි රජ පවුලෙන් ලැබුණු දේශපාලන පරිත්යාගයක් ලෙස අදාළ මුදල් ලැබුණු බවට විත්ති පාර්ශ්වය ගොඩනැගූ "අරාබි පරිත්යාග" තර්කය ද අධිකරණය විසින් ප්රතික්ෂේප කරන ලද අතර, ඊට අදාළව ඉදිරිපත් කළ ලිපි ලේඛන ව්යාජ ඒවා බවට නිගමනය කෙරිණි. සෞදි අරාබියේ අබ්දුල්ලා රජුගෙන් හෝ වෙනත් රාජකීය සාමාජිකයෙකුගෙන් එවැනි විශාල මුදලක් ලැබුණු බවට විශ්වාස කළ හැකි කිසිදු ලියවිල්ලක් ඉදිරිපත් කිරීමට විත්ති පාර්ශ්වය අසමත් වූ බව විනිසුරුවරයා පෙන්වා දුන්නේය. 2018 සැප්තැම්බර් මස පළමු වරට චෝදනා ගොනු කෙරුණු මෙම නඩුව දින 302ක් පුරා වසර හයක් තිස්සේ විභාග වූ අතර, තීන්දුව ප්රකාශ කිරීමෙන් අනතුරුව නජිබ් රසාක්ගේ නීතිඥ ෂාෆි අබ්දුල්ලා දඬුවම් ලිහිල් කිරීමේ ඉල්ලීමක් ඉදිරිපත් කළේය.
දඬුවම් ලිහිල් කිරීමේ ඉල්ලීම ඉදිරිපත් කරමින් නීතිඥවරයා ප්රකාශ කළේ තම සේවාදායකයා දැනට සිරගෙදර සිටිමින් මැලේසියාවේ ආර්ථික පරිවර්තනය පිළිබඳ ආචාර්ය උපාධියක් හදාරමින් සිටින බවත්, ඔහුට දණහිස් ආශ්රිත රෝගාබාධ සහ අධි රුධිර පීඩනය වැනි සෞඛ්ය ගැටලු පවතින බවත්ය. කෙසේ වෙතත්, පැමිණිලි පාර්ශ්වය විසින් දැඩි දඬුවම් ලබා දිය යුතු බවට තර්ක කරමින්, උසස් රාජ්ය නිලධාරීන් සිදු කරන මෙවැනි බරපතල වංචා සඳහා අන් අයට පාඩමක් වන ලෙස උපරිම දඬුවම් නියම කළ යුතු බව අවධාරණය කරන ලදී. තීන්දුවෙන් පසු ප්රකාශයක් නිකුත් කළ නජිබ් රසාක්, තමා නීතිමය මාර්ග ඔස්සේ දිගටම සටන් කරන බවත්, අධිකරණ ක්රියාවලිය කෙරෙහි විශ්වාසය තබා ඇති බවත් පවසමින් සිය ආධාරකරුවන්ගෙන් සන්සුන්ව සිටින ලෙස ඉල්ලා සිටියේය.
දැනට 72 හැවිරිදි වියේ පසුවන නජිබ් රසාක්, SRC International සමාගමට අදාළ වෙනත් නඩුවක් සම්බන්ධයෙන් මේ වන විටත් වසර හයක සිර දඬුවමක් විඳිමින් සිටින අතර, ඔහුගේ ඉතිරි සිර දඬුවම් කාලය නිවාස අඩස්සියේ සිට ගෙවීමට කළ ඉල්ලීමක් ද මෙම තීන්දුවට දින හතරකට පෙර අධිකරණය විසින් ප්රතික්ෂේප කර තිබුණි. තීන්දුව ප්රකාශයට පත් කළ දිනයේ අධිකරණ භූමියට පැමිණි නජිබ් රසාක් පිළිගැනීමට ඔහුගේ ආධාරකරුවන් රැසක් පැමිණ සිටි අතර, "බොස්කු" (Bossku) යන අන්වර්ථ නාමයෙන් ඔහුව හඳුන්වමින් ඔවුහු ජය ඝෝෂා නැගූහ. මෙම තීන්දුවට එරෙහිව අභියාචනයක් ඉදිරිපත් කිරීමට විත්ති පාර්ශ්වය සූදානම් බව ඔහුගේ නීතිඥවරයා ප්රකාශ කර තිබේ.