ජපානයේ ගුන්මා ප්රාන්තයේ, මිනකාමි නගරය ආසන්නයේ පිහිටි කාන්-එට්සු අධිවේගී මාර්ගයේදී, අයහපත් කාලගුණික තත්ත්වය හේතුවෙන් පසුගිය සිකුරාදා (දෙසැම්බර් 26) රාත්රියේ දැවැන්ත රිය අනතුරක් සිදුව ඇති බව වාර්තා වේ. අධික මීදුම සහ හිම පතනය හේතුවෙන් මාර්ගයේ දෘශ්යතාව අඩුවීම මෙම අනතුරට ප්රධාන හේතුව වී ඇත.
පොලිස් වාර්තා සඳහන් කරන්නේ, මීදුම සහිත තත්ත්වය යටතේ ට්රක් රථ දෙකක් මුලින් ගැටීමෙන් මෙම දාම අනතුර ආරම්භ වී ඇති බවයි.මුල් ගැටීමත් සමඟ අධිවේගී මාර්ගයේ එක් මංතීරුවක් සම්පූර්ණයෙන්ම අවහිර වී ඇති අතර, හිම මිදී ලිස්සන සුළු බවට පත්ව තිබූ මාර්ගයේ වේගය පාලනය කර ගැනීමට නොහැකි වූ පිටුපසින් පැමිණි වාහන විශාල සංඛ්යාවක් එකිනෙක ගැටී තිබේ. මෙම දාම අනතුරට වාහන 50කට අධික සංඛ්යාවක් හසුවී ඇති බවට තහවුරු වී ඇති අතර, ගැටීමෙන් පසු හටගත් ගින්නක් වේගයෙන් පැතිරීම හේතුවෙන් වාහන දොළහකට වැඩි ප්රමාණයක් සම්පූර්ණයෙන්ම ගිනිගෙන විනාශ වී ඇත.
අනතුර සිදුවූ වහාම ගිනි නිවන භටයින් එම ස්ථානයට ළඟා වී ගින්න පාලනය කිරීමට දැඩි පරිශ්රමයක් දැරූ අතර, එය සම්පූර්ණයෙන් නිවා දැමීමට පැය හතක පමණ කාලයක් ගතවී තිබේ. මෙම ඛේදවාචකයෙන් වයස අවුරුදු 77ක කාන්තාවක් ජීවිතක්ෂයට පත්ව ඇති අතර, තවත් පුද්ගලයන් 26 දෙනෙකු තුවාල ලබා ඇත. තුවාල ලැබූවන් අතරින් පස් දෙනෙකුගේ තත්ත්වය බරපතල බව පොලිසිය වැඩිදුරටත් තහවුරු කර තිබේ.
වසර අවසාන හා නව අවුරුදු නිවාඩු සමය හේතුවෙන් අනතුර සිදුවන අවස්ථාවේ අධිවේගී මාර්ගයේ අධික රථවාහන තදබදයක් පැවතීම, හානි තත්ත්වය උග්රවීමට ප්රධාන සාධකයක් වී තිබේ. දැඩි හිම පතනය පිළිබඳව කල්තියා අනතුරු ඇඟවීම් නිකුත් කර තිබියදීත්, නිවාඩු කාලය හේතුවෙන් බොහෝ දෙනා සංචාරය කරමින් සිට ඇති බව සඳහන් වේ. මේ වන විට, විනාශ වූ වාහන සහ සුන්බුන් ඉවත් කිරීමේ කටයුතු සිදුවෙමින් පවතින අතර, පොලිසිය විසින් පරීක්ෂණ කටයුතු සහ මාර්ගය පිරිසිදු කිරීම සඳහා අධිවේගී මාර්ගයේ කොටසක් තවදුරටත් වසා දමා ඇත.
