නොවැම්බර් මස අග භාගයේ ශ්රී ලංකාවට බලපෑ අයහපත් කාලගුණික තත්ත්වය හේතුවෙන් අවහිර වී තිබූ පුත්තලම දුම්රිය මාර්ගයේ ධාවන කටයුතු හෙට, එනම් 2025 දෙසැම්බර් මස 29 වන දින සිට යළි ආරම්භ කිරීමට දුම්රිය දෙපාර්තමේන්තුව පියවර ගෙන තිබේ. පසුගිය දිනවල පැවති වර්ෂාවත් සමඟ කුඩාවැව සහ මාදම්පේ දුම්රිය ස්ථාන අතර පිහිටි කඩුපිටිය ප්රදේශයේ දුම්රිය පාලම අසලින් මාර්ගය සේදී යාම හේතුවෙන් කොළඹ කොටුව සහ හලාවත අතර දුම්රිය ධාවනය සම්පූර්ණයෙන්ම ඇණහිට තිබුණි.
මෙම හදිසි ආපදා තත්ත්වය නිසා හලාවත දුම්රිය ස්ථානයේ දුම්රිය කට්ටල 05ක් පමණ ගාල් කර තැබීමට සිදුවූ අතර දුම්රිය ධාවනය ලුණුවිල දුම්රිය ස්ථානය දක්වා පමණක් සීමා වී පැවතුණි.මේ වන විට ආපදාවට ලක් වූ දුම්රිය මාර්ග කොටස සම්පූර්ණයෙන්ම අලුත්වැඩියා කර අවසන් බැවින් හෙට දින සිට සාමාන්ය පරිදි කොළඹ කොටුව සහ හලාවත අතර දුම්රිය ධාවනය සිදුවනු ඇත. ඒ අනුව කාර්යාලීය මගීන්ගේ පහසුව සඳහා උදෑසන සහ සවස් කාලයේ ධාවනය වන දුම්රිය කාලසටහන් ද ප්රකාශයට පත් කර තිබේ. හලාවත සිට කොළඹ කොටුව දක්වා උදෑසන දුම්රිය පහක් ධාවනය වන අතර, හලාවතින් පෙරවරු 04.20 ට පිටත් වන දුම්රිය පෙරවරු 07.05 ට කොළඹ කොටුවට ළඟා වීමට නියමිතය. එසේම පෙරවරු 04.50 ට පිටත් වන දුම්රිය පෙරවරු 07.40 ට ද, පෙරවරු 05.30 ට පිටත් වන දුම්රිය පෙරවරු 07.30 ට ද කොළඹ කොටුවට ළඟා වනු ඇත. තවද පෙරවරු 05.50 සහ 06.10 ට හලාවතින් පිටත් වන දුම්රිය පිළිවෙළින් පෙරවරු 08.20 සහ 09.00 වන විට කොළඹ කොටුවට ළඟා වීමට නියමිතව ඇත.
සවස් කාලයේ කොළඹ කොටුවේ සිට හලාවත දක්වා ද දුම්රිය වාර පහක් ක්රියාත්මක වේ. ඒ අනුව පස්වරු 04.30 ට කොළඹින් පිටත් වන දුම්රිය පස්වරු 07.15 ට හලාවතට ළඟා වන අතර, පස්වරු 04.45 ට පිටත් වන දුම්රිය පස්වරු 06.45 ට ගමනාන්තය කරා ළඟා වනු ඇත. පස්වරු 05.18 ට කොළඹින් පිටත් වන දුම්රිය පස්වරු 07.45 ට හලාවතට ළඟා වීමට නියමිතය. මීට අමතරව පස්වරු 06.10 ට සහ රාත්රී 07.10 ට කොළඹ කොටුවෙන් පිටත් වන දුම්රිය පිළිවෙළින් රාත්රී 08.44 ට සහ රාත්රී 09.50 ට හලාවත දුම්රිය ස්ථානය වෙත ළඟා වනු ඇත.
මෙම නව කාලසටහනට අමතරව කොළඹ කොටුව සහ මීගමුව අතර උදෑසන සහ සවස් කාලයේ ධාවනය වන කාර්යාල දුම්රිය සාමාන්ය පරිදි ධාවනය වන බව ද දුම්රිය දෙපාර්තමේන්තුව මහජනතාව වෙත දැනුම් දෙයි.
