nihal-fernando-bids-farewell

 මෙරට කලා ක්ෂේත්‍රයට අමිල මෙහෙවරක් ඉටු කළ ප්‍රවීණ රංගන ශිල්පී නිහාල් ප්‍රනාන්දු මහතා අභාවප්‍රාප්ත වී තිබේ. මියයන විට ඒ මහතා 71 වැනි වියේ පසුවිය. දශක හතරකට අධික කාලයක් පුරා වේදිකාව, සිනමාව සහ ටෙලි නාට්‍ය යන අංශ තුනෙහිම ප්‍රතිභාව පෑ ඔහු රංගනයෙන් මෙන්ම අධ්‍යක්ෂණයෙන්ද දස්කම් දැක්වූ විශිෂ්ට කලාකරුවෙකි.



කොළඹ ලුම්බිණි විද්‍යාලයේ ආදි ශිෂ්‍යයෙකු වූ නිහාල් ප්‍රනාන්දු මහතා කලා ලොවට පිවිසෙන්නේ 1973 වසරේදී පමණ සයිමන් නවගත්තේගමයන්ගේ "ස්ත්‍රී" නාට්‍යය හරහාය.


විශේෂයෙන්ම වසර 40කට අධික කාලයක් පුරා "සුබ සහ යස" වේදිකා නාට්‍යයේ රංගනයෙන් දායක වෙමින් ඔහු ප්‍රේක්ෂක ආදරය නොඅඩුව දිනා ගැනීමට සමත් විය. මීට අමතරව "සුදු සහ කළු", "ඒකාධිපති", "පණ්ඩුකාභය", "අංගාරා ගඟ ගළා බසී" සහ "මකරාක්ෂයා" වැනි ප්‍රකට වේදිකා නාට්‍ය රැසකටම ඔහු සිය රංගන දායකත්වය ලබා දී ඇත.

රංගනයට පමණක් සීමා නොවූ හෙතෙම ටෙලි නාට්‍ය අධ්‍යක්ෂවරයෙකු සහ තිර රචකයෙකු ලෙසද ක්ෂේත්‍රයට සුවිශාල මෙහෙවරක් ඉටු කළේය. "අඹරාවක්", "උඩුගංබලා", "නේරංජනා", "අන්තඃස්වරය", "වංශක්කාරයෝ", "කුලැත්තියෝ" සහ "අක්වැස්ස" වැනි ටෙලි නාට්‍ය නිර්මාණ රැසක් ඔහුගේ අධ්‍යක්ෂණයෙන් සහ තිර රචනයෙන් හැඩැ ගැන්වුණු නිර්මාණ අතර වේ. එමෙන්ම රංගන ශිල්පියෙකු ලෙස "කඩවර", "රන්තාලිය වලව්ව", "තෙත් සහ වියලි", "ගෞතමී", "පින්න හරි සැරයි", "හැන්ඳෑවක්", "බොරදිය කඳුර" සහ "තරු කැට අහුරක්" වැනි ටෙලි නාට්‍ය විශාල සංඛ්‍යාවකට ඔහු දායක විය. මෑත කාලීනව හිරු නාලිකාවේ විකාශය වූ "රැල්ල වෙරළට ආදරෙයි" ටෙලි නාට්‍යය හරහාද ඔහු ප්‍රේක්ෂකයන් හමුවට පැමිණියේය.




"විරාගය" චිත්‍රපටයෙන් සිනමා ගමන ඇරඹූ නිහාල් ප්‍රනාන්දු මහතා "උමයංගණා" සහ "සුදු සෙවනැළි" වැනි චිත්‍රපටවල රඟපෑ අතර, "ආමන්තය" චිත්‍රපටය අධ්‍යක්ෂණය කරමින් එහි ප්‍රධාන චරිතයද නිරූපණය කිරීමට සමත් විය. ආචාර්ය අජන්තා රණසිංහයන් රචනා කළ එම චිත්‍රපටයේ පසුබිම් ගීතය වූ "තාරුකා නිවා" ගීතය ගායනා කරමින් ඔහු සිය ගායන හැකියාවද ප්‍රකට කර තිබීම විශේෂත්වයකි.

සිය කලා දිවියට වසර 45ක් සපිරෙන මොහොතේ නව පරපුරට දැනුම බෙදා දීම වෙනුවෙන් ඔහු රංගන පාසලක්ද පවත්වාගෙන ගිය ගුරුවරයෙකි. මීට පෙර 2015 වසරේදී දැඩි ලෙස රෝගාතුරව සිටි ඒ මහතා සැත්කම් කිහිපයකටද මුහුණ දුන් අතර, එකල ඔහුගේ සහෘද කලාකරුවන් ඔහු වෙනුවෙන් දැවැන්ත ශක්තියක් විය. තම බිරිඳ වන තමාරා මහත්මියගෙන් සිය කලා කටයුතු සඳහා විශාල සහයෝගයක් ලැබුණු බව ඔහු නිරන්තරයෙන් කෘතවේදීව සිහිපත් කළේය.