මෙක්සිකෝවේ දකුණුදිග ඔක්සාකා ප්රාන්තයේ සිදුවූ දරුණු දුම්රිය අනතුරකින් පුද්ගලයින් 13 දෙනෙකු ජීවිතක්ෂයට පත්වී තවත් 98 දෙනෙකු තුවාල ලබා ඇති බව එරට බලධාරීන් තහවුරු කර තිබේ. 2025 දෙසැම්බර් 28 වන දින මෙම අනතුර සිදුව ඇත්තේ වෙරක්රූස් සහ සැලිනා කෲස් සම්බන්ධ කෙරෙන අන්තර් සාගර දුම්රිය මාර්ගයේ චිවේලා සහ නිසන්ඩා යන නගර අතර ප්රදේශයේදී ය.
මෙම දුම්රිය මෙක්සිකෝ බොක්ක වෙරළ තීරයේ සිට පැසිෆික් සාගර කලාපය දක්වා ධාවනය වෙමින් තිබියදී නිසන්ඩා නගරය ආසන්නයේ පිහිටි වංගුවක් ගැනීමේදී පීලි පැනීමකට ලක්ව මෙම අනතුර සිදුවී ඇත.අනතුර සිදුවන අවස්ථාවේ දුම්රිය තුළ මගීන් 241 දෙනෙකු සහ කාර්ය මණ්ඩලයේ 9 දෙනෙකු ඇතුළුව මුළු පුද්ගලයින් 250 දෙනෙකු ගමන් කරමින් සිට ඇත. අනතුරින් පසු වහාම ක්රියාත්මක වූ මෙක්සිකානු නාවික හමුදාව සහ යුධ හමුදා භට පිරිස් විසින් මුදා ගැනීමේ මෙහෙයුම් දියත් කරන ලද අතර, තුවාල ලැබූවන්ගෙන් 36 දෙනෙකු රෝහල් ගත කිරීමට පියවර ගෙන තිබේ. රෝහල් ගත කළ පිරිස අතරින් පස් දෙනෙකුගේ තත්ත්වය බරපතල බව වාර්තා වේ. අනතුරට පත් දුම්රිය එන්ජින් දෙකකින් සහ මගී මැදිරි හතරකින් සමන්විත වූවක් බවත්, එය පීලි පැනීමෙන් පසු අසල වූ ප්රපාතයකට ඇල වී ගොස් ඇති බවත් අනතුර සිදුවූ ස්ථානයෙන් ලැබෙන වාර්තා සඳහන් කරයි.
මෙක්සිකානු ජනාධිපතිනි ක්ලෝඩියා ෂයින්බෝම් විසින් සමාජ මාධ්ය ඔස්සේ මෙම මරණ සහ තුවාල ලැබීම් පිළිබඳව සිය කණගාටුව ප්රකාශ කර ඇති අතර, විපතට පත් පවුල්වලට අවශ්ය සහාය ලබා දීමට ෆෙඩරල් නිලධාරීන්ට උපදෙස් ලබා දී තිබේ. නාවික හමුදා ලේකම්වරයා ඇතුළු ඉහළ පෙළේ නිලධාරීන් කණ්ඩායමක් අනතුර සිදුවූ ස්ථානය නිරීක්ෂණය කිරීම සඳහා පිටත්ව ගොස් ඇති බවද ඇය සඳහන් කළාය. ඔක්සාකා ප්රාන්ත ආණ්ඩුකාර සලමොන් ජාරා කෲස් ද සිද්ධිය සම්බන්ධයෙන් දැඩි කණගාටුව ප්රකාශ කරමින්, විපතට පත් වූවන්ට සහාය වීම සඳහා ප්රාන්ත සහ ෆෙඩරල් ආයතන ඒකාබද්ධව කටයුතු කරන බව පවසා ඇත.
මෙක්සිකෝවේ නීතිපති කාර්යාලය විසින් මෙම දුම්රිය පීලි පැනීමට හේතුව සොයා බැලීම සඳහා පුළුල් විමර්ශනයක් මේ වන විට ආරම්භ කර ඇත. මෑත කාලයේ මෙක්සිකෝවේ සිදුවූ දරුණුතම දුම්රිය අනතුරක් ලෙස මෙය සැලකෙන අතර, රටේ පුළුල් වෙමින් පවතින දුම්රිය ජාලයේ ආරක්ෂක විධිවිධාන වැඩිදියුණු කිරීමේ අවශ්යතාවය මෙමඟින් නැවතත් අවධාරණය වී තිබේ. මෙක්සිකානු නාවික හමුදාව විසින් පවත්වාගෙන යනු ලබන මෙම දුම්රිය සේවය, කලාපීය ආර්ථිකය නංවාලීමේ සහ භාණ්ඩ ප්රවාහනය දියුණු කිරීමේ අරමුණින් 2023 වසරේදී ආරම්භ කරන ලද ප්රධාන යටිතල පහසුකම් ව්යාපෘතියක කොටසකි.
