ඉන්දියාවේදී හොර ඡන්ද දැමූ බ්‍රසීල නිරූපිකාවක් ගැන රාහුල් ගාන්ධි කළ ප්‍රකාශය නිසා ආන්දෝලනයක්

 තම ඡායාරූපයක් ඉන්දීය දේශපාලන කරළියේ නීති විරෝධී ලෙස භාවිත කිරීම සම්බන්ධයෙන් බ්‍රසීලියානු නිරූපිකාවක් වන ලැරිසා නේරි සිය දැඩි කනස්සල්ල පළ කර තිබේ. මෙම සිදුවීම හරහා අනපේක්ෂිත ලෙස ලැබුණු ප්‍රසිද්ධිය සිය වෘත්තීය ජීවිතයට සහ පෞද්ගලික ජීවිතයට බරපතල හානියක් සිදු කරනු ඇතැයි ඇය බිය පළ කරයි. ඉන්ඩියා ටුඩේ වාර්තාවලට අනුව, නේරිගේ නීතිඥයින් මේ වන විටත් ඇයගේ ඡායාරූපය මෙලෙස අනිසි ලෙස භාවිත කිරීමට එරෙහිව නීතිමය විකල්ප සලකා බලමින් සිටී.

මෙම සිදුවීමට මුල් වූයේ ඉන්දීය දේශපාලඥ රාහුල් ගාන්ධි විසින් නොවැම්බර් 5 වන දින 'ඡන්ද සොරකම' මැයෙන් පැවැත්වූ මාධ්‍ය හමුවකි. එහිදී ඔහු භාරතීය ජනතා පක්ෂයට සහ මැතිවරණ කොමිසමට චෝදනා කරමින්, එක් කාන්තාවකගේ ඡායාරූපයක් හර්යානා ඡන්ද ලැයිස්තුවේ විවිධ නම් 22ක් යටතේ (ස්වීටි, සීමා, සරස්වතී, රශ්මි, විමලා වැනි) යොදා ඇති බවට තිරයක් මත ප්‍රදර්ශනය කරමින් පෙන්වා දුන්නේය.

කෙසේ වෙතත්, පසුව අනාවරණය වූයේ එම ඡායාරූපය කිසිදු ඉන්දියානු කාන්තාවකගේ නොව, ලැරිසා නේරි ගේ බවත්,

එය ඇයගේ අවසරයකින් තොරව යොදාගෙන ඇති බවත් ය. මේ සම්බන්ධයෙන් අදහස් දක්වමින් නේරි, "මට ඉන්දියානු දේශපාලනය සමඟ කිසිදු සම්බන්ධයක් නැහැ" යනුවෙන් පැහැදිලි කර තිබේ. ඡන්ද ලැයිස්තුවේ භාවිත කළ ඡායාරූපය 'ස්ටොක් ඉමේජ්' (Stock Image) වේදිකාවකින් මිලදී ගත්තක් බවත්, එය මෙවැනි කටයුත්තක් සඳහා භාවිත කර ඇත්තේ තමාගේ කිසිදු එකඟතාවයකින් තොරව බවත් ඇය වැඩිදුරටත් පවසා ඇත.

බ්‍රසීලියානු රූපවාහිනී නාලිකාවකට අනුව, මෙම සිදුවීමට පෙර ලැරිසා සමාජ මාධ්‍ය තුළ එතරම් ප්‍රසිද්ධ චරිතයක් නොවූ අතර ඇයට සිටියේ අනුගාමිකයින් 2,000 කට මඳක් වැඩි සංඛ්‍යාවකි. එහෙත් ඉන්දීය මාධ්‍ය තුළ වෛරස් වීමෙන් පසු, එම සංඛ්‍යාව 8,000 දක්වා පමණ ඉහළ ගොස් ඇති අතර, ඔවුන්ගෙන් බහුතරය ඉන්දියාවෙනි. කෙසේ නමුත්, මෙම හදිසි ප්‍රසිද්ධිය ඇයව දැඩි කම්පනයට පත් කර ඇති අතර, පැතිර යන පුවත් මගින් සිය වෘත්තීය ප්‍රතිරූපයට හානි වේ යැයි ඇය බියෙන් පසුවන්නීය. ඉන්දීය පුවත්පත්වල ඇය සම්බන්ධයෙන් ගණන් කළ නොහැකි 'මීම්ස්' (Memes) සහ කාටූන් ද පළ වී තිබේ.

සයිබර් අපරාධ පිළිබඳ විශේෂඥයෙකු පෙන්වා දෙන්නේ මෙහි බලපෑම චිත්තවේගීය සහ වෘත්තීය යන දෙඅංශයෙන්ම ඉතා විශාල බවයි. "යම් අයෙකුගේ ඡායාරූපයක්, එය නීත්‍යානුකූල හෝ වේවා, නීති විරෝධී හෝ වේවා, යම් අරමුණක් සඳහා භාවිත කරන විට, එය ඔවුන්ගේ පෞද්ගලික අයිතීන් උල්ලංඝනය කිරීමක්" බව එම විශේෂඥයා සඳහන් කර ඇත. බ්‍රසීලයේ පිහිටි ඉන්දීය තානාපති කාර්යාලය මෙතෙක් මෙම සිදුවීම සම්බන්ධයෙන් කිසිදු ප්‍රකාශයක් නිකුත් කර නොමැත.