පන්නල ප්රදේශයේ ඇති වූ ගංවතුර තත්ත්වය හේතුවෙන් නිවාස තුළ සිරවී සිටි පුද්ගලයින් අට දෙනෙකු ඉන්දියානු නාවික හමුදාවට අයත් හෙලිකොප්ටර් යානා දෙකක් යොදා ගනිමින් අද 29 දිනයේදී සාර්ථකව මුදා ගැනීමට කටයුතු කෙරිණි. ශ්රී ලංකාවේ පවතින හදිසි ආපදා තත්ත්වයට ප්රතිචාර දැක්වීම සඳහා ඉන්දියාව ලබා දෙන ගුවන් සහාය තවදුරටත් පුළුල් කරමින් මෙම මෙහෙයුම දියත් කර තිබේ.
අධික වර්ෂාවත් සමඟ ජල මට්ටම ඉහළ යාම නිසා පන්නල ප්රදේශයේ නිවාස රැසකට ප්රවේශ වීමේ මාර්ග ඇහිරී තිබූ අතර, මෙම හෙලිකොප්ටර් යානා වාර කිහිපයක් එම ප්රදේශයේ පියාසර කරමින් ආපදාවට ලක්වූවන් බේරා ගැනීමට කටයුතු කළ බව වාර්තා වේ. එලෙස මුදා ගත් පිරිස ආරක්ෂිත ස්ථාන වෙත රැගෙන යාමෙන් අනතුරුව ඉදිරි කටයුතු සඳහා ප්රාදේශීය බලධාරීන් වෙත භාර දීමට පියවර ගෙන ඇත.
දිවයින පුරා ක්රියාත්මක මුදාගැනීමේ මෙහෙයුම් සඳහා මේ වන විට ඉන්දියානු හෙලිකොප්ටර් යානා හතරක් යොදවා ඇති බව බලධාරීන් තහවුරු කර ඇති අතර, ඉන් යානා දෙකක් ඉන්දියානු නාවික හමුදාවට අයත් ‘අයි.එන්.එස් වික්රාන්ත්’ (INS Vikrant) නෞකාවේ සිට මෙහෙයුම් සිදු කරයි.
ගංවතුරෙන් පීඩාවට පත් දිස්ත්රික්කවල ජනතාව ඉවත් කිරීම, අත්යවශ්ය ද්රව්ය බෙදා හැරීම සහ හදිසි සහන සේවා සැපයීම වෙනුවෙන් ශ්රී ලංකා ගුවන් හමුදාව, නාවික හමුදාව, යුද්ධ හමුදාව සහ පොලීසිය ඇතුළු ආයතන සමඟ ඒකාබද්ධව මෙම ඉන්දියානු ගුවන් යානා අඛණ්ඩව කටයුතු කරමින් සිටී.
පන්නල සිදුවීමේ වීඩියෝව මෙතැනින් click here
Comments
Post a Comment
Your comment will be visible after approval