ඇමරිකාවේ කාර්ගෝ ගුවන් යානා අනතුරකින් 9 ක් මරුට

 ඇමරිකාවේ කෙන්ටකි ප්‍රාන්තයේ, ලුයිස්විල් හි පිහිටි යූපීඑස් (UPS) සමාගමේ ගෝලීය ගුවන් මධ්‍යස්ථානයෙන් ගුවන් ගත වී මොහොතකට පසු එහි භාණ්ඩ ප්‍රවාහන ගුවන් යානයක් කඩා වැටී පුපුරා යාමෙන් බිම සිටි සිව් දෙනෙකු ද ඇතුළුව අවම වශයෙන් පුද්ගලයින් නව දෙනෙකු මියගොස් තවත් එකොළොස් දෙනෙකු තුවාල ලබා ඇත. 

04 වන අඟහරුවාදා දින, දේශීය වේලාවෙන් සවස 5:15 ට පමණ ලුයිස්විල් මුහම්මද් අලී ජාත්‍යන්තර ගුවන්තොටුපළෙන් ගුවන් ගත වූ මැක්ඩොනල් ඩග්ලස් එම්ඩී-11 (McDonnell Douglas MD-11) වර්ගයේ මෙම යානය, ඉන් අනතුරුව විශාල ගිනි ජාලාවක් ලෙස පුපුරා ගොස් තිබේ.

හොනොලුලු බලා පියාසර කිරීමට නියමිතව තිබූ මෙම යානයේ කාර්ය මණ්ඩල සාමාජිකයින් තිදෙනෙකු සිටි අතර, එය ඉන්ධන ලීටර් 144,000 ක් පමණ රැගෙන ගොස් ඇත. අනතුර සිදුවන අවස්ථාවේ දර්ශන ඇතුළත් වීඩියෝ පටවල, යානයේ වම් පස තටුවෙහි ගින්නක් සහ දුම් දහරායක් නිරීක්ෂණය වී තිබේ. යානය ඉහළට එසවීමට උත්සාහ කර, මඳක් පොළොවෙන් ඉහළට ගොස්, පසුව විශාල ගිනි බෝලයක් ලෙස පුපුරා යමින් කාර්මික කලාපයකට කඩා වැටී ඇත.

මෙම කඩා වැටීම හේතුවෙන් ගුවන්තොටුපළ අසල පිහිටි ව්‍යාපාරික ස්ථාන කිහිපයකට ද හානි සිදුවී ඇති අතර, 'කෙන්ටකි පෙට්‍රෝලියම් ප්‍රතිචක්‍රීකරණ' සමාගමකට සහ මෝටර් රථ අමතර කොටස් වෙළඳසැලකට සෘජුවම බලපෑම් එල්ල වී තිබේ. කෙන්ටකි ආණ්ඩුකාර ඇන්ඩි බේෂියර් මහතා ප්‍රකාශ කළේ මරණ සංඛ්‍යාව තවදුරටත් ඉහළ යා හැකි බවත්, තුවාල ලැබූවන්ගෙන් සමහරෙකුගේ තත්ත්වය "ඉතා බරපතල" බවත්ය.

අනතුර සිදු වූ ස්ථානය අසල ව්‍යාපාරයක් පවත්වාගෙන යන ටොම් බෘක්ස් කියා සිටියේ මෙම අනතුර "යුද කලාපයක් මෙන්" දිස් වූ බවයි. සිද්ධිය ඇසින් දුටු ලෙයිරිම් රොඩ්රිගුස් විසින් පටිගත කරන ලද වීඩියෝවක, අහසට නැගෙන විශාල ගිනි ජාලා සහ ඝන කළු දුම් වලාකුළු දැක්වේ. අනතුර සිදු වූ ස්ථානයේ සිට මඳක් දුරින් පිහිටි අවන්හලක සේවය කළ ඩෙස්ටින් මිචෙල් පැවසුවේ, තමන්ට විශාල පිපිරුම් හඬක් ඇසුණු බවත්, අවන්හලේ සිටි සියල්ලන්ම දැඩි ලෙස කම්පනයට පත් වූ බවත්ය.

අනතුරෙන් පසු ගුවන්තොටුපළේ මෙහෙයුම් සම්පූර්ණයෙන්ම නතර කෙරුණු අතර, බදාදා උදෑසන වන තෙක් ඒවා නැවත ආරම්භ කිරීමට අපේක්ෂා නොකරන බව බලධාරීහු පැවසූහ. යූපීඑස් සමාගම ද ලොව විශාලතම පැකේජ හැසිරවීමේ මධ්‍යස්ථානය වන 'වර්ල්ඩ්පෝට්' හි (Worldport) කටයුතු තාවකාලිකව අත්හිටුවා ඇත. ජාතික ප්‍රවාහන ආරක්ෂණ මණ්ඩලය (NTSB) සාමාජිකයින් 28 දෙනෙකුගෙන් යුත් කණ්ඩායමක් මගින් මෙම අනතුර පිළිබඳව පුළුල් විමර්ශනයක් ආරම්භ කර තිබේ.