වහල මත සවිකළ සූර්ය විදුලි පද්ධති සමග ඒකාබද්ධ කරන ලද බැටරි බලශක්ති ගබඩා පද්ධති (BESS) පිහිටුවාගන්නේ නම් ඒ සඳහා කාලය පදනම් කරගත් නව ගාස්තු ක්රමවේදයක් හඳුන්වා දීමට රජයේ අනුමැතිය හිමිවී ඇති බව ලංකා විදුලිබල මණ්ඩලය (ලංවිම) නිවේදනය කරයි.
මෙම නව වැඩපිළිවෙළෙහි ප්රධාන අරමුණ වනුයේ, සූර්ය බලශක්ති නිෂ්පාදකයින් විසින් බැටරි ගබඩා පද්ධති ස්ථාපනය කිරීම සඳහා දිරිමත් කිරීමයි. එමගින් ඔවුන්ට දිවා කාලයේදී නිපදවන අතිරික්ත විදුලි බලය ගබඩා කර තබා ගැනීමටත්,
සන්ධ්යා කාලයේ අධික විදුලි ඉල්ලුමක් පවතින වේලාවන්හිදී එය ජාතික පද්ධතියට මුදා හැරීමටත් අවස්ථාව සැලසේ.
ඒ අනුව, රාත්රී අධික ඉල්ලුම් කාලය ලෙස නම් කර ඇති සවස 6:30 සිට රාත්රී 10:30 දක්වා කාල පරාසය තුළදී බැටරි ගබඩා පද්ධතිවලින් ජාතික පද්ධතියට නිකුත් කරනු ලබන විදුලිය ඒකකයක් (kWh) සඳහා රුපියල් 45.80 ක ගාස්තුවක් ගෙවීමට ලංකා විදුලිබල මණ්ඩලය කටයුතු කරනු ඇත.
මෙම නව ක්රමය වලංගු වන්නේ මීටරින් පදනම නොව ගෙවීම් පදනම මත සූර්ය පැනල සවිකරගත් ග්රාහකයින්ට පමණි.
මෙම නව ප්රවේශය හරහා ජාතික විදුලිබල පද්ධතියේ ස්ථායීතාවය වැඩිදියුණු වනු ඇතිවා මෙන්ම, අධික පිරිවැයක් දරමින් පොසිල ඉන්ධන මගින් සිදුකරන තාප විදුලි ජනනය මත රට රඳා පැවැත්ම සැලකිය යුතු මට්ටමකින් අඩුකර ගැනීමට ද හැකිවනු ඇතැයි අපේක්ෂා කෙරේ.
ශ්රී ලංකාව වඩාත් පිරිසිදු හා සුහුරු බලශක්ති පද්ධතියක් කරා ගෙනයන ගමන වේගවත් කිරීම සඳහා ගත් ඓතිහාසික පියවරක් ලෙස ලංවිම මෙය හඳුන්වයි. පුනර්ජනනීය බලශක්ති ඒකාබද්ධ කිරීම ප්රවර්ධනය කරමින්, වඩාත් ඔරොත්තු දිය හැකි සහ තිරසාර බලශක්ති අංශයක් මෙරට ගොඩනැගීම සඳහා මෙම නව ගාස්තු ක්රමය ප්රධාන සන්ධිස්ථානයක් වනු ඇති බව ද ලංවිම නිලධාරීහු වැඩිදුරටත් පෙන්වා දෙති.
Comments
Post a Comment
Your comment will be visible after approval