jkcg-presents-reasons-in-court-to-release-byd-vehicles

 ශ්‍රී ලංකාවේ BYD වාහන සඳහා බලයලත් බෙදාහරින්නා වන ජෝන් කීල්ස් සීජී ඔටෝ (පුද්ගලික) සමාගම විසින් ශ්‍රී ලංකා රේගුව භාරයේ රඳවා ඇති තම සමාගමට අයත් BYD වාහන තොගය නිදහස් කිරීමේ අවශ්‍යතාව ඊයේ (10) අධිකරණය හමුවේ අවධාරණය කරන ලදී.



පෙත්සම්කාර සමාගම වෙනුවෙන් පෙනී සිටි ජනාධිපති නීතිඥ ෆර්සානා ජමීල් මහත්මිය, අදාළ වාහන හය නිදහස් කරන ලෙස ඉල්ලා 2025 සැප්තැම්බර් 19 වන දින දරන ලද මෝසමක් ගොනු කර ඇති බව අධිකරණයට දැනුම් දුන්නාය.

පසුගිය ජූනි මාසයේදී ආනයනය කරන ලද වාහන තොගයක් කිසිදු ගැටලුවකින් තොරව නිෂ්කාශනය කර ඇති නමුත්, ඒ හා සමාන වාහන තොගයක් කිසිදු වලංගු හේතුවක් නොදක්වා අගෝස්තු මාසයේදී රඳවාගෙන ඇති බව ඇය අධිකරණයට දන්වා සිටියාය.

මෙලෙස වාහන රඳවා ගැනීමට බලපෑ වලංගු හේතු ඉදිරිපත් කළ යුතු බවත්, එමගින් පෙත්සම්කරුට ඒ අනුව ප්‍රතිචාර දැක්වීමට අවස්ථාව සැලසෙන බවත් ජනාධිපති නීතිඥවරිය තර්ක කළාය. ඉන් අනතුරුව අතුරු සහනය සඳහා වන අයදුම්පතට තම පාර්ශ්වය සහාය දෙන බවද ඇය වැඩිදුරටත් අධිකරණයට ඉදිරිපත් කළාය. කිලෝවොට් 100 කට අඩු මෝටර් ධාරිතාවක් සහිත වාහන රඳවා තබා ගැනීමට කිසිදු නියම පදනමක් නොමැති බවද ඇය සඳහන් කළාය.

එම වාහන බැංකු ඇපකරයක් මත නිදහස් කිරීමේ යෝජනාවට පෙත්සම්කාර පාර්ශ්වය දැඩි විරෝධය පළ කළ අතර, ඒ වෙනුවට සංස්ථාපිත ඇපකරයක් යටතේ ඒවා නිදහස් කිරීමට කැමැත්ත පළ කළේය.

ශ්‍රී ලංකා රේගු අධ්‍යක්ෂ ජනරාල්වරයා වෙනුවෙන් පෙනී සිටි ජ්‍යෙෂ්ඨ අතිරේක සොලිසිටර් ජනරාල් සුමති ධර්මවර්ධන මහතා අධිකරණයට දන්වා සිටියේ රේගු ආඥාපනතේ විධිවිධානවලට අනුකූලව රේගුව මේ වන විටත් මෙම කාරණය සම්බන්ධයෙන් විමර්ශනයක් ආරම්භ කර ඇති බවයි. දැනට සිදු කෙරෙමින් පවතින විමර්ශන සඳහා පහසුකම් සැලසීමක් ලෙස මෙම වාහන හය රඳවාගෙන ඇති බව ඔහු පැවසීය.



"අපි ශ්‍රී ලංකා රේගුවේ නිලධාරීන්ගෙන් උපදෙස් ලබාගෙන විමර්ශනය අවසන් කිරීමට අපේක්ෂිත කාල සීමාව පිළිබඳව මීළඟ නඩු දිනයේදී අධිකරණයට දන්වන්නම්," යි ධර්මවර්ධන මහතා ප්‍රකාශ කළේය. ස්කෑනර් යන්ත්‍ර වැනි තාක්ෂණික සහාය ලබා දෙන්නේ නම් විමර්ශන කටයුතු කඩිනම් කළ හැකි බව පැවසූ ඔහු, පෙත්සමට එරෙහිව විරෝධතා ගොනු කිරීමේ අයිතිය වගඋත්තරකරුවන් සතු බවද සඳහන් කළේය.

අභියාචනාධිකරණ සභාපති විනිසුරු රොහාන්ත අබේසූරිය සහ විනිසුරු ප්‍රියන්ත ප්‍රනාන්දු යන මහත්වරුන්ගෙන් සමන්විත දෙපුද්ගල විනිසුරු මඩුල්ලක් ඉදිරියේ මෙම නඩුව ඔක්තෝබර් 23 වන දිනට නැවත කැඳවීමට නියමිතය. මීට පෙර, 2025 ජූලි මාසයේදී ද ජෝන් කීල්ස් සීජී ඔටෝ සමාගමට අයත් BYD වාහන තොග දෙකක් ශ්‍රී ලංකා රේගුව විසින් රඳවාගෙන තිබූ අතර, රිට් අයදුම්පතක් ගොනු කිරීමෙන් අනතුරුව වාහන 991ක් බැංකු ඇපයක් මත නිදහස් කිරීමට අගෝස්තු 7 වන දාත්, තවත් වාහන 506ක් සැප්තැම්බර් 3 වන දාත් නිදහස් කිරීමට රේගුව අධිකරණය හමුවේ එකඟතාව පළ කර තිබිණි.