ලන්ඩන් නුවර බස් නැවතුමක් අසළදී බීමතින් සිටි බාලවයස්කාර දැරියන් තිදෙනෙකුගෙන් සැදුම්ලත් කල්ලියක් විසින් කිසිදු හේතුවකින් තොරව සිදුකළ දරුණු පහරදීමකින් 75 හැවිරිදි වයෝවෘද්ධ පුද්ගලයෙකු මරණයට
පත්වීමේ සිදුවීමක් මීට මාස කිහිපයකට පෙර වාර්තා විය. මේ සම්බන්ධයෙන් පැවති නඩු විභාගයේදී එම දැරියන්ට වසර නවයක සමස්ත සිර දඬුවමක් නියම කර තිබේ. මෙම සිදුවීම වන විට වයස අවුරුදු 14, 16 සහ 17 යන වයස්වල පසුවූ මෙම දැරියන් තිදෙනාපසුගිය පෙබරවාරි 27 වන දින රාත්රියේ සිය නිවස බලා පයින් ගමන් කරමින් සිටි හිටපු හෝටල් සේවකයෙකු වූ ෆ්රෙඩී රිවේරෝ මහතා පසුපස මෙම දැරියන් පන්නා එමින් ඔහුට හිරිහැර කර ඇත. එම අවස්ථාවේදී ඔවුන් 75 හැවිරිදි රිවේරෝ මහතාට තල්ලු කරමින් සහ පයින් පහර දෙමින්, ඔහුගෙන් තමන්ව තනිවම යාමට ඉඩ හරින ලෙස දිගින් දිගටම ඉල්ලා සිටියදීත් ඔහුගේ ඇස් කණ්ණාඩිය පවා ගලවාගෙන තිබේ.
බොලිවියානු ජාතිකයෙකු වූ සහ බෞද්ධාගමිකයෙකු වූ රිවේරෝ මහතා, තත්ත්වය සමථයකට පත්කිරීමේ අරමුණින් සාමයේ සංකේතය පවා පෙන්වමින්, "දුවේ, මොකක්ද ප්රශ්නය?" යනුවෙන් ඔවුන්ගෙන් විමසා ඇත. එහෙත්, එම උත්සාහය නොතැකූ දැරියන් අතරින් වැඩිමහල් දැරිය එල්ල කළ එක් මරු පහරකින් රිවේරෝ මහතා රුධිර විලක් මැද බිම ඇද වැටී ඇති අතර, පසුවදා රෝහල්ගතව ප්රතිකාර ලබමින් සිටියදී ඔහු ජීවිතක්ෂයට පත්විය.
මෙම අමානුෂික පහරදීම මුල සිට අග දක්වාම එක් දැරියකගේ ජංගම දුරකථනයෙන් වීඩියෝ ගත කර තිබූ අතර, එහි ඔවුන් වින්දිතයාට අපහාස කරමින් කෑගසන අයුරු සහ සිනාසෙන අයුරු පැහැදිලිව සටහන්ව තිබිණි. උතුරු ලන්ඩනයේ ඉස්ලින්ටන් හි බස් නැවතුම්පළක් අසල මෙම සිදුවීම සිදුවී ඇත.
මිනීමැරීමේ චෝදනාවට වරද පිළිගත් මෙම දැරියන්ට ඕල්ඩ් බේලි අධිකරණයේදී දඬුවම් නියම කළ විනිසුරු ජූඩි ඛාන් කේ.සී. මහත්මිය සඳහන් කළේ මෙම දැරියන් තිදෙනාම "අසාමාන්ය ලෙස කම්පන සහගත පසුබිම්" වලින් පැවත එන්නන් බවයි. ඒ අනුව, වයසින් වැඩිමල් දැරියට වසර හතරක රැඳවුම් දඬුවමක්ද, දෙවැන්නියට වසර තුනහමාරක දඬුවමක්ද, බාලම දැරියට වසර දෙකහමාරක රැඳවුම් දඬුවමක්ද නියම කෙරිණි. ඔවුන්ගේ වයස හේතුවෙන් නීතියට අනුව ඔවුන්ව හඳුනාගැනීමට නොහැක.
මෙම සිදුවීමෙන් දැඩි සේ කම්පනයට පත්ව සිටින රිවේරෝ මහතාගේ දියණිය අධිකරණය හමුවේ ප්රකාශයක් ලබාදෙමින්, "මේ ගොඩනැගෙමින් පවතින්නේ කුමන ආකාරයේ පරම්පරාවක්ද?" යි ප්රශ්න කළාය. දැරියන් පානය කර තිබූ වොඩ්කා බෝතල් භාගයක් ගැන සඳහන් කරමින් ඇය විමසුවේ එම වයසේ ගැහැනු ළමයින්ට මෙතරම් ප්රචණ්ඩත්වයකට යොමුවීමට හේතුව කුමක්ද යන්නයි.
තම පියාට කෲර ලෙස සහ ද්වේෂ සහගතව මරු කැඳවූ මෙම තිදෙනාට තමන් කිසිදා සමාව නොදෙන බවට ඇය අධිකරණය හමුවේ පැවසුවාය. "මගේ තාත්තා අසනීප තත්ත්වයෙන් සිටි, කිසිවෙකුටවත් හිංසාවක් නොකරන වයෝවෘද්ධ පුද්ගලයෙක්. ඔහුට අවශ්ය වුණේ ගෙදර යන්න විතරයි, ඒ නිසාම ඔහු ඔවුන්ගෙන් බැගෑපත්ව ඉල්ලා සිටියා ඔහුව තනි කරන්න කියලා," යනුවෙන් ඇය හැඟීම්බරව ප්රකාශ කළාය. පිළිකා රෝගී තත්ත්වයකටද ප්රතිකාර ලබමින් සිටි තම පියා චෙස් ක්රීඩාවට, සතුන්ට, ගෙවතු වගාවට සහ ක්වීන් වැනි සංගීතයට ලැදියාවක් දැක්වූ "ඔබට හමුවිය හැකි හොඳම පුද්ගලයා" ලෙස ඇය හැඳින්වූවාය.
සිද්ධියෙන් පසු එම ස්ථානයෙන් පලාගිය දැරියන් තිදෙනා අවට විවිධ ස්ථානවලදී පොලිසිය විසින් අත්අඩංගුවට ගෙන තිබේ. එක් දැරියක් සිද්ධියේ වරද රිවේරෝ මහතා පිට පැටවීමට උත්සාහ කරමින්, "ඇත්තම කිව්වොත්, ඒක එයාගෙ වැරැද්ද, එයා තමයි අපිත් එක්ක පටන් ගත්තෙ" යනුවෙන් පොලිසියට පවසා ඇත. වැඩිමහල් දැරිය අත්අඩංගුවට ගන්නා විට ඇය සිද්ධිය වන අවස්ථාවේ ඇඳ සිටි ඇඳුම් රෙදි සෝදන යන්ත්රයට දමා තිබී ඇත.
මෙම නඩුවේ පැමිණිල්ල වෙනුවෙන් පෙනී සිටි නීතිඥවරිය අධිකරණයට දන්වා සිටියේ රිවේරෝ මහතා මෙම ප්රහාරයට කිසිදු අයුරකින් හෝ අනුබල නොදුන් අහිංසක වින්දිතයෙකු බවයි. විමර්ශන මෙහෙයවූ පොලිස් නිලධාරියාද ප්රකාශ කළේ, "මෙය හුදෙක් තම දෛනික කටයුත්තක නිරතව සිටි වයෝවෘද්ධ මිනිසෙකුට එරෙහිව දියත් කළ කිසිසේත්ම සාධාරණීකරණය කළ නොහැකි ප්රහාරයක්. ඔවුන් මෙම පහරදීම වීඩියෝ කර එයින් විනෝදයක් ලැබීම මෙම සිදුවීම තවත් පිළිකුල් සහගත කරයි," යනුවෙනි.
සිදුවීමට අදාළ වීඩියෝවක් පහතින්
Comments
Post a Comment
Your comment will be visible after approval