ඊශ්රායලය සහ හමාස් සංවිධානය අතර ගාසා තීරයේ පවතින යුද්ධය අවසන් කිරීමේ ගිවිසුමක් සඳහා වන ගෝලීය සාම සමුළුවක් හෙට (සඳුදා) ඊජිප්තුවේ ශාම් එල්-ෂෙයික් නිකේතන නගරයේදී පැවැත්වීමට නියමිතය. මෙම සමුළුවේ සම සභාපතීත්වය ඇමරිකානු ජනාධිපති ඩොනල්ඩ් ට්රම්ප් සහ ඊජිප්තු ජනාධිපති අබ්දෙල් ෆටා අල්-සිසී විසින් හොබවනු ලබන බව වාර්තා වේ. මෙම ක්රියාදාමය පසුපස වත්මන් ඇමරිකානු ජනපති වීරත්වයට නගමින් විදෙස් මාධ්ය පුවත් වාර්තා කර ඇත.ට්රම්ප් දියණිය ඉවන්කාද ඊශ්රයාලයේ රැළියක් අමතමින් සිය පියාගේ වැඩ පිළිවෙල ගැන කථා කර තිබේ.
රටවල් 20කට අධික සංඛ්යාවක නායකයින්ගේ සහභාගීත්වයෙන් මෙම ජාත්යන්තර සමුළුව සඳුදා පස්වරුවේ පැවැත්වෙන බව ඊජිප්තු ජනාධිපති කාර්යාලය නිවේදනයක් නිකුත් කරමින් සඳහන් කළේය. ගාසා තීරයේ යුද්ධය නිමා කිරීම, මැදපෙරදිග සාමය සහ ස්ථාවරත්වය සඳහා වන ප්රයත්නයන් ශක්තිමත් කිරීම මෙන්ම කලාපීය ආරක්ෂාව සහ ස්ථාවරත්වය සඳහා නව යුගයක් උදා කිරීම මෙම සමුළුවේ අරමුණ බව එම නිවේදනයේ වැඩිදුරටත් දැක්වේ.
එක්සත් ජාතීන්ගේ මහලේකම් ඇන්ටෝනියෝ ගුටරෙස්, ප්රංශ ජනාධිපති එමානුවෙල් මැක්රොන්, බ්රිතාන්ය අගමැති කියර් ස්ටාමර්, ඉතාලි අගමැති ජෝර්ජියා මෙලෝනි සහ ස්පාඤ්ඤ අගමැති පේද්රෝ සැන්චෙස් යන නායකයින් සමුළුව සඳහා සිය පැමිණීම තහවුරු කර ඇති බව සඳහන්ය.
කෙසේ වෙතත්, ඊශ්රායල අගමැති බෙන්ජමින් නෙතන්යාහු මෙම සමුළුවට සහභාගී වේද යන්න පිළිබඳව මෙතෙක් නිල වශයෙන් තහවුරු කර නොමැති අතර, හමාස් සංවිධානය තමන් සමුළුවට සහභාගී නොවන බව නිවේදනය කර තිබේ.
මෙම සමුළුවට පෙර, කටාර් රාජ්යයේ රාජ්යතාන්ත්රිකයින් තිදෙනෙකු ශාම් එල්-ෂෙයික් නගරය ආසන්නයේදී ඝාතනයට ලක්ව තවත් දෙදෙනෙකු තුවාල ලබා ඇති බව නිලධාරීහු පවසති. ඔවුන් සමුළුව සඳහා ගමන් කරමින් සිටි කටාර් දූත පිරිසකගේ සාමාජිකයින්ය.
දස දහස් සංඛ්යාත ඊශ්රායල ජාතිකයන්ගේ උණුසුම් අත්පොළසන් නාදය මැද, ජැරඩ් කුෂ්නර්, ඉවන්කා ට්රම්ප් සහ ස්ටීව් විට්කොෆ් සෙනසුරාදා සවස ටෙල් අවිව්හි 'ප්රාණ ඇපකරුවන්ගේ චතුරශ්රය' ලෙස හැඳින්වෙන ස්ථානයේදී ජනතාව ඇමතූහ. පසුගිය සිකුරාදා සිට ගාසා තීරයේ ක්රියාත්මක වූ සටන් විරාමය ඇති කර ගැනීම සඳහා ඇමරිකානු රාජ්ය තාන්ත්රික නියෝජිතයෙකු වන විට්කොෆ් මහතා කුෂ්නර් සමඟ එක්ව ප්රධාන කාර්යභාරයක් ඉටු කර තිබිණි.
ගාසා තීරයේ රඳවාගෙන සිටින ප්රාණ ඇපකරුවන් නැවත ගෙන්වා ගන්නා ලෙස ඉල්ලා ඊශ්රායල ජාතිකයන් වසර දෙකක් පුරා සෑම සෙනසුරාදා දිනකම පාහේ මෙම චතුරශ්රයට රැස්වී උද්ඝෝෂණ පැවැත්වීය. ඉදිරි දිනවලදී ජීවතුන් අතර සිටින ප්රාණ ඇපකරුවන් 20 දෙනා සහ මියගිය ප්රාණ ඇපකරුවන් 28 දෙනෙකුගේ සිරුරු නැවත පැමිණෙනු ඇතැයි අපේක්ෂා කරන බැවින්, මෙය ඔවුන්ගේ අවසන් උද්ඝෝෂණය වනු ඇතැයි විරෝධතාකරුවෝ බලාපොරොත්තු පළ කරති.
"මේ සියල්ල සිදු කළ හැකි වූයේ ඩොනල්ඩ් ජේ. ට්රම්ප්ගේ අධිෂ්ඨානශීලී නායකත්වය සහ ඔබගේ විශ්වාසය එක්වීමෙනි" යනුවෙන් විට්කොෆ් රැස්ව සිටි පිරිසට පැවසීය. ඇමරිකානු ජනාධිපතිවරයාගේ නම ඇසීමත් සමඟ ජනතාව ප්රීතිඝෝෂා නගන්නට වූහ. කෙසේ වෙතත්, ඔහු ඊශ්රායල අගමැති බෙන්ජමින් නෙතන්යාහුට ස්තූති කිරීමට උත්සාහ කළ අවස්ථාවේදී, ජනතාවගේ හූ හඬින් ඔහුගේ කතාවට කිහිප වරක්ම බාධා එල්ල විය.
චතුරශ්රයට පැමිණ සිටි 29 හැවිරිදි අඩීනා කර්පුයි නම් තරුණියක් අදහස් දක්වමින්, "ට්රම්ප්ගේ ගිවිසුමට නෙතන්යාහු අත්සන් කළත්, පසුගිය වසර දෙක තුළ සිදු වූ දෙයට හමාස් සංවිධානය මෙන්ම ඔහුත් එකසේ වගකිව යුතුයි. ඊශ්රායල ජාතිකයන්ගේ සහ ගාසා වැසියන්ගේ ලේ ඔහුගේ දෑත්වල තැවරී තිබෙනවා," යනුවෙන් පැවසුවාය. ප්රාණ ඇපකරුවන් නැවත පැමිණීමට ආසන්න වීමට හේතුව විට්කොෆ් සහ කුෂ්නර් බව ඇයගේ අදහස විය.
ඇමරිකානු ජනාධිපති ඩොනල්ඩ් ට්රම්ප්ගේ සැලැස්මකට අනුව ඊශ්රායලය සහ හමාස් සංවිධානය සටන් විරාමයක පළමු අදියර සඳහා එකඟ වීමෙන් අනතුරුව මෙම සමුළුව සංවිධානය කර තිබේ. එම පළමු අදියරට සටන් විරාමයක්, ප්රාණ ඇපකරුවන් නිදහස් කිරීම සහ ඊශ්රායලය විසින් පලස්තීන සිරකරුවන් නිදහස් කිරීම ඇතුළත් වේ. 2023 ඔක්තෝබර් 7 වන දින හමාස් සංවිධානය විසින් ඊශ්රායලයට එල්ල කළ ප්රහාරයෙන් පුද්ගලයින් 1,200ක් මිය ගොස් 251 දෙනෙකු ප්රාණ ඇපයට ගෙන තිබිණි. ඊට ප්රතිචාර වශයෙන් ඊශ්රායලය දියත් කළ ප්රහාර හේතුවෙන් මේ දක්වා පලස්තීනයේ 67,000කට අධික පිරිසක් මිය ගොස් ඇත.
දින 482ක් ප්රාණ ඇපයේ සිට නිදහස් වූ ගාඩි මෝසෙස්ගේ ලේලිය වන එෆ්රාට් මචිකාවා රැළිය අමතමින්, "ඩොනල්ඩ් ට්රම්ප්! ඔබ ඉතිහාසගත වී තිබෙනවා. අපට වඩාත්ම අවශ්ය වූ මොහොතේ ඔබ අපේ පවුල් සමග සිටියා" යැයි පැවසීමත් සමග ජනතාවගේ අත්පොළසන් නාදය නැගී සිටියේය. එම චතුරශ්රයේ ඊශ්රායල ධජ අතර ඇමරිකානු ධජ කිහිපයක්ද ලෙළදෙමින් තිබෙනු දැකගත හැකි විය.
මෙම නවතම ගිවිසුම යටතේ, වසර දෙකකට පෙර පැහැරගත් 251 දෙනාගෙන් ඉතිරිව සිටින (ජීවත්වන සහ මියගිය) ඊශ්රායල ප්රාණ ඇපකරුවන් 47 දෙනා සඳුදා දහවල් වන විට හමාස් සංවිධානය විසින් භාර දිය යුතුව ඇත. ඊට හිලව්වක් ලෙස ඊශ්රායලය විසින් පලස්තීන සිරකරුවන් සිය ගණනක් නිදහස් කිරීමට නියමිතය. 2023 නොවැම්බර් සහ 2025 මුල් භාගයේදී ඇතිකරගත් මීට පෙර සටන් විරාමයන් දෙකක්ද ප්රාණ ඇපකරුවන් නිදහස් කිරීමට හේතු වූ නමුත්, ඒවා බිඳ වැටී නැවත සටන් ඇවිලී ගියේය.
Comments
Post a Comment
Your comment will be visible after approval