බොහෝ දෙනාගේ අපේක්ෂාවට ලක්වූ, යුරෝපයේ ෂෙන්ගන් (Schengen) ක්රමයට සමාන ගල්ෆ් සහයෝගිතා කවුන්සිලයේ (GCC) ඒකාබද්ධ සංචාරක වීසා බලපත්රය හඳුන්වා දීම මේ වන විට යථාර්ථයක් බවට පත්වෙමින් පවතින අතර, එහි නියමු ව්යාපෘතියක් 2025 වසරේ සිව්වන කාර්තුව වන විට ආරම්භ කිරීමට අපේක්ෂිත බව එක්සත් අරාබි එමීර් රාජ්යයේ ආර්ථික හා සංචාරක අමාත්ය සහ එමිරේට්ස් සංචාරක කවුන්සිලයේ සභාපති අබ්දුල්ලා බින් ටූක් අල් මාරි මහතා ප්රකාශ කර ඇත.
එමිරේට්ස් පුවත් ඒජන්සිය (WAM) වෙත අදහස් දක්වමින් අල් මාරි මහතා මෙම කරුණ තහවුරු කර ඇති අතර, මෙම පියවර කලාපීය ඒකාබද්ධතාව ගැඹුරු කිරීම සඳහා වූ උපායමාර්ගික පියවරක් බවත්, සමස්ත ගල්ෆ් කලාපයම තනි සංචාරක ගමනාන්තයක් ලෙස එහි සාමූහික ආකර්ෂණය ඉහළ නංවනු ඇති බවත් ඔහු විස්තර කළේය.
"GCC මහා සංචාරක වීසා" (GCC Grand Tourist Visa) ලෙසද හැඳින්වෙන මෙම ඒකාබද්ධ වීසා බලපත්රය මගින් සංචාරකයින්ට එක්සත් අරාබි එමීර් රාජ්යය, සෞදි අරාබිය, ඕමානය, කටාර්, කුවේට් සහ බහරේන් යන සාමාජික රටවල් හය පුරාම තනි ප්රවේශ බලපත්රයක් භාවිතයෙන් නිදහසේ ගමන් කිරීමට අවස්ථාව සැලසේ. මෙම ක්රමය ඩිජිටල් යෙදුම් වේදිකාවක් මත පදනම් වන අතර, එමගින් සංචාරකයින්ට පරිපාලනමය බාධා අවම කර ගනිමින් ගල්ෆ් කලාපයේ රටවල් කිහිපයක සංචාර සැලසුම් කිරීමට හැකියාව ලැබේ.
මෙම ඒකාබද්ධ වීසා බලපත්රය දැනට එහි අවසන් තාක්ෂණික සහ ඩිජිටල් ක්රියාත්මක කිරීමේ අදියරේ පවතින අතර, එය කලාපයේ සංචාරක සහ ආර්ථික වර්ධනය සඳහා ප්රධාන උත්ප්රේරකයක් ලෙස ක්රියා කරනු ඇත. මෙම වැඩපිළිවෙළ දේශසීමා හරහා සිදුවන සංචාරක කර්මාන්තය නංවාලන අතර, ගෝලීය වශයෙන් කලාපයේ තරඟකාරීත්වය ශක්තිමත් කරනු ඇති බවට අල් මාරි මහතා විශ්වාසය පළ කළේය.
(ගල්ෆ් නිවුස් ඇසුරිනි)
Comments
Post a Comment
Your comment will be visible after approval