"සබ්වේ සර්ෆින්" රැල්ලක් නිසා නිව්යොර්ක්හි තරුණියන් දෙන්නෙකු දුම්රිය වහල මත මරුට

 නිව් යෝර්ක් නගරයේ තරුණයින් අතර ප්‍රචලිත අතිශය අවදානම් ක්‍රියාවක් වන "සබ්වේ සර්ෆින්" (Subway Surfing) හේතුවෙන් නව යොවුන් වියේ දැරියන් දෙදෙනෙකු ජීවිතක්ෂයට පත්ව ඇත. එක් දැරියකගේ වයස අවුරුදු 13ක් බව හඳුනාගෙන ඇති අතර, මෙම ඛේදජනක සිදුවීම වාර්තා වන්නේ නිව් යෝර්ක් නුවර බෘක්ලින් හි මාර්සි ඇවනියු බ්‍රෝඩ්වේ දුම්රිය ස්ථානයෙනි.

ඊයේ (4) සෙනසුරාදා අලුයම 3.10ට පමණ දුම්රියක වහලය මත වැටී සිටි මෙම දැරියන් දෙදෙනාගේ සිරුරු සොයාගෙන ඇති අතර, එම ස්ථානයට පැමිණි පොලිසිය ඔවුන් දෙදෙනාම එම අවස්ථාවේදීම මියගොස් ඇති බවට තහවුරු කර තිබේ. දුම්රිය මැදිරි තුළ ආරක්ෂිතව ගමන් කරනවා වෙනුවට, දුම්රියන්හි වහල මතට නැගී ගමන් කිරීම මෙම "සබ්වේ සර්ෆින්" නමැති භයානක ප්‍රවණතාවයේ ස්වභාවයයි.

සිද්ධිය ඇසින් දුටුවන් පවසා ඇත්තේ, මියගිය දැරියන් දෙදෙනා තවත් යෞවනයින් 15 දෙනෙකුගෙන් පමණ සමන්විත කණ්ඩායමක් සමග දුම්රිය මැදිරි තුළ දුව පනිමින් සිටිනු දුටු බවයි.

මෙම සිදුවීමෙන් අනතුරුව ඔවුන්ගේ සිරුරු දුම්රිය වහලය මත තිබී හමුවී තිබේ. නිව් යෝර්ක් නගරයේ සංක්‍රමණ සේවයේ සභාපති ඩිමෙට්‍රියස් ක්‍රිච්ලෝ මහතා මේ සම්බන්ධයෙන් අදහස් දක්වමින් කියා සිටියේ, "දුම්රියක් මත නැගී ගමන් කිරීම පිළිගත හැකි ක්‍රීඩාවක් ලෙස සිතීම නිසා තරුණියන් දෙදෙනෙකුගේ ජීවිත අහිමි වීම හද කම්පා කරවන සුළුයි. මෙය 'සර්ෆින්' ක්‍රීඩාවක් නොව සියදිවි නසා ගැනීමක් බව දෙමාපියන්, ගුරුවරුන් සහ මිතුරන් තම ආදරණීයයන්ට පැහැදිලිව අවබෝධ කර දිය යුතුයි."

මෙම මරණත් සමග මෙම වසරේදී පමණක් "සබ්වේ සර්ෆින්" හේතුවෙන් මියගිය සංඛ්‍යාව පහ දක්වා ඉහළ ගොස් තිබේ. පොලිසිය අනෙක් දැරියගේ වයස අවුරුදු 13ත් 18ත් අතර පසුවන්නියක බව තහවුරු කර ඇති අතර, සිද්ධිය සම්බන්ධයෙන් දුම්රිය ස්ථානයෙන් පිටතදී යොවුන් පිරිමි ළමුන් තිදෙනෙකුගෙන් ප්‍රශ්න කර ඉන් දෙදෙනෙකු වැඩිදුර විමර්ශන සඳහා රැගෙන ගොස් ඇත. විමර්ශකයින් ප්ලාස්ටික් බෑග් සහ ස්කේට්බෝඩ් එකක් දුම්රිය ස්ථානයෙන් පිටතට ගෙන එනු දක්නට ලැබුණ ද ඒවා මෙම සිදුවීමට අදාළද යන්න මෙතෙක් තහවුරු වී නොමැත.

පසුගිය ජූලි මාසයේදී, 15 හැවිරිදි කාලෝස් ඔලිවර් නමැති යෞවනයෙකු ද ක්වීන්ස්බොරෝ ප්ලාසා දුම්රිය ස්ථානයට ඇතුළු වෙමින් තිබූ දුම්රියක වහලයෙන් ඇද වැටී මියගියේය. එමෙන්ම, මාර්තු මාසයේදී 12 හැවිරිදි ගුස්ටාවෝ ගුආමන්-ක්විෂ්පිලේමා නමැති දරුවෙකු දුම්රියකින් ඇද වැටී ලැබූ මාරාන්තික තුවාල හේතුවෙන් දින හතරකට පසු රෝහල්ගතව මිය ගියේය. පසුගිය වසරේදී මෙම අවදානම් ක්‍රියාව හේතුවෙන් පුද්ගලයින් හය දෙනෙකු මියගොස් ඇති අතර, 2023 වසරේදී මරණ පහක් වාර්තා වී තිබිණි.