සම්මානලාභී සිනමා නිළි ඩයන් කීටන් සමුගනී

 ඔස්කාර් සම්මානලාභී සිනමා තාරකාවක් වන ඩයන් කීටන් සිය 79 වන වියේදී කැලිෆෝනියාවේදී අභාවප්‍රාප්ත වී තිබේ. 'ඇනී හෝල්' සහ 'ද ගෝඩ්ෆාදර්' වැනි සම්භාව්‍ය චිත්‍රපට හරහා දශක පහකට අධික කාලයක් පුරා ලොව පුරා සිනමා ලෝලීන්ගේ ආදරයට පාත්‍ර වූ ඇයගේ මරණය හොලිවුඩයට මෙන්ම ගෝලීය සිනමා කර්මාන්තයට ද දැඩි කම්පනයක් ඇති කර තිබේ.

'පීපල්' සඟරාව විසින් ඇයගේ වියෝව තහවුරු කර ඇති අතරම වාර්තා කර තිබුණේ හේතුව අනාවරණය නොවන බවයි. පසුගිය මාස කිහිපය තුළ කීටන්ගේ සෞඛ්‍ය තත්ත්වය "ඉතා හදිසියේ" පිරිහී ගිය බවත්, ඇගේ බොහෝ මිතුරන් පවා "සිදුවන්නේ කුමක්ද යන්න පිළිබඳව සම්පූර්ණයෙන්ම දැනුවත් නොවූ" බවත්ය.

1977 දී 'ඇනී හෝල්' චිත්‍රපටයේ රංගනය වෙනුවෙන් හොඳම නිළියට හිමි ඔස්කාර් සම්මානය දිනා ගැනීමත් සමග ඇය සිනමාවේ නොමැකෙන සලකුණක් බවට පත් වූවාය. ඇයගේ හිටපු පෙම්වතා වූ වුඩී ඇලන් විසින් අධ්‍යක්ෂණය කරන ලද එම චිත්‍රපටය බොහෝ දුරට ඇයගේම ජීවිතය මත පදනම් වූවකි. ෆ්‍රැන්සිස් ෆෝඩ් කොපෝලාගේ 'ද ගෝඩ්ෆාදර්' චිත්‍රපට මාලාවේ මයිකල් කෝලියෝන්ගේ බිරිඳගේ චරිතය ඇගේ සිනමා දිවියේ තවත් සුවිශේෂී සන්ධිස්ථානයකි. 'රෙඩ්ස්' (1981), 'මාර්වින්ස් රූම්' (1996) සහ 'සම්තින්ග්ස් ගෝටා ගිව්' (2003) යන චිත්‍රපටවල රංගනයන් සඳහා ද ඇය ඔස්කාර් සම්මානය සඳහා නිර්දේශ වූවාය.

තොප්පි, ගෙල ආවරණය කළ ඇඳුම් සහ පුළුල් කලිසම් වැනි ඇයගේ අනන්‍ය ඇඳුම් විලාසිතාව මෙන්ම, තමා ගැනම උත්ප්‍රාසයෙන් කතා කිරීමේ හැකියාව සහ හාස්‍ය රංගන කුසලතාව ඇයව අන්‍යයන්ගෙන් සුවිශේෂී කළේය. 'බේබි බූම්', 'ෆාදර් ඔෆ් ද බ්‍රයිඩ්' සහ 'ද ෆස්ට් වයිව්ස් ක්ලබ්' වැනි අතිශය ජනප්‍රිය ප්‍රහසන චිත්‍රපට රැසකට ඇය දායක වූවාය. ඇයගේ අවසන් චිත්‍රපටයක් වනු ඇතැයි සැලකෙන්නේ 2023 දී නිකුත් වූ 'බුක් ක්ලබ්: ද නෙක්ස්ට් චැප්ටර්' ය.

පෞද්ගලික ජීවිතයේදී ඇය ඩෙක්ස්ටර් නම් දියණියක් සහ ඩියුක් නම් පුතෙකු දරුකමට හදා ගත්තාය. "මාතෘත්වය මා සම්පූර්ණයෙන්ම වෙනස් කළා. එය මා මෙතෙක් ලැබූ වඩාත්ම නිහතමානී අත්දැකීමයි," ඇය වරක් පැවසුවාය. අල්ෂයිමර් රෝගයෙන් පෙළුණු තම මව සහ මානසික සෞඛ්‍ය ගැටලුවලින් පීඩා විඳි සහෝදරයා වෙනුවෙන් ඇය කැපවීමෙන් කටයුතු කළාය. 2017 දී ඇමරිකානු චිත්‍රපට ආයතනය විසින් ඇයට ජීවිතයේ එක් වරක් පිදෙන සම්මානයක් පිරිනමන ලදී. ඇයගේ බාල සහෝදරියන් දෙදෙනා වන ඩොරී සහ රොබින් ද, දරුවන් දෙදෙනා වන 29 හැවිරිදි ඩෙක්ස්ටර් සහ 25 හැවිරිදි ඩියුක් ද ඇයගේ වියෝවෙන් ශෝකයට පත්ව සිටිති.