රගසා සුළි කුණාටුව මැද දරුවෙකු සමග සෙල්ෆි ගහන්න ගිය ශ්‍රී ලාංකික කත අත්අඩංගුවට

හොංකොංහි ව්‍යසනකාරී ලෙස මතුව තිබෙන රගසා සුළි කුණාටුව අතරතුර කුඩා දරුවෙකුගේ ජීවිතය බරපතළ අනතුරකට ලක් කිරීමේ සිදුවීමක් සම්බන්ධයෙන් ඉන්දීය සහ ශ්‍රී ලාංකික කාන්තාවන් දෙදෙනෙකු හොංකොං පොලීසිය විසින් අත්අඩංගුවට ගෙන තිබේ. මෙම අත්අඩංගුවට ගැනීම සිදුව ඇත්තේ, කුණාටුව අතරතුර සිදුවූ තවත් ඛේදවාචකයකින් මවක් සහ දරුවෙකු දිවි මරණ අතර සටනක නිරතව සිටින පසුබිමක, වගකීම් විරහිත හැසිරීම් සම්බන්ධයෙන් මහජනතාවගෙන් දැඩි කෝපයක් එල්ල වෙමින් පවතින වාතාවරණයක් තුළය.

නගරයට අංක 10 දරන ඉහළ මට්ටමේ සුළි කුණාටු අනතුරු ඇඟවීම නිකුත් කර තිබියදී, අඟහරුවාදා පස්වරුවේ ඇප් ලෙයි චාවු හි සවුත් හොරයිසන්ස් වත්ත ආසන්නයේ වූ මුහුදු තීරයේදී මෙම කනගාටුදායක සිදුවීම වාර්තා විය. එහිදී මෙම කාන්තාවන් දෙදෙනා කුඩා පිරිමි දරුවෙකු ද සමඟ අනාරක්ෂිත වෙරළ තීරයට ගොස් ඇති අතර, එක් කාන්තාවක් දරුවා වඩාගෙන සිටින විට අනෙක් තැනැත්තිය ජංගම දුරකථනයකින් වීඩියෝවක් පටිගත කරන අයුරු සමාජ මාධ්‍යවල සංසරණය වූ කම්පන සහගත දර්ශනවල දැක්විණි.



එක්වරම මීටර් කිහිපයක් උසැති දැවැන්ත රළ පහරක් මුහුදු බැම්ම ඉක්මවා පැමිණීමත් සමඟ තත්ත්වය දරුණු අතට හැරුණි. එම ප්‍රබල ජල පහරින් ඔවුන් තිදෙනාම මුළුමනින්ම යටවී, බාධකයෙන් ඔබ්බට වූ පදික වේදිකාව මතට ගසාගෙන යන ලද අතර, ජලය ඔවුන් මතින් කඩා වැටෙන විට නැගෙන කෑගැසීමේ ශබ්දය ද වීඩියෝවේ ඇසිණි. ආශ්චර්යයකට මෙන්, තිදෙනාම තෙතබරිතව හා දැඩි කම්පනයට පත්ව සිටියද, බරපතළ ශාරීරික හානිවලින් තොරව නැවත නැගී සිටීමට සමත් විය.

බටහිර දිස්ත්‍රික් අපරාධ ඒකකයේ අධිකාරී චියුන්ග් වයි-ෂාන් මහත්මිය ප්‍රකාශ කළේ අන්තර්ජාලයේ පළවූ දර්ශන අනුව, පුළුල් CCTV සාක්ෂි උපයෝගී කරගනිමින් පුළුල් විමර්ශනයක් දියත් කළ බවයි. එම විමර්ශනවල ප්‍රතිඵලයක් ලෙස සැකකාරියන් දෙදෙනෙකු හඳුනාගෙන එදිනම පස්වරුවේ ඔවුන් අත්අඩංගුවට ගත් බවද ඇය සඳහන් කළාය.

අත්අඩංගුවට පත් වූවන් හොංකොං හැඳුනුම්පත් හිමි 32 හැවිරිදි ශ්‍රී ලාංකික කාන්තාවක් සහ 36 හැවිරිදි ඉන්දීය ජාතික කාන්තාවක් බව හඳුනාගෙන තිබේ. ඔවුන්ගෙන් එක් අයෙකු දරුවාගේ මව වන අතර අනෙක් තැනැත්තිය පවුලේ මිතුරියක් බව පොලීසිය තහවුරු කළේය. දරුවාගේ අත් සහ පාදවල සීරීම් තුවාල දක්නට ලැබුණු අතර ඔහුව රෝහල් ගත කර පරීක්ෂාවට ලක් කර ඇත. කාන්තාවන් දෙදෙනා වැඩිදුර ප්‍රශ්න කිරීම් සඳහා පොලිස් භාරයේ රඳවා සිටිති.

මෙම අවදානම් ක්‍රියාව වාර්තා වන්නේ, මීට දිනකට පෙර චායි වාන් හිදී රළ නැරඹීමට ගිය තවත් පිරිසක් අනතුරකට ලක්වූ සිදුවීමකින් අනතුරුවය. එහිදී, චායි වාන් මුහුදු කඩනය අසලදී 38 හැවිරිදි මවක් සහ ඇගේ පස් හැවිරිදි පුත්‍රයා විශාල රළ පහරකට හසුව මුහුදට ගසාගෙන ගොස් තිබිණි. ඔවුන් බේරාගැනීමට 40 හැවිරිදි සැමියා සහ පියා දියට පැන ඇති අතර, පසුව හදිසි සේවා මගින් තිදෙනාම ගොඩගෙන රෝහල් ගත කෙරිණි.

එම සිදුවීමෙන් මව සහ පුත්‍රයාගේ තත්ත්වය අසාධ්‍ය බව මුලින් වාර්තා විය.

මෙම සිදුවීම දැක්වෙන වීඩියෝව අන්තර්ජාලය තුළ ක්ෂණිකව දැඩි විවේචනයකට ලක්වූ අතර, මහජනතාව සිය කෝපය සහ අප්‍රසාදය පළ කළහ. බොහෝ දෙනා මෙම ක්‍රියාව "සම්පූර්ණයෙන්ම වගකීම් විරහිත" බවත්, "නිල ආරක්ෂක අනතුරු ඇඟවීම් උල්ලංඝනය කිරීමක්" බවත් පෙන්වා දුන්හ. තත්ත්වය නරක අතට හැරුණේ නම්, අනතුරුදායක මුදාගැනීමේ මෙහෙයුමක නිරත වීමට සිදුවන හදිසි සේවා නිලධාරීන්ගේ ජීවිත ද අනවශ්‍ය අවදානමක හෙළීමක් බවට පොදු මතයක් ගොඩනැගී තිබිණි. අයහපත් කාලගුණ අනතුරු ඇඟවීම් නොසලකා හරින්නන් ඛේදවාචකයකට මුහුණ දුනහොත් "සමාව ලැබීමට නුසුදුසු" බවට වූ අදහසක්, "ගලවා ගැනීමේ නිලධාරීන්ගේ ජීවිත ද වටිනවා" යනුවෙන් පළවූ එක් අන්තර්ජාල සටහනකින් ද ප්‍රතිරාවය විය.

ටයිෆූන් කුණාටුවට පෙර රජය විසින් විවිධ මාධ්‍ය ඔස්සේ මුහුදු වෙරළට නොයන ලෙස මහජනතාවට නැවත නැවතත් අනතුරු ඇඟවීම් නිකුත් කළ බව පොලිස් අධිකාරී චියුන්ග් මහත්මිය අවධාරණය කළාය. එම උපදෙස් නොසලකා හරිමින් ඇතැම් පුද්ගලයින් තමන් සහ අන් අයව දැඩි අනතුරකට ලක් කර ඇති බව ඇය පැවසුවාය. දෙමව්පියෙකු දැන දැනම දරුවෙකුගේ ආරක්ෂාව අනතුරේ හෙලීම විශේෂයෙන්ම වගකීම් විරහිත ක්‍රියාවක් බවත්, එවැනි හැසිරීම් "දරුවෙකු රැකබලා ගැනීමේදී නොසැලකිලිමත් වීම" යටතේ වරදක් විය හැකි බවත්, ඒ සඳහා උපරිම දඬුවම වසර 10ක සිර දඬුවමක් බවත් ඇය වැඩිදුරටත් කියා සිටියාය.
(dimsumdaily ඇසුරිනි)