පොළොන්නරුව පූජා භූමිය සහ ඒ අවට ප්රදේශවල වඳුරන් හා රිළවුන් අතර 'සිපිලිස්' නම් ලිංගාශ්රිත රෝගය සීඝ්රයෙන් ව්යාප්ත වෙමින් පවතින බව නැඟෙනහිර පළාත් සෞඛ්ය කළමනාකරණ ඒකකයේ පශු වෛද්ය නිලධාර් නිහාල් පුෂ්පකුමාර මහතා අනාවරණය කරයි. පසුගිය වසරවලට සාපේක්ෂව මෙම වසරේදී රෝගයේ පැතිරීම သိသာ ලෙස ඉහළ ගොස් ඇති බව විද්යාත්මක පරීක්ෂණ මගින් තහවුරු වී තිබේ.
පසුගිය වසර තුනක කාලය තුළ සතුන්ගෙන් ලබාගත් ජෛව සාම්පල 160කට අධික ප්රමාණයක් යොදාගෙන සිදුකළ පර්යේෂණවලදී, මෙම වසරේ ලබාගත් සාම්පල බහුතරයකින් රෝගය ආසාදනය වී ඇති බවට හඳුනාගෙන ඇත.
එක් වඳුරු රංචුවකින් ලබාගත් සාම්පල පහකින් හතරක්ම ආසාදිත මට්ටමක පැවතීම රෝගයේ ව්යාප්තියේ බරපතලකම පෙන්නුම් කරන බව වෛද්යවරයා පෙන්වා දෙයි. පොළොන්නරුවට අමතරව 2023 වසරේදී අම්පාරෙන්ද, 2024 වසරේදී ත්රිකුණාමලයෙන්ද මෙම බැක්ටීරියාව ආසාදනය වූ සතුන් හමුවී ඇති අතර මැදිරිගිරිය ප්රදේශයේද රෝග ලක්ෂණ සහිත සතුන් නිරීක්ෂණය වී තිබේ.
ක්ෂණික ප්රතිදේහ පරීක්ෂණ කට්ටල මගින් මූලිකව හඳුනාගැනීමෙන් අනතුරුව රසායනාගාර පරීක්ෂණ සඳහා යොමු කිරීමෙන් මෙම තත්ත්වය තහවුරු කරගෙන ඇත. සතුන් අතර පැතිර යන මෙම රෝග කාරකය මිනිසුන්ට වැළඳෙන ප්රභේදයමද, නැතහොත් වෙනස් ප්රභේදයක්ද යන්න හඳුනාගැනීම සඳහා ඉදිරියේදී PCR පරීක්ෂණ සිදු කිරීමට නියමිතය. එමෙන්ම පේරාදෙණිය විශ්වවිද්යාලය හා එක්ව මෙම සාම්පල වැඩිදුර අධ්යයනය සඳහා විදේශීය රසායනාගාර වෙත යොමු කිරීමටද පියවර ගෙන තිබේ.
මෙම රෝගය ආසාදිත සතුන් මිනිසුන් ගැවසෙන පොළොන්නරුව පූජා භූමි පරිශ්රයේ බහුලව සැරිසරන බැවින් මිනිසුන්ට රෝගය සම්ප්රේෂණය වීමේ ඉහළ අවදානමක් පවතින බවට පශු වෛද්යවරයා අනතුරු අඟවයි. ආසාදිත සතුන්ගේ ලිංගික ප්රදේශ ආශ්රිත තුවාලවලින් නිකුත් වන ශ්රාවයන්, බැතිමතුන් අසුන් ගන්නා බංකු, ගල්තලා සහ තාප්ප වැනි ස්ථානවල තැවරිය හැකි බව ඔහු පෙන්වා දෙයි. සමෙහි පවතින ඉතා කුඩා සීරීමකින් වුවද එම ශ්රාවයන් ශරීරගත වී රෝගය වැළඳිය හැකි බැවින්, එම පරිශ්රවල ගැවසෙන ජනතාව වඩාත් සැලකිලිමත් විය යුතු බවට අවධාරණය කෙරේ.
පර්යේෂණ සඳහා අල්ලා ගන්නා ලද රෝගී සතුන්ට ප්රතිජීවක ඖෂධ ලබා දී නැවත ඔවුන්ගේ රංචු වෙතම මුදා හැරීමට පියවර ගෙන ඇති නමුත්, රෝග ව්යාප්තිය පාලනය කිරීම සඳහා අනෙකුත් සතුන්ට ඖෂධ ලබා දීමේ පුළුල් වැඩපිළිවෙළක් මෙතෙක් ක්රියාවට නංවා නොමැති බවද වෛද්ය නිහාල් පුෂ්පකුමාර මහතා වැඩිදුරටත් සඳහන් කළේය.
Comments
Post a Comment
Your comment will be visible after approval