මේ දිනවල ආසියානු කුසලාන විස්සයි20 තරග සඳහා අබුඩාබි වෙත ගොස් සිටින ශ්රී ලංකා තුන් ඉරියව් ක්රීඩක දුනිත් වෙල්ලාලගේ, සිය පියාණන් වන සුරංග වෙල්ලාලගේ මහතාගේ හදිසි අභාවය හේතුවෙන් අද උදෑසන නැවත දිවයිනට පැමිණියේය. කොළඹදී අභාවප්රාප්ත වූ ඒ මහතාගේ වියෝව සැලවීමත් සමග වෙල්ලාලගේ මෙසේ දිවයිනට පැමිණි අතර, කණ්ඩායම් කළමනාකරු මහින්ද හලංගොඩ මහතාද ඔහු සමග පැමිණ තිබේ.
බ්රහස්පතින්දා රාත්රියේ පැවති කාණ්ඩයේ තරගය අවසන් වූ විගස,
අබුඩාබිහි ක්රීඩක විවේකාගාරයේදී දුනිත් වෙල්ලාලගේ වෙත මෙම ශෝකජනක ආරංචිය ලැබී තිබුණි.
කණ්ඩායම් නිලධාරීන් පළමුව ඔහුට දැනුම් දී ඇත්තේ නිවසේ හදිසි රෝගී තත්ත්වයක් පිළිබඳව වන අතර, මිනිත්තු කිහිපයකට පසුව සිය පියාණන් මරණයට පත්ව ඇති බවට තහවුරු කර තිබේ. මෙම ආරංචිය ඇසීමෙන් කම්පනයට පත් ප්රධාන පුහුණුකරු සනත් ජයසූරිය මහතා කඳුළු සලන අයුරු දක්නට ලැබුණු අතර, පසුව ඔහු එම තරුණ ක්රීඩකයා සනසමින් කාලය ගත කළේය.
අනතුරුව කණ්ඩායම් හෝටලය වෙත ගිය වෙල්ලාලගේ, සිය ශෝකයට පත් පවුලේ සාමාජිකයන් සමග එක්වීම සඳහා අද අලුයම ගුවන් යානයකින් කොළඹ බලා පිටත්ව ආවේය. තරගාවලියේ තම කාණ්ඩයේ ප්රථම ස්ථානය තහවුරු කරමින් වැදගත් ජයග්රහණයක් වාර්තා කළද, ශ්රී ලංකා ක්රීඩකයෝ මෙම සිදුවීමෙන් දැඩි කම්පනයට පත්ව සිටියහ. ඔවුහු ජය සැමරීමක් වෙනුවට, ගාම්භීර නිහඬතාවයකින් ක්රීඩාංගණයෙන් පිටව ගියහ.
දුනිත් වෙල්ලාලගේගේ පියා සුරංග පාසල් ක්රිකට් ක්රීඩා කළ ක්රීඩකයෙකි.
Comments
Post a Comment
Your comment will be visible after approval