හිටපු ජනාධිපතිවරු සියලු දෙනාටම කොළඹින් ගෙවල් තිබෙන බව ද ඒ නිසා නිල නිවාස භාරදී ගමට යෑමේ අවශ්යතාවක් නැති බව ද කැබිනට් ප්රකාශක සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පැවසීය.
අමාත්යවරයා මේ බව පැවසුවේ රජයේ ප්රවෘත්ති දෙපාර්තමේන්තුවේදී ඊයේ (16) පැවති කැබිනට් තීරණ දැනුම් දීමේ මාධ්ය හමුවේදී ඉදිරිපත්වූ ප්රශ්න කිහිපයකට පිළිතුරු දෙමිනි. එහිදී මාධ්යවේදීන් විමසා සිටියේ, පාර්ලිමේන්තුවේ සම්මත කරගත් පනතට අනුව, හිටපු ජනාධිපතිවරු නිල නිවාස භාරදීම හා ඉන් පසු ඔවුන්ගේ දේශපාලන කටයුතු සිදු කරන ආකාරය පිළිබඳවය.
හිටපු ජනාධිපතිවරුන්ගෙන් කීප දෙනෙක්ම ඇමැතිවරයෙක්, අගමැතිවරයෙක්, ජනාධිපතිවරයෙක් හා හිටපු ජනාධිපතිවරයෙක් ලෙස ජනතා බදු මුදල් වැය කරමින් වසර තිහකට අධික කාලයක් රජයේ නිල නිවාසවල වාසය කර ඇති බව ද ඇමැතිවරයා පැවසුවේය.
එනිසා රජයේ නිල නිවාසවල ජීවත් වීම ඔවුන්ගේ ඇබ්බැහියක් බවට පත්ව ඇති බව ද කොළඹින් තමන්ගේම නිවාස තිබුණත් ඒවායේ වාසය කිරීමට නොයන්නේ ඒ නිසා බව ද අමාත්යවරයා සඳහන් කළේය. ඕනෑම විදේශීය රාජ්ය තාන්ත්රිකයකුට හෝ මෙරට පුද්ගලයකුට හෝ හිටපු ජනාධිපතිවරයෙක් මුණගැසීමට අවශ්ය නම්, ඔවුන්ගේ පෞද්ගලික නිවසට යෑමේ බාධාවක් නැති බව ද අමාත්ය නලින්ද ජයතිස්ස මහතා පැවසුවේය.
දැනටත් හිටපු ජනාධිපතිවරුන් වන රනිල් වික්රමසිංහ හා ගෝඨාභය රාජපක්ෂ මහත්වරුන් හමුවන්නේ ඒ ආකාරයට බව ද අමාත්යවරයා පෙන්වා දුන්නේය.
Comments
Post a Comment
Your comment will be visible after approval