පෘතුගාලයේ ලිස්බන් අගනුවර ප්රධාන සංචාරක ආකර්ෂණයක් වන වසර 140ක් පැරණි ග්ලෝරියා ෆිනිකියුලර් රථයක් අනතුරට ලක්වීමෙන් පුද්ගලයින් 15 දෙනෙකු මියයාමත් සමග මුළු පෘතුගාලයම දැඩි කම්පනයට පත්ව තිබේ.
සංචාරකයින් රැගෙන යන කුඩා ප්රමාණයේ දුම්රියක් වැනි මෙම ෆිනිකියුලර් සේවාව පවත්වාගෙන යන කැරිස් (Carris) සමාගම ප්රකාශයක් නිකුත් කරමින් කියා සිටියේ අවශ්ය සියලුම නඩත්තු කටයුතු, එනම් සිව් වාර්ෂික, ද්විවාර්ෂික මෙන්ම දෛනික, සතිපතා සහ මාසික පරීක්ෂාවන් නිසි පරිදි සිදුකර ඇති බවයි. කෙසේ වෙතත්, ඇසින් දුටු සාක්ෂිකරුවන්ගේ වාර්තා පෙන්වා දෙන්නේ කේබල් මගින් ක්රියාත්මක වන දුම්රියේ තිරිංග පද්ධතිය ක්රියා විරහිත වී ඇති බවත්,
එය අධික වේගයෙන් කඳු බෑවුම දිගේ පහළට ඇදී ගොස් ගොඩනැගිල්ලක ගැටී ඇති බවත්ය.
හදිසි සේවා අංශවලට අනුව තවත් පුද්ගලයින් 18 දෙනෙකු රෝහල් ගත කර ඇති අතර ඉන් පස් දෙනෙකුගේ තත්ත්වය බරපතල ය. අනතුර සිදු වූයේ සවස 6:05 ට පමණ වන අතර මියගිය අය අතර විදේශීය ජාතිකයන් ද සිටින බව බලධාරීන් ප්රකාශ කළද ඔවුන්ගේ ජාතීන් තවමත් තහවුරු කර නොමැත.
ලිස්බන් නගරාධිපති කාලෝස් මෝදාස් බදාදා රාත්රියේ රෝහල වෙත ගොස් තත්ත්වය නිරීක්ෂණය කළ අතර, මෙය "නගරය මුහුණ දුන් ඛේදජනක මොහොතක්" ලෙස හැඳින්වීය. පෘතුගාල රජය ජාතික ශෝක දිනයක් ප්රකාශයට පත් කර තිබේ. ජනාධිපති මාර්සෙලෝ රෙබෙලෝ ද සූසා මෙම ඛේදවාචකයෙන් විපතට පත් වූවන්ගේ පවුල් වෙත සිය ශෝකය සහ සහයෝගීතාව පළ කර ඇත.
පොලීසිය සහ අනෙකුත් හදිසි සේවා සේවකයින් පැය ගණනාවක් පුරා එම ස්ථානයේ රැඳී සිටි අතර, ෆිනිකියුලර් සේවාව පවත්වාගෙන යන සමාගම, ජාතික ප්රවාහන ආරක්ෂණ අධිකාරිය සහ අපරාධ පොලීසිය විසින් වෙන වෙනම පරීක්ෂණ ආරම්භ කර ඇත.
එක් සාක්ෂිකරුවෙකු පෘතුගීසි රූපවාහිනී නාලිකාවකට පවසා තිබුණේ ෆිනිකියුලරය "අතිශය වේගයෙන්" පහළට පැමිණි බවයි. "එය දරුණු බලයකින් ගොඩනැගිල්ලක ගැටී කාඩ්බෝඩ් පෙට්ටියක් මෙන් කඩා වැටුණා; එහි තිරිංග තිබුණේ නැහැ," යැයි ඇය පැවසුවාය.
කඳු සහිත ලිස්බන් නගරයේ ප්රවාහන පද්ධතියේ අත්යවශ්ය කොටසක් වන මෙම සංකේතාත්මක කහ පැහැති වාහන, පදිංචිකරුවන් මෙන්ම සංචාරකයින් අතරද අතිශයින් ජනප්රියය. අනතුරට ලක්වූ මෙම විශේෂිත ෆිනිකියුලරය, ලිස්බන් නගර මධ්යයේ පිහිටි චතුරශ්රයක සිට බයිරෝ අල්ටෝ නම් සුන්දර ප්රදේශය දක්වා මීටර් 275ක දුරක් ගමන් කරයි.
Comments
Post a Comment
Your comment will be visible after approval