පාණදුර ප්‍රදේශයේ ඝාතන දෙකකට සම්බන්ධ බවට චෝදනා ලැබ, අපරාධ පරීක්ෂණ දෙපාර්තමේන්තුව මගින් අත්අඩංගුවට ගෙන රත්නපුර පොලීසියට භාරදී තිබූ පාතාල සාමාජිකයෙකු පොලිස් සිර මැදිරියෙන් පලාගොස් තිබේ. මෙම සිදුවීම සම්බන්ධයෙන් රාජකාරියේ නිරතව සිටි පොලිස් සැරයන්වරුන් දෙදෙනෙකුගේ වැඩ තහනම් කිරීමට රත්නපුර සහකාර පොලිස් අධිකාරීවරයා නියෝග කර ඇත.
රත්නපුර, අංගම්මන පාරේ පදිංචි 35 හැවිරිදි මෙම සැකකරු, මැලේසියාවේ සිටින ප්‍රධාන පෙළේ මත්ද්‍රව්‍ය ජාවාරම්කරුවෙකු වන ‘පාණදුර නිලංග’ නැමැත්තාගේ සමීපතමයෙකු බවට හඳුනාගෙන තිබිණි. අදාළ ඝාතන සඳහා වෙඩික්කරු රැගෙන ගිය යතුරුපැදිය පැදවීම මොහු විසින් සිදුකර ඇති බවට විමර්ශනවලදී අනාවරණය වී ඇත. රත්නපුර මහේස්ත්‍රාත් අධිකරණයෙන් නිකුත් කර තිබූ වරෙන්තු දෙකක් මත අධිකරණයට ඉදිරිපත් කිරීම සඳහා, අපරාධ පරීක්ෂණ දෙපාර්තමේන්තුව විසින් පසුගිය 29 වනදා සැකකරුව රත්නපුර පොලීසියට භාර දී තිබිණි.
පසුගිය 30 වනදා උදෑසන, සිර මැදිරියේ සිටි අනෙකුත් රැඳවියන්ට වැසිකිළි යාමට අවශ්‍ය බව දැන්වීමෙන් පසු, රාජකාරියේ නිරත නිලධාරියා සිර මැදිරියේ දොර විවෘත කර ඔවුන්ව පිටතට ගෙන ඇත. එම අවස්ථාවේදී සිර මැදිරියේ දොර නැවත අගුලු ලෑමට නිලධාරියාට අතපසු වී තිබේ.
නිලධාරියාගේ අවධානය වැසිකිළිය වෙත ගිය රැඳවියන් වෙත යොමුව තිබූ එම මොහොතෙන් ප්‍රයෝජන ගත් මෙම සැකකරු, විවෘතව තිබූ සිර මැදිරියෙන් පිටතට පැමිණ පළා ගොස් ඇති බව මූලික පරීක්ෂණවලදී හෙළිවී තිබේ.
පොලිස් ස්ථානයෙන් පිටතට ගොස් ඒ ආසන්නයේ පිහිටි සුපිරි වෙළෙඳසැල අසලින් සැකකරු අතුරුදන්ව ඇති අතර, ඔහුව සොයා මෙහෙයුම් ක්‍රියාත්මකයි.
Comments
Post a Comment
Your comment will be visible after approval