නව අග්‍රාමාත්‍යවරයෙකු පත් කිරීමට සූදානමක් ඇති බවට සමාජ මාධ්‍ය ඔස්සේ පැතිර යන වාර්තා, අග්‍රාමාත්‍ය හරිනි අමරසූරිය මහත්මිය තරයේ ප්‍රතික්ෂේප කරයි. ස්වාධීන රූපවාහිනී නාලිකාව සමඟ පැවති සාකච්ඡාවකට එක්වෙමින් ඇය මේ බව සඳහන් කළාය.
තමන්ව අගමැති තනතුරෙන් ඉවත් කරන බවට වන පුවත තමා ද දැනගත්තේ සමාජ මාධ්‍ය හරහා බව අග්‍රාමාත්‍යවරිය සඳහන් කළාය. තමන් පාර්ලිමේන්තුවට තේරී පත් වූ දා සිටම, ජාතික ජන බලවේගය සහ ජනතා විමුක්ති පෙරමුණ අතර අභ්‍යන්තර ගැටුම් පවතින බවට ඇතැම් පාර්ශ්ව අසත්‍ය ප්‍රචාර ගොඩනගමින් සිටින බවත්, මෙම නවතම වාර්තාවද එම උත්සාහයේම තවත් එක් දිගුවක් පමණක් බවත් ඇය වැඩිදුරටත් පෙන්වා දුන්නාය.
ජනතා විමුක්ති පෙරමුණ සහ ජාතික ජන බලවේගය යනු දෙකක් නොව එකම දේශපාලන ව්‍යාපාරයක් බව අවධාරණය කළ අග්‍රාමාත්‍යවරිය, තම කණ්ඩායම තුළ කිසිදු ආකාරයක බෙදීමක් නොමැති බවට ද ස්ථිරව ප්‍රකාශ කර සිටියාය.
Comments
Post a Comment
Your comment will be visible after approval