a-person-was-caught-with-8-ids-during-a-search-prior-to-the-kandy-perahera

 මහනුවර ඇසළ පෙරහැර මංගල්‍යය නිමිත්තෙන් ක්‍රියාත්මක විශේෂ සෝදිසි මෙහෙයුමකදී, ජාතික හැඳුනුම්පත් අටක් සන්තකයේ තබාගත් පුද්ගලයෙකු අත්අඩංගුවට ගෙන ඇති බව පොලිසිය පවසයි. සැකකරු විසින් මහනුවර ඩී. එස්. සේනානායක වීදියේ පවත්වාගෙන යනු ලබන සන්නිවේදන මධ්‍යස්ථානයක් තුළ තිබී මෙම හැඳුනුම්පත් සොයාගෙන තිබේ.





මහනුවර කොට්ඨාස භාර ජ්‍යෙෂ්ඨ පොලිස් අධිකාරී අනුරුද්ධ බණ්ඩාරනායක මහතා මෙම තොරතුරු අනාවරණය කළේ, ඊයේ (04) මහනුවර පොලිස් මූලස්ථානයේ පැවති මාධ්‍ය හමුවක් අමතමිනි. සැකකරුගෙන් සිදුකළ ප්‍රශ්න කිරීම්වලදී, සේවා ලබාගැනීම සඳහා පැමිණි පාරිභෝගිකයින් විසින් මෙම හැඳුනුම්පත් අමතක කර දමා ගොස් තිබූ බවට ඔහු ප්‍රකාශ කර ඇත. කෙසේ වෙතත්, එම ප්‍රකාශය සම්බන්ධයෙන් වැඩිදුර විමර්ශන ක්‍රියාත්මක බව ජ්‍යෙෂ්ඨ පොලිස් අධිකාරීවරයා සඳහන් කළේය.

ඉදිරි දිනවලදී ආරම්භ වීමට නියමිත රන්දෝලි පෙරහැර නැරඹීම සඳහා පැමිණෙන ජනතාවගේ විශාල වර්ධනයක් අපේක්ෂා කරන බවද බණ්ඩාරනායක මහතා මෙහිදී පෙන්වා දුන්නේය. ඒ හේතුවෙන්, පෙරහැර රාජකාරි සඳහා අතිරේකව තවත් පොලිස් නිලධාරීන් 500 දෙනෙකු යෙදවීමට සැලසුම් කර තිබේ.



ඒ අනුව, මෙවර ඇසළ මංගල්‍යයේ ආරක්ෂක කටයුතු සඳහා යොදවා ඇති මුළු පොලිස් නිලධාරීන් සංඛ්‍යාව 6,000 දක්වා ඉහළ යන අතර, ඔවුන් සියලු දෙනා කැපවීමෙන් තම රාජකාරිය ඉටුකරමින් සිටින බවද ඔහු වැඩිදුරටත් පැවසීය.