යතුරුපැදියක ලියාපදිංචි සහතිකය සංශෝධනය කර දීම සඳහා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරියෙකුගෙන්ම රුපියල් 30,000ක අල්ලසක් ඉල්ලා සිටි තැරැව්කරුවෙකු අත්අඩංගුවට ගෙන තිබේ. සැකකරු පසුව අධිකරණයට ඉදිරිපත් කිරීමෙන් අනතුරුව අගෝස්තු 05 වන දා දක්වා රක්ෂිත බන්ධනාගාරගත කර ඇත.
නාරාහේන්පිට මෝටර් රථ ප්‍රවාහන දෙපාර්තමේන්තුව ආශ්‍රිතව ගැවසෙන ‘කාක්කන්’ ලෙස හඳුන්වන තැරැව්කරුවන්,
සේවා ලබාගැනීමට පැමිණෙන ජනතාවගෙන් අල්ලස් ලබාගන්නා බවට අල්ලස් කොමිසමට නිර්නාමික පැමිණිල්ලක් ලැබී තිබිණි. එම පැමිණිල්ලට අනුව ක්‍රියාත්මක වූ කොමිසම, සිය නිලධාරියෙකු උපාය දූතයෙකු ලෙස යොදවා මෙම වැටලීම සිදුකර ඇත.
සේවාලාභියෙකු ලෙස පෙනී සිටි අල්ලස් කොමිසමේ නිලධාරියා, යතුරුපැදි පොතක් සංශෝධනය කරගැනීමට අවශ්‍ය බව දැන්වූ අවස්ථාවේදී, සැකකාර තැරැව්කරු එම කාර්යය ඉටුකර දීමට රුපියල් 30,000ක මුදලක් ඉල්ලා තිබේ. පසුව,
එම මුදලින් රුපියල් 10,000ක අත්තිකාරම් මුදලක් ආසන්නයේ පිහිටි ආපනශාලාවකදී ලබාගන්නා අවස්ථාවේදී නිලධාරීන් විසින් සැකකරු අත්අඩංගුවට ගෙන ඇත.
එම්. පී. උපාලි පෙරේරා නැමැති මෙම සැකකරු කොළඹ ප්‍රධාන මහේස්ත්‍රාත් තනූජා ලක්මාලි ජයතුංග මහත්මිය වෙත පසුගිය 28 වනදා ඉදිරිපත් කිරීමෙන් අනතුරුව රක්ෂිත බන්ධනාගාරගත කිරීමට නියෝග කෙරිණි. සිද්ධිය සම්බන්ධයෙන් විමර්ශන අවසන් නැති බව අල්ලස් කොමිසම අධිකරණයට දන්වා සිටියේය.
Comments
Post a Comment
Your comment will be visible after approval