උපත්පාලන ලූපය ඉවත්කරද්දී අතවර කළ දොස්තර වසර 15ක් හිරේ

 තරුණ එක්දරු මවක සිය ශරීරය තුළ තැන්පත් කළ උපත් පාලන ලූපයක් ඉවත් කර ගැනීමට වෛද්‍ය මධ්‍යස්ථානයට ගිය අවස්ථාවේ එය ඉවත් කරන මුවාවෙන් දුෂණය කිරීමේ චෝදනාවට වරදකරු වූ වෛද්‍යවරයකුට වසර 15ක සිරදඬුවමක් නියම කළ අනුරාධපුර මහාධිකරණ විනිසුරු ආචාරිය නලීන් ද හේවාවසම් මහතා

පැමිණිලිකාරියට මුදලින් රුපියල් ලක්ෂ පහළොවක වන්දියක් ගෙවන ලෙස ද ඊයේ (11) නියෝග කළේය. එම වන්දි මුදල නොගෙවන්නේ නම් විත්තිකාර වෛද්‍යවරයාට තවත් වසර තුනක සිර දඬුවමක්ද නියම කරනු ලැබීය. වන්දියට අමතරව මුදලින් රුපියල් ලක්ෂයක දඩයක් ගෙවන ලෙස නියෝගය කළ විනිසුරු ආචාර්ය නලින්ද ද සේවාවසම් මහතා එම දඩ මුදල නොගෙවන්නේ නම් තවත් වසරක සිර දඬුවමක් ද නියම කෙරිණ.




විත්තිකාර වෛද්‍යවරයාට දඬුවම් නියම කරමින් අනුරාධපුර මහාධිකරණ විනිසුරු ආචාර්ය නලීන් ද හේවාවසම් මහතා පැවසුවේ විත්තිකාර වෛද්‍යවරයාට එරෙහිව පැමිණිල්ල නගා ඇති චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශවය සමත්ව ඇති බවයි. ඒ අනුව විත්තිකරුට එරෙහිව එල්ල කර තිබූ ස්ත්‍රී දුෂණ චෝදනාවට ඔහු වරදකරු බවට තීන්දු කරන බව ද මහාධිකරණ විනිසුරුවරයා පවසා සිටියේය. විත්තිකාර වෛද්‍යවරයාට මෙසේ දඬුවම් නියම කළේ මෙම අපරාධමය සිද්ධියට අදාළ නීති කෘත්‍ය අනුරාධපුර මහාධිකරණය හමුවේ යළි කැඳවූ අවස්ථාවේදීය. විත්තිකරුට දඬුවම් කියම කිරීමෙන් අනතුරුව විත්තිකාර වෛද්‍යවරයා වෙනුවෙන් පෙනී සිටි ජ්‍යෙෂ්ඨ

නීතිඥ කාලිංග රවින්දු මහතා අධිකරණය අමතමින් කියා සිටියේ මෙම නඩු තීන්දුව පිළිබදව තමා විස්මයට පත් වන බවයි. වසර 40 ක් රෝගීන් ලක්ෂ ගණනකට ප්‍රතිකාර කර ඇති සිය සේවාදායකයා මෙම වරද කර නොමැති බව ද නීතිඥවරයා අවධාරණය කළේය. 




මෙසේ බරපතළ වැඩ සහිත සිර දඬුවම් නියම වූයේ අනුරාධපුර තිසාවැව පදිංචි විජේකෝන් විජේරත්න නැමති 70 හැවිරිදි වෛද්‍යවරයකුටය. ඔහු මීට පෙර අනුරාධපුර පොලිසිය මගින් අත්අඩංගුවට ගෙන අනුරාධපුර මහේස්ත්‍රාත් අධිකරණයට ඉදිරිපත් කරන ලදුව පසුව ඇප මත මුදා හැර සිටියේය. විත්තිකරු අනුරාධපුර තිසාවැව ප්‍රදේශයේ පවත්වා ගෙන යන පෞපෞද්ගලික වෛද්‍ය මධ්‍යස්ථානයේ දී මෙම වරද කර ඇති බව අධිකරණ නඩු විභාගයේ දී අනාවරණය විය.

නීතිපතිවරයා විත්තිකරුට අධිචෝදනා ගොනු කිරීමෙන් අනතුරුව එම අධිචෝදනා අනුරාධපුර මහාධිකරණයේ දී රජයේ අධිනීතිඥ ලක්මාලි දිසානායක මහත්මිය ඔහුට කියවා බාර දුන් අවස්ථාවේ පැමිණිල්ල තමාට එරෙහිව එල්ල කර ඇති චෝදනාවට තමන් නිවැරැදිකරු බව විත්තිකාර වෛද්‍යවරයා සිය නීතිඥ කාලිංග රවින්දු මහතා මගින් මහාධිකරණයට දන්වීය.


මෙම නඩුවේ ලඝු නොවන මූලික විභාගය අනුරාධපුර මහේස්ත්‍රාත් අධිකරණය හමුවේ පැවැති අතර නීතිපතිවරයා විසින් 2025 වසරේ අප්‍රේල් 21 වැනිදා විත්තිකාර වෛද්‍යවරයාට එරෙහිව අධි චෝදනා ගොනු කිරීමෙන් අනතුරු වැඩිදුර විභාගය සදහා අනුරාධපුර මහාධිකරණයට යොමු කර කරනු ලැබීය.



පැමිණිල්ල වෙනුවෙන් නීතිපතිවරයා නියෝජනය කරමින් රජයේ අධිනීතිඥ ගිම්හානි හිරුණික පෙරේරා මහත්මිය සමග රජයේ අධිනීතිඥ ගීත්මී රණතුංග මහත්මිය විත්තිකාර වෛද්‍යවරයා වෙනුවෙන් ද ජ්‍යෙෂ්ඨ නීතිඥ කාලිංග රවින්දු මහතා ද පෙනී සිටියහ. විත්තිකාර වෛද්‍යවරයා කලක් අනුරාධපුර ශික්ෂණ රෝහලේ සහ රනවරාව රෝහලේ සේවය කර ඇත. මෙම නඩුවේ පැමිණිලිකාර 25 හැවිරිදි එක්දරු තරුණ මව තම ශරීරය තුළ තැන්පත් කර තිබූ උපත් පාලන ලූපය ඉවත් කර ගැනීමට විත්තිකාර වෛද්‍යවරයාගේ තිසාවැව ප්‍රදේශයේ පෞද්ගලික වෛද්‍ය මධ්‍යස්ථානයට පැමිණ විත්තිකාර වෛන්වරයා හමු වූ අවස්ථාවේ ලූපය ඉවත් කිරීමට වැඩි වේලාවක් ගත වන නිසා මදක් රැදී සිටින ලෙස තරුණ මවට දන්වා පසුව ප්‍රතිකාර ලබා ගැනීමට පැමිණ සිටි සියලු රෝගීන් පරික්ෂා කර ඔවුනට ප්‍රතිකාර ලබා දී පිටත් කර හැර ඇති බවත් අධිකරණ නඩු විභාගයේදී හෙළි විය. පසුව ලූපය ඉවත් කරන මුවාවෙන් ඇය දූෂණය කර ඇති බවත් අධිකරණ නඩු විභාගයේදී අනාවරණ විය.
(උපාලි ආනන්ද)