gossiplanka image 1

 ශ්‍රී ලංකා රේගුව භාරයේ රඳවාගෙන සිටින බී.වයි.ඩී. විදුලි වාහන 991ක් කොන්දේසි කීපයකට යටත්ව මුදාහැරීමට රේගු අධ්‍යක්ෂ ජනරාල්වරයා ඊයේ (07දා) පස්වරුවේ අභියාචනාධිකරණයට එකඟතාවය පළ කළේය.



අදාළ වාහනවල බදු අතර පවතින පරතරය ලෙස ගණනය කර තිබෙන රුපියල් බිලියන 3.6කට ආසන්න මුදල රාජ්‍ය බැංකුවක ඇපකරයක් ලෙස තැන්පත් කිරීමේ හා ඊට අදාළ පොලිය පෙත්සම්කාර ජෝන් කීල්ස් සමාගම විසින් ගෙවීමට එකඟවීමේ කොන්දේසිවලට යටත්ව එකී වාහන 991 මුදා හැරීමට රේගු අධ්‍යක්ෂ ජනරාල්වරයා එකඟ වග වන අතිරේක සොලිස්ටර් ජනරාල් ජනාධිපති නීතිඥ සුමති ධර්මවර්ධන මහතා අධිකරණයට පැවැසීය.



අදාළ වාහන රඳවා ගැනීමට ශ්‍රී ලංකා රේගුව ගෙන ඇති තීරණය අභියෝගයට ලක් කරමින් ජෝන් කීල්ස් සී.ජී. සමාගම විසින් ගොනුකර තිබූ පෙත්සමක් අභියාචනාධිකරණයේ සභාපති විනිසුරු රොහන්ත අබේසූරිය හා කේ. ප්‍රියන්ත ප්‍රනාන්දු යන මත්වරුන් හමුවේදී කැඳවිණි.

රේගු අධ්‍යක්ෂ ජනරාල්වරයා විසින් එකී වාහන කොන්දේසි කිහිපයකට යටත්ව මුදා හැරීමට සූදානම් බව අතිරේක සොලිසිටර් ජනරාල් සුමති ධර්මවර්ධන මහතා අධිකරණයට පැවැසීය. එකී කොන්දේසි අතරින් කිහිපයකට සිය සේවාදායකයා එකඟ වන බව පෙත්සම්කාර ජෝන් කීල්ස් සමාගම වෙනුවෙන් පෙනී සිටි ජනාධිපති නීතිඥ පර්සාන ජමීර් මහත්මිය අධිකරණයට පැවැසුවාය



එම වාහනවල මෝටරයේ ධාරිතාව කිලෝවොට් 100ද නැතහොත් කිලෝවොට් 150ක්ද යන කරුණ නිගමනය කිරීම සඳහා මොරටුව හා පේරාදෙණිය විශ්වවිද්‍යාලවල විශේෂඥ මහාචාර්යවරු දෙදෙනකු හා බී.වයි.ඩී. සමාගමේ ඉන්ජිනේරුවරුන් දෙදෙනකුගෙන් සමන්විත කමිටුවක් පත් කිරීමට පියවර ගෙන ඇති බවත් එකී පරීක්ෂණ සඳහා වාහන හයක් තබාගෙන සෙසු වාහන කොන්දේසි සහිතව මුදා හැරීමට රේගු අධ්‍යක්ෂ ජනරාල්වරයා එකඟ බවද අතිරේක සොලිසිටර් ජනරාල්වරයා අධිකරණයට වැඩිදුරටත් පැවැසීය.

ආනයනය කරනු ලැබූ එකී වාහන රේගුව මඟින් රදවා තබා ගැනීමට ගනු ලැබූ තීරණය සම්පූර්ණයෙන්ම නීතියට පටහැනි බවත් අදාළ වාහන බැඳුම්කරවලට යටත්ව මුදා  හැරීමේ හැකියාව  තිබියදීත් එලෙස මුදා නොහැරීමෙන් සිය සේවාදායකයාට අති විශාල මුදලක් නිකරුණේ වැය කිරීමට සිදුවී ඇති බවත් ජනාධිපති නීතිඥ පර්සානා ජමීර් මහත්මිය අධිකරණය හමුවේ



පවසා තිබිණි. එබැවින් එකී තීරණය බලරහිත කරන නියෝගයක් නිකුත් කරන ලෙස පෙත්සම මඟින් ඉල්ලා තිබිණි. ඊයේ (07දා) දිනය තුළම අදාළ බැංකු බැඳුම්කරය ඉදිරිපත් කරන්නේ නම් අදාළ වාහන 991 ලබන සෙනසුරාදා මුදා හැරීමේ හැකියාව ඇතැයිද පැවැසූ අතිරේක සොලිසිටර් ජනරාල්වරයා ඒ සම්බන්ධයෙන් සිදුකරන විමර්ශනවලට පෙත්සම්කාර සමාගම සිය සහාය ලබාදිය යුතු බවද පැවැසීය.

එකී බැංකු බැඳුම්කරය ඊයේ (07දා) දිනය ඇතුළත ඉදිරිපත් කිරීමට සූදානම් බව පෙත්සම්කරු වෙනුවෙන් පෙනී සිටි ජනාධිපති නීතිඥවරිය අධිකරණයට පැවැසුවාය. එම පෙත්සම ලබන සැප්තැම්බර් 3 වැනිදා යළි කැඳවීමට දින නියම කෙරිණි.