කොස්ගොඩ, හතරමංහන්දිය ප්රදේශයේදී ඊයේ (11) රාත්රීයේ යතුරුපැදියකින් පැමිණි නාඳුනන තුවක්කුකරුවන් දෙදෙනෙකු විසින් සිදුකළ වෙඩි ප්රහාරයකින් ත්රීරෝද රථ රියදුරෙකු බරපතල ලෙස තුවාල ලබා තිබේ. තුවාල ලැබූ රියදුරු වහාම බලපිටිය රෝහල වෙත ඇතුළත් කර ඇති බව කොස්ගොඩ පොලීසිය වාර්තා කරයි.
මෙලෙස වෙඩි ප්රහාරයට ලක්ව ඇත්තේ අහුන්ගල්ල ප්රදේශයේ පදිංචි 24 හැවිරිදි විවාහක තරුණයෙකි. මෙම කණගාටුදායක සිදුවීම වන අවස්ථාවේදී ඔහු සිය බිරිඳ සහ දරුවන් ද සමඟ ත්රීරෝද රථයෙන් ගමන් කරමින් සිට ඇති බවට තොරතුරු අනාවරණය වී තිබේ.
පොලීසිය සැක පළ කරන්නේ මෙම වෙඩි තැබීම අනන්යතාවය වරදවා වටහාගැනීමක් මත සිදුවූවක් විය හැකි බවයි. මීට වසරකට පමණ ඉහතදී, වෙඩි තැබීමට ලක්වූ පුද්ගලයාගේ සොහොයුරා වන 'බාලේ' නමින් හඳුන්වන පුද්ගලයාට ද මෙවැනිම වෙඩි ප්රහාරයක් එල්ල වූ අතර, ඔහු එම අවස්ථාවේදී තුවාල ලබා දිවි ගලවාගෙන තිබිණි.
එම ඉලක්කය වරදවා ගනිමින් ඔහුගේ සොහොයුරා වූ මෙම ත්රීරෝද රථ රියදුරාට වෙඩි තබන්නට ඇති බවට පොලීසිය මූලික වශයෙන් විශ්වාස කරයි. සිදුවීම සම්බන්ධයෙන් කොස්ගොඩ පොලීසිය විසින් පුළුල් විමර්ශනයක් ආරම්භ කර ඇත.
Comments
Post a Comment
Your comment will be visible after approval