පළාත් පාලන මැතිවරණය පැවැත්වීමෙන් අනතුරුව, දීර්ඝ කාලයක් පුරා කල්දැමී ඇති පළාත් සභා ඡන්ද විමසීමද කඩිනමින් සංවිධානය කිරීමට රජය අපේක්ෂා කරන බව රාජ්‍ය පරිපාලන, පළාත් සභා හා පළාත් පාලන අමාත්‍ය මහාචාර්ය චන්දන අබේරත්න මහතා ප්‍රකාශ කළේය.
මෙම ඡන්දය පැවැත්වීම සඳහා අවශ්‍ය වන නෛතික රාමුව සහ ප්‍රතිපාදන සම්පාදනය කිරීමෙන් පසු ඒ සඳහා දිනයක් ප්‍රකාශයට පත්කළ හැකි වනු ඇතැයි අමාත්‍යවරයා පෙන්වා දුන්නේය. විශේෂයෙන්ම, පළාත් සභා සඳහා නව සීමා නිර්ණ වාර්තාවක් සම්මත කර ගැනීමේ ගැටලුව වසර ගණනාවක් තිස්සේ නොවිසඳී පැවතීම
ඡන්දය කල්යාමට ප්‍රධාන හේතුවක් වී තිබේ.
ශ්‍රී ලංකාවේ පළාත් සභා බොහොමයක නිල කාලය අවසන් වී වසර කිහිපයක් ගතවී ඇති අතර, මේ වන විට එම ආයතන ආණ්ඩුකාරවරුන්ගේ විධායක බලය යටතේ පාලනය වේ. මෙම තත්ත්වය, බලය විමධ්‍යගත කිරීමේ මූලධර්මයට මෙන්ම ජනතා පරමාධිපත්‍යයටද අභියෝගයක් බවට විවිධ දේශපාලන පක්ෂ සහ සිවිල් සංවිධාන දිගින් දිගටම පෙන්වා දී ඇත.
කෙසේවුවද, මැතිවරණ කල් දැමීම තම රජයේ ප්‍රතිපත්තිය නොවන බව අවධාරණය කළ අමාත්‍ය මහාචාර්ය චන්දන අබේරත්න මහතා, එම ප්‍රතිපත්තියට අනුකූලව පළාත් සභා
මැතිවරණයද නියමිත ක්‍රියාපටිපාටියෙන් පසු පවත්වන බවට සහතිකයක් ලබා දුන්නේය. පළාත් පාලන මැතිවරණයද අවස්ථා කිහිපයකදී කල් දැමුණු පසුබිමක මෙම ප්‍රකාශය සිදු වීම විශේෂත්වයකි.
ඒ අනුව, පළාත් සභා ඡන්ද විමසීමේ ඉරණම තීරණය වනු ඇත්තේ අදාළ සීමා නිර්ණ වාර්තාව සම්බන්ධයෙන් පාර්ලිමේන්තුව තුළ එකඟතාවකට පැමිණ එය කඩිනමින් අනුමත කර ගැනීම මතය.
Comments
Post a Comment
Your comment will be visible after approval