අධිවේගී මාර්ග වැනි මහා පරිමාණ සංවර්ධන ව්යාපෘති සඳහා ටෙන්ඩර් ඉදිරිපත් කරන දේශීය පාර්ශ්ව, දේශීය රාජ්ය බැංකුවලින් ණය ලබාගැනීම වෙනුවට විදේශයන්ගෙන් අරමුදල් හෝ ණය සපයාගත යුතු බවට ජනාධිපති අනුර කුමාර දිසානායක මහතා සිය කැබිනට් මණ්ඩලය වෙත දැනුම් දී ඇතැයි වාර්තාවේ.
දේශීය කොන්ත්රාත්කරුවන් රාජ්ය බැංකු වලින් ණය ලබාගතහොත්, ග්රාමීය මාර්ග ව්යාපෘති වැනි අනෙකුත් සංවර්ධන කටයුතු සඳහා අවශ්ය අරමුදල් සැපයීම අඩාල විය හැකි බව ජනාධිපතිවරයා එහිදී පෙන්වා දී තිබේ.
මෙම නව උපදේශය නිකුත් වී ඇත්තේ, මධ්යම අධිවේගී මාර්ගයේ කඩවත සිට මීරිගම දක්වා වූ, කොටසක් නිමවා ඇති පළමු අදියරේ වැඩ අවසන් කිරීම සඳහා චීන රාජ්ය සමාගමක් වන මෙටලර්ජිකල් කෝපරේෂන් ඔෆ් චයිනා ලිමිටඩ් (MCC) සමගම ඉදිරියට යාමට රජය තීරණය කර ඇති පසුබිමකය.
අතරමග නැවතී ඇති මෙම ව්යාපෘතිය දේශීය ලංසුකරුවන් වෙත පැවරීමට මාර්ග සංවර්ධන අධිකාරිය මීට පෙර යෝජනා කර තිබුණද, කරුණු කිහිපයක් පදනම් කරගනිමින් චීන සමාගම සමගම ඉදිරියට යාමට රජය තීරණය කර ඇත.
නියෝජ්ය මහාමාර්ග අමාත්ය ප්රසන්න ගුණසේන මහතා පැවසුවේ, වෙනත් විකල්ප සලකා බැලීමේදී මතුවූ ප්රායෝගික අපහසුතා හේතුවෙන් චීන සමාගම සහ චීන එක්සිම් බැංකුවේ අරමුදල් යටතේම ව්යාපෘතිය කරගෙන යාමට රජය තීරණය කළ බවයි.
චීන එක්සිම් බැංකුවේ ණය ආධාරය ලබාගැනීම සඳහා, දැනටමත් ව්යාපෘතියට ගිවිසුම්ගතව සිටින MCC සමාගමම තෝරාගැනීම අත්යවශ්ය වූ බවත්, කෙසේ වෙතත් එම ණය සඳහා නව පොලී අනුපාතයක් ලබා ගැනීමට මෙන්ම ණය ආපසු ගෙවීමේ මුදල් ඒකකය ඇමරිකානු ඩොලර් වෙනුවට චීන මුදල් ඒකකයට වෙනස් කරගැනීමටද හැකිවූ බව ඔහු සඳහන් කළේය.
තවද, MCC සමාගම සමග කටයුතු කිරීමේදී නව උපකරණ මිලදී ගැනීමකින් තොරව දැනටමත් පවතින යන්ත්රෝපකරණ භාවිත කිරීමට මෙන්ම, පැරණි සැලසුමම යොදාගැනීමට හැකිවීම තවත් වාසියක් බවද ගුණසේන මහතා පැවසීය.
ශ්රී ලංකාව ණය ගෙවීම පැහැර හැරීමෙන් පසුව 2022 අප්රේල් මාසයේදී චීන එක්සිම් බැංකුව සියලුම ණය මුදල් නිකුත් කිරීම අත්හිටුවීමත් සමග මෙම ව්යාපෘතියේ කටයුතු ඇනහිටියේය. මේ වන විට ව්යාපෘතියේ ඉදිකරන ලද ඇතැම් කොටස් දිරාපත් වී කඩාවැටෙමින් පවතී.
ව්යාපෘතිය ප්රමාද වීම හේතුවෙන් සාමාන්යයෙන් රුපියල් මිලියන 20ක ප්රමාද ගාස්තුවක් එකතු වන බවද නියෝජ්ය අමාත්යවරයා හෙළි කළේය.
කිලෝමීටර් 37ක් වන කඩවත-මීරිගම කොටස සඳහා වූ ණය ගිවිසුම 2019 මාර්තු මාසයේදී අත්සන් තැබුණු අතර, කොන්ත්රාත් මිලෙන් 85%ක් ආවරණය කරමින් එහි වටිනාකම ඇමරිකානු ඩොලර් මිලියන 989ක් විය.
ලබන මාසයේදී මෙම ව්යාපෘතියේ වැඩකටයුතු යළි ආරම්භ කිරීමට රජය අපේක්ෂා කරයි.
Comments
Post a Comment
Your comment will be visible after approval