රන් T-56 නඩුවෙන් දුමින්ද නිදොස් කොට නිදහස්

 හැව්ලොක් ටවුන් ප්‍රදේශයේ සුඛෝපභෝගී නිවාස සංකීර්ණයකින් සොයාගත් රන් ආලේපිත ටී-56 වර්ගයේ ගිනි අවිය සම්බන්ධයෙන් පැවති නඩුවෙන් හිටපු අමාත්‍ය දුමින්ද දිසානායක මහතා මුදා හැරීමට ගල්කිස්ස මහේස්ත්‍රාත් අධිකරණය අද (29) නියෝග කළේය. 

අදාළ නඩුව අද දින ගල්කිස්ස මහේස්ත්‍රාත් චතුරිකා ද සිල්වා මහත්මිය හමුවේ කැඳවූ අවස්ථාවේදී මෙම තීරණය ප්‍රකාශයට පත් කරන ලදී. හිටපු අමාත්‍යවරයා ගිනි අවියේ හිමිකරු බවට සනාථ කිරීම සඳහා සෘජු හෝ පරිවේශණීය (වක්‍ර) සාක්ෂි ඉදිරිපත් වී නොමැති බව සඳහන් කරමින් අධිකරණය ඔහුව මෙම නඩුවෙන් නිදහස් කිරීමට පියවර ගත්තේය.

මෙම ගිනි අවිය සම්බන්ධයෙන් සිදුකෙරුණු විමර්ශනවලට අදාළව දුමින්ද දිසානායක මහතා පසුගිය මැයි මස 23 වන දින අත්අඩංගුවට ගනු ලැබූ අතර, අනතුරුව අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කෙරිණි.

පසුව, ජූලි මස 14 වන දින ඇප කොන්දේසි මත මුදා හැරුණු ඒ මහතාට එරෙහි නඩුව අද දින මෙලෙස අවසන් වූයේ ප්‍රමාණවත් සාක්ෂි නොමැතිවීම හේතුවෙන් ඔහුව චෝදනාවෙන් නිදොස් කොට නිදහස් කරමිනි.