තමන්ව අත්අඩංගුවට ගැනීම වළක්වාලන නියෝගයක් නිකුත් කරන මෙන් ඉල්ලා, ධුරයේ වැඩ තහනමට ලක්ව සිටින පොලිස්පති දේශබන්දු තෙන්නකෝන් මහතා විසින් ඉදිරිපත් කරන ලද අපේක්ෂිත ඇප අයදුම්පත පිළිබඳ නියෝගය අගෝස්තු මස 05 වන දින ප්‍රකාශයට පත් කිරීමට කොටුව මහේස්ත්‍රාත් නිලුපුලී ලංකාපුර මහත්මිය ඊයේ (29) තීරණය කළාය. මෙහිදී තමා හිටපු ජනපති ගෝඨාභය රාජපක්ෂගේ අණට කීකරුව වැඩ කළා මිස තමන්ගේ හිතුමනාපයට යමක් නොකළ බවට දේශබන්දු මහතා තර්ක කර තිබෙයි.
අරගලය පැවති සමයේ ජනාධිපති ලේකම් කාර්යාලය ආශ්‍රිතව සිදු වූ සිදුවීමක් සම්බන්ධයෙන් ගොනු කර ඇති නඩුවකට අදාළව තමන්ව අත්අඩංගුවට ගැනීමේ සූදානමක් පවතින බව පවසමින් දේශබන්දු තෙන්නකෝන් මහතා මෙම අපේක්ෂිත ඇප අයදුම්පත ඉදිරිපත් කර තිබුණි. ජ්‍යෙෂ්ඨ නීතිඥ අජිත් පතිරණ මහතා, නීතිඥ තරිඳු වික්‍රමනායක මහතාගේ උපදෙස් මත තෙන්නකෝන් මහතා වෙනුවෙන් අධිකරණයේ පෙනී සිටි අතර,
නියෝගය ප්‍රකාශයට පත් කරන අවස්ථාවේ ඔහු අධිකරණයේ පෙනී සිටියේ නැත.
තම ඇප අයදුම්පත මගින් දේශබන්දු තෙන්නකෝන් මහතා පෙන්වා දී ඇත්තේ, අදාළ සිදුවීම වළක්වා ගැනීම සඳහා තමාට ගත හැකිව තිබූ සියලු ක්‍රියාමාර්ග ගත් බවයි. එවකට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස තම බලතල හා වගකීම් ප්‍රකාරව ප්‍රදේශයේ නීතිය හා සාමය සුරැකීමට නිසි නියෝග ලබා දෙමින් කටයුතු කළ බවද ඔහු සිය පෙත්සමෙන් දක්වා තිබේ.
කෙසේ වෙතත්, එවකට සිටි පොලිස්පතිවරයාගේ සහ අමාත්‍යාංශ ලේකම්වරයාගේ නියෝග හේතුවෙන් සිය රාජකාරිය නිසියාකාරව ඉටු කිරීමට බාධා පැමිණි බවත්, පසුව විධායක ජනාධිපතිවරයාගෙන් කරුණු පැහැදිලි කර ගැනීමෙන් අනතුරුව, විධායක ජනපතිගේ නියෝග ප්‍රකාරව නිලධාරීන් යොදවා කලහකාරී පිරිස් විසුරුවා හැරීමට පියවර ගත් බවත් තෙන්නකෝන් මහතා සිය අයදුම්පත මගින් වැඩිදුරටත් අධිකරණයට දන්වා ඇත.
ඇප අයදුම්පත පිළිබඳ නියෝගය අගෝස්තු මස 05 වන දින ප්‍රකාශයට පත් කරමින් අදාළ දිනයේ අධිකරණය හමුවේ පෙනී සිටින ලෙසට අපරාධ පරීක්ෂණ දෙපාර්තමේන්තුවට අනුබද්ධ විශේෂ පොලිස් විමර්ශන ඒකකයේ ස්ථානාධිපතිවරයා වෙත නොතීසි නිකුත් කිරීමටද මහේස්ත්‍රාත්වරිය නියම කළාය. මෙම අපේක්ෂිත ඇප ඉල්ලීමට අදාළව කිසියම් විරෝධතාවක් පවතී නම්, එය එදිනට අධිකරණයට ඉදිරිපත් කරන ලෙසටද පොලිස් ස්ථානාධිපතිවරයාට වැඩිදුරටත් දැනුම් දෙන ලදී.
Comments
Post a Comment
Your comment will be visible after approval