බැංකොක් සාප්පු සංකීර්ණයක සමූහ වෙඩි තැබීමකින් හයක් මරුට

තායිලන්තයේ බැංකොක් නුවර පිහිටි ජනාකීර්ණ සාප්පු සංකීර්ණයක යාබද ඕ ටෝ කෝ (Or Tor Kor) නැවුම් ආහාර වෙළඳපොළේ 2025 ජූලි 28 වන දින සිදුවූ මහා පරිමාණ වෙඩි තැබීමකින් පුද්ගලයින් හය දෙනෙකු ජීවිතක්ෂයට පත්ව ඇත. වෙඩික්කරු වෙඩි තබාගෙන සියදිවි නසා ගැනීමට පෙර සිදුකළ මෙම ප්‍රහාරයෙන් තවත් අයෙකු තුවාල ලබා තිබේ. 

මියගිය අය අතර වෙළඳපොළේ සේවය කළ ආරක්ෂක නිලධාරීන් සිව් දෙනෙකු, කාන්තාවක් සහ ප්‍රහාරය සිදුකළ තුවක්කුකරුද වන බව පොලිසිය තහවුරු කර ඇත.



මෙම ප්‍රහාරය පිටුපස ඇති හේතුව සොයා තායිලන්ත පොලිසිය පුළුල් විමර්ශනයක් ආරම්භ කර තිබේ. දැනට පවතින තායිලන්ත-කාම්බෝජ දේශසීමා ගැටුම් සමඟ මෙම සිදුවීමේ කිසියම් සම්බන්ධයක් තිබේද යන්න පිළිබඳව ද විශේෂ අවධානයක් යොමු කර ඇත.

තායිලන්තය තුළ පවතින ලිහිල් ගිනි අවි පාලන නීති ක්‍රියාත්මක වීම හේතුවෙන් ගිනි අවි පහසුවෙන් ලබාගත හැකිවීම මෙවැනි ප්‍රහාර සඳහා පසුබිම සකසා ඇති බව විශ්ලේෂකයෝ පෙන්වා දෙති.

මෙම සිදුවීම, 2023 වසරේ ඔක්තෝබර් මාසයේදී බැංකොක් නුවර සියම් පැරගන් (Siam Paragon) වෙළඳ සංකීර්ණයේදී යොවුන් වියේ තුවක්කුකරුවෙකු විසින් තිදෙනෙකු ඝාතනය කරමින් සිදුකළ වෙඩි තැබීමට වඩා  වෙනස් එකක් බව බලධාරීහු අවධාරණය කරති.

වෙඩි තැබීම සිදුවී ඇත්තේ සංචාරක ආකර්ෂණය දිනාගත් චතුචක් වෙළඳපොළට නුදුරින් පිහිටි බැංකොක් නුවර බං සූ (Bang Sue) දිස්ත්‍රික්කයේය. සැකකරු සම්පූර්ණයෙන් හඳුනාගැනීමට සහ ප්‍රහාරයට තුඩුදුන් සියලු කරුණු අනාවරණය කරගැනීමට පොලිසිය අඛණ්ඩව කටයුතු කරමින් සිටී.