කංජිපානි ඉම්රාන්ගේ සමීපතමයෙකු ඉන්දියාවෙන් පිටුවහල් කෙරේ

සංවිධානාත්මක අපරාධ කල්ලි නායකයෙකු වන කංජිපානි ඉම්රාන්ගේ සමීපතම අනුගාමිකයෙකු ලෙස සැලකෙන මොහොමඩ් මිහිලාර් මොහොමඩ් අර්ෂාඩ් නමැති 45 හැවිරිදි පුද්ගලයා ඉන්දියාවෙන් පිටුවහල් කිරීමෙන් පසු ඊයේ (24) අලුයම කටුනායක ගුවන්තොටුපොළේදී අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගනු ලැබීය.

කොළඹ 13, ආදුරුප්පු වීදියේ පදිංචිකරුවෙකු වන මෙම සැකකරු, වලංගු වීසා හෝ ගමන් බලපත්‍ර නොමැතිව ඉන්දියාවේ නීතිවිරෝධීව රැඳී සිටියදී ඉන්දීය ආරක්ෂක අංශ මගින් ඉකුත් 22 වන දා අත්අඩංගුවට ගෙන තිබුණි.

අනතුරුව ඔහුව චෙන්නායි සිට ඉන්ඩිගෝ ගුවන් සේවයට අයත් 6E-1171 දරණ යානයෙන් පිටුවහල් කර ඇති අතර, එම යානය ඊයේ අලුයම 2.30ට පමණ කටුනායකට ළඟා වී ඇත.

මොහු 2017 වසරේදී ශ්‍රී ලංකාවෙන් ඩුබායි වෙත පළා ගොස් ඇති අතර, 2019 දී මාකඳුරේ මදුෂ් ඇතුළු අපරාධ කල්ලි සාමාජිකයින් පිරිසක් ඩුබායිහිදී අත්අඩංගුවට පත්වීමත් සමග ඉන්දියාවට පැන ගොස් තිබූ බවට තොරතුරු අනාවරණය වී තිබේ. සැකකරුගේ බිරිඳ සහ දරුවන් වලංගු වීසා බලපත්‍ර මත තවදුරටත් ඉන්දියාවේ රැඳී සිටින බවට වාර්තා වේ.

අත්අඩංගුවට ගත් සැකකරු වැඩිදුර විමර්ශන සඳහා කටුනායක ගුවන්තොටුපොළ පොලිස් මත්ද්‍රව්‍ය නාශක කාර්යාංශය වෙත භාර දී ඇති අතර, ඔහුව මීගමුව මහෙස්ත්‍රාත් අධිකරණයට ඉදිරිපත් කිරීමට නියමිතය.