ශ්‍රී ලංකාව සඳහා අලුතින් පත්කරන ලද විදේශීය තානාපතිවරුන් පස් දෙනෙකු සහ මහ කොමසාරිස්වරයෙකු අද (24) දින ජනාධිපති අනුර කුමාර දිසානායක මහතා වෙත සිය අක්තපත්‍ර නිල වශයෙන් භාරදීම ජනාධිපති කාර්යාලයේදී සිදුකෙරිණි.
මෙම අවස්ථාවේ, ශ්‍රී ලංකාව සහ කසකස්තානය අතර රාජ්‍ය තාන්ත්‍රික සබඳතාවන්හි නව පරිච්ඡේදයක් සනිටුහන් කරමින්, ශ්‍රී ලංකාවේ ප්‍රථම වරට ස්ථාපිත කෙරෙන කසකස්තාන තානාපති කාර්යාලයේ නේවාසික තානාපතිවරයා ලෙස සර්ගෙයි වික්ටරොව් මහතා සිය අක්තපත්‍ර භාරදීම විශේෂ සිදුවීමක් විය.
ඒ අනුව, ශ්‍රී ලංකාවේ තානාපති කාර්යාලයක් පිහිටවූ පළමු මධ්‍යම ආසියානු රාජ්‍යය බවට කසකස්තානය පත්විය.
කසකස්තාන තානාපතිවරයාට අමතරව එරිත්‍රියාව, උස්බෙකිස්තානය, ජෝර්දානය සහ භූතානය සඳහා නව තානාපතිවරුන්ද, ෆීජි ජනරජය සඳහා නව මහ කොමසාරිස්වරයෙකුද සිය අක්තපත්‍ර ජනාධිපතිවරයා වෙත පිළිගැන්වීය. මෙම රාජ්‍යතාන්ත්‍රිකයින්ගෙන් බහුතරයක් ශ්‍රී ලංකාව සඳහා අනේවාසික පදනම මත කටයුතු කරනු ලබයි.
ඒ අනුව, නවදිල්ලිය නේවාසිකව එරිත්‍රියානු තානාපති අලෙම් වෝල්ඩෙමරියම් මහතා, ඉස්ලාමාබාද් නේවාසිකව උස්බෙකිස්තාන තානාපති අලිෂෙර් ටුක්ටායෙව් මහතා, නවදිල්ලිය නේවාසිකව ජෝර්දාන තානාපති යූසෙෆ් මුස්තාෆා අබ්ඩෙල්ඝානි මහතා සහ ఢాకా නේවාසිකව භූතාන තානාපතිනී ඩාෂෝ කර්මා හාමු ඩෝර්ජී මහත්මියද, නවදිල්ලිය නේවාසිකව ෆීජි මහ කොමසාරිස් ජග්න්නාත් සාමි මහතාද සිය අක්තපත්‍ර භාරදුන් පිරිසට ඇතුළත් විය.
මෙම රාජ්‍යතාන්ත්‍රික කටයුතු විදේශ කටයුතු, විදේශ රැකියා සහ සංචාරක අමාත්‍ය විජිත හේරත් සහ ජනාධිපති ලේකම් ආචාර්ය නන්දික සනත් කුමානායක යන මහත්වරුන්ද සහභාගී වූහ.
Comments
Post a Comment
Your comment will be visible after approval