සතොස සේවකයන් සිය නිල රාජකාරිවලින් බැහැරව දේශපාලන හා පෞද්ගලික කටයුතුවල යෙදවීමෙන් රජයට පාඩු කළ බවට චෝදනා කරමින් හිටපු වෙළෙඳ ඇමැති ජොන්ස්ටන් ප්රනාන්දුට එරෙහිව පවරා ඇති සතොස සිවුවැනි නඩුවේ සාක්ෂි විභාගය කොළඹ මහාධිකරණයේදී සිදු කෙරිණි.
කොළඹ ප්රධාන මහාධිකරණ විනිසුරු ආදිත්ය පටබැඳි මහතා ඉදිරියේ නඩුව කැඳවූ අවස්ථාවේ ඇප මත මුදාහැර සිටින හිටපු වෙළෙඳ ඇමැති ජොන්ස්ටන් ප්රනාන්දු ඇතුළු අනෙකුත් විත්තිකරුවෝ අධිකරණය ඉදිරියේ පෙනී සිටියහ.
එහිදී පැමිණිල්ලේ 7 වැනි සාක්ෂිකරු වන සතොස හිටපු වැටුප් සැකසීමේ නිලධාරි මෙරින්නගේ කොස්තා නමැත්තා, ජනාධිපති නීතිඥ සම්පත් මෙන්ඩිස් මහතා විත්තිය පාර්ශ්වය වෙනුවෙන් විමසන ලද හරස් ප්රශ්නවලට උත්තර දෙමින් මෙසේ කියා සිටියේය.
“සතොස ආයතනයේ සේවය කළ අනියම්, ස්ථිර හා කොන්ත්රාත් සේවකයන්ගේ වැටුප් සැකසීම මට පැවරී තිබුණා. සමහර සේවකයන්ට කළ ගෙවීම් ප්රශ්න සහගත වුණා. එවැනි අඩුපාඩු තිබුණු ගෙවීම් නවත්වා තිබෙන විට ඒවාට ගෙවීම් කරන ලෙස සතොස සභාපතිවරයා හෝ ක්රියාකාරී අධ්යක්ෂවරයා බලපෑම් කළා. සතොස සේවකයන් සමුපකාර අමාත්යාංශයේ සේවය කරන ආකාරය මා දුටුව නමුත් ඔවුන්ට වැටුප් ගෙවන ආකාරය පිළිබඳ දෙපාර්ශ්වය ඇති කරගත් ගිවිසුමක් ගැන මා දැන සිටියේ නැහැ.“ යැයි කීය.
විත්තියේ නීතිඥ: “ඔබ සතොස ආයතනයේ සේවයට පැමිණියේ කුමන ඇමැතිවරයාගේ කාලයේදී” ද?
සාක්ෂිකරු: “කිංස්ලි ටී. වික්රමරත්න ඇමැතිවරයාගේ කාලයේදී”.
විත්තියේ නීතිඥ: “ඔබ ඔහු හඳුනනවා ද?”
සාක්ෂිකරු: “නැහැ. මම ඔහු පෞද්ගලිකව දන්නේ නැහැ.”
විත්තියේ නීතිඥ: “ඔබේ සේවා කාලයේ සිටි අනෙක් ඇමැතිවරු කවුද?”
සාක්ෂිකරු: “බන්දුල ගුණවර්ධන, රිෂාඩ් බදියුර්දීන්, ජොන්ස්ටන් ප්රනාන්දු යනාදීන් ඇමැතිවරු හැටියට හිටියා.”
විත්තියේ නීතිඥ: “ජොන්ස්ටන් ඇමැතිවරයා පත්වීමට පෙර වොක්ෂෝල් වීදියේ බිල්ඩිමේ බොහෝ මහල් හිස්ව තිබුණු බව ඔබ දන්නවා ද?”
සාක්ෂිකරු: “මේ ගොඩනැඟිල්ලේ මහල් 10ක් තියෙනවා. එම මහල් භාවිත නොකර තිබුණු බවත් මා දන්නේ නැහැ.”
විත්තියේ නීතිඥ: “බන්දුල ගුණවර්ධන ඇමැතිවරයාගේ කාලයේදී වෙළෙඳ අමාත්යාංශය යටතේ තිබෙන පාරිභෝගික කටයුතු අධිකාරිය වොක්ෂෝල් වීදියේ ගොඩනැඟිල්ලෙන් ඉවත් කර මාසිකව මිලියන 7.2ක කුලියකට පෞද්ගලික ආයතනයක පවත්වාගෙන ගෙන ගිය බව මා යෝජනා කරනවා.”
සාක්ෂිකරු: “මා. ඒගැන කිසිවක් දන්නේ නැහැ.”
විත්තියේ නීතිඥ: “එපමණක් නෙමෙයි. ඒ ගොඩනැඟිල්ලේ අවුරුදු 4ක කුලිය එකවර ගෙවූ බව ඔබ දන්නවා ද?”
සාක්ෂිකරු: “මා ඒගැන දන්නේ නැහැ.”
සාක්ෂිකරු: “ඔබ මගේ සේවාදායකයාට විරුද්ධව සාක්ෂි දෙන්නේ පෞද්ගලික තරහක් නිසා කියලා මම යෝජනා කරනවා?”
විත්තියේ නීතිඥ: “මට ඔවුන් සමඟ කිසිම පෞද්ගලික තරහක් නැහැ.”
හරස් ප්රශ්න අවසන්වීමෙන් පසු නඩුව ලබන ජූලි 07දා යළි කැඳවීමට නියම කළ මහාධිකරණ විනිසුරු ආදිත්ය පටබැඳි මහතා එදින අධිකරණයේ පෙනී සිටින ලෙස සාක්ෂිකරුවන්ට අවවාද කළේය. පැමිණිල්ලේ 34 වැනි සහ 42 වැනි සාක්ෂිකරුවන් වන ජේ.එච්.එම්. කුමාරිහාමි නොහොත් පාතිමා රිෂානා නමැත්තිය සහ කේ.එම්. තිස්ස තිලක බණ්ඩාර එදින සාක්ෂි දීමට නියමිතය.
සමුපකාර, අභ්යන්තර සහ වෙළෙඳ ඇමැතිවරයා වශයෙන් කටයුතු කරමින් 2012 වසරේදී සතොස ආයතනයේ සේවකයන් නිල රාජකාරිවලින් බැහැරව දේශපාලන කටයුතුවල යොදවා වැටුප් හා දීමනා ලෙස රුපියල් 86,47,224ක මුදලක් ගෙවීමෙන් රජයට පාඩු කළ බවට චෝදනා කර ජොන්ස්ටන් ප්රනාන්දු මහතා ඇතුළු තිදෙනකුට එරෙහිව අල්ලස් කොමිසම විසින් නඩු පවරා තිබේ.
සමුපකාර, අභ්යන්තර සහ වෙළෙඳ හිටපු ඇමැති ජොන්ස්ටන් ප්රනාන්දුට අමතරව පී. එරාජ් ට්රියන්ත ප්රනාන්දු සහ කේ.එම්. මොහොමඩ් ෂාකීර් යන මහත්වරු මෙම නඩුවේ සෙසු චුදිතයෝ වෙති.
අල්ලස් පනතේ 70 වැනි වගන්තිය යටතේ හා දණ්ඩ නීතිසංග්රහයේ 113, 102 වගන්ති යටතේ දූෂණය නමැති වරදට හා එයට අන් අය පෙළඹවීමේ චෝදනාව යටතේ අධිචෝදනා 4ක් යටතේ නඩු පවරා ඇත.
අල්ලස් හෝ දූෂණ කොමිසමේ නියෝජ්ය අධ්යක්ෂ ජනරාල් ගංගා හෙයියන්තුඩුව, සහකාර අධ්යක්ෂ අමා විජයසිංහ සමඟ නීතිපති දෙපාර්තමේන්තුවේ නියෝජ්ය සොලිසිටර් ජනරාල් වසන්ත පෙරේරා යන මහත්ම මහත්මීහු නඩු මෙහෙයවූහ. ජනාධිපති නීතිඥ සම්පත් මෙන්ඩිස් සමඟ නීතිඥ වසීම් අක්රම් මහතා විත්තිය වෙනුවෙන් පෙනීසිටියහ.
Comments
Post a Comment
Your comment will be visible after approval