ශ්රී ලංකා පොලිසිය ඓතිහාසික පියවරක් තබමින් කෘතිම බුද්ධි (AI) තාක්ෂණය භාවිතයෙන් නිර්මාණය කරන ලද සැකකරුවන්ගේ ඡායාරූප පළමු වරට මහජනතාව වෙත නිකුත් කර ඇත. දකුණු පළාතේ සිදු වූ අපරාධයක් සම්බන්ධයෙන් සෙවීමට අවශ්ය පුද්ගලයින් දෙදෙනෙකුගේ මෙම ඡායාරූප, අපරාධ පරීක්ෂණ දෙපාර්තමේන්තුවේ මනුෂ්ය ඝාතන හා සංවිධානාත්මක අපරාධ විමර්ශන අංශයේ ඉල්ලීම මත නිර්මාණය කර ඇත.
ඊයේ (02) දින පොලිස් මූලස්ථානය විසින් මාධ්ය වෙත නිකුත් කරන ලද මෙම ඡායාරූප, ශ්රී ලංකා පොලිස් ඉතිහාසයේ AI තාක්ෂණය භාවිත කර නිර්මාණය කළ සැකකරුවන්ගේ ඡායාරූප මහජනතාව වෙත නිකුත් කළ පළමු අවස්ථාව ලෙස සටහන් වේ. මෙම නව තාක්ෂණික පියවර, රටේ අපරාධ විමර්ශන ක්ෂේත්රයේ සැලකිය යුතු ඉදිරි පියවරක් ලෙස සැලකේ.
අපරාධ ලේඛනාගාරයේ අධ්යක්ෂ ජ්යෙෂ්ඨ පොලිස් අධිකාරී රුවන් කුමාර මහතා, දිනමිණ පුවත්පත විසින් කරන ලද විමසීමකදී පැවසුවේ, අපරාධයකට සම්බන්ධ පුද්ගලයෙකු පැහැදිලිව නම ගම සහිතව හඳුනාගත නොහැකි අවස්ථාවලදී,
අපරාධකරුගේ රූපය ඇසින් දුටු සාක්ෂිකරුවන් ලබාදෙන විස්තර අනුව, කොළඹ 07, ටොරින්ටන්හි පිහිටි අපරාධ ලේඛනාගාරයේ සේවයේ නියුතු පොලිස් චිත්ර ශිල්පීන් විසින් අනුමාන රූපයක් නිර්මාණය කරනු ලබන බවයි.
වර්තමානයේදී මෙම අනුමාන රූප නිර්මාණය කිරීමේ ක්රියාවලියට AI තාක්ෂණය ඒකාබද්ධ කර ඇති බව ජ්යෙෂ්ඨ පොලිස් අධිකාරී රුවන් කුමාර මහතා වැඩිදුරටත් සඳහන් කළේය. ලෝකයේ දැනට භාවිත වන AI මෘදුකාංග ශ්රී ලංකාවට ගැලපෙන ආකාරයට සකස් කිරීමේ කටයුතු දැනටමත් ක්රියාත්මක වෙමින් පවතින බවත්, මෙම තාක්ෂණය අනාගතයේදී ශ්රී ලංකා පොලීසියේ කාර්යක්ෂමතාව සැලකිය යුතු ලෙස වැඩි දියුණු කරනු ඇතැයි බලාපොරොත්තු වන බවත් ඔහු පැවසීය.
AI තාක්ෂණයෙන් නිර්මාණය කළ මෙම ඡායාරූපවල දැක්වෙන සැකකරුවන් දෙදෙනා පිළිබඳව යම් තොරතුරක් දන්නා යම් පුද්ගලයෙකු සිටී නම්, අපරාධ පරීක්ෂණ දෙපාර්තමේන්තුවේ මනුෂ්ය ඝාතන හා සංවිධානාත්මක අපරාධ විමර්ශන අංශයේ සහකාර පොලිස් අධිකාරිවරයාගේ 071 - 8592867 දුරකථන අංකයට හෝ එම ඒකකයේ ස්ථානාධිපතිවරයාගේ 074 - 1357642 දුරකථන අංකයට අවශ්ය තොරතුරු ලබාදෙන ලෙස පොලිස් මාධ්ය ප්රකාශක කාර්යාලය මහජනතාවගෙන් ඉල්ලා සිටී.
මෙම නව තාක්ෂණය භාවිතය සමග, අපරාධකරුවන් හඳුනා ගැනීමේ හැකියාව වැඩි දියුණු වනු ඇති අතර, එමගින් අපරාධ විමර්ශන ක්ෂේත්රයේ සැලකිය යුතු ප්රගතියක් අත්පත් කර ගැනීමට හැකි වනු ඇත. කෘතිම බුද්ධි තාක්ෂණය පොලිස් දෙපාර්තමේන්තුවේ කටයුතුවලට ඒකාබද්ධ කිරීම මගින්, අපරාධ විමර්ශන කටයුතු වඩාත් කාර්යක්ෂම හා ඵලදායී කිරීමට අපේක්ෂා කෙරේ.
Comments
Post a Comment
Your comment will be visible after approval