මිතුරන් සමඟ දන්සලකට ගොස් යළි එමින් සිටියදී කඩයක් අසල නතර කර තිබූ යතුරුපැදියක් පැද තාප්පයක ගැටීමෙන් බරපතළ තුවාල ලැබූ තරුණයකු රෝහල්ගත කිරීමෙන් පසු මරණයට පත්ව ඇතැයි මොරගහහේන පොලීසිය පවසයි.
මෙසේ මියගොස් ඇත්තේ මඩපාත, මාකන්දන, සංකල්පගම පදිංචි විතානගේ නිමන්ත ඉමාන් විතානගේ නමැති (19) සූපවේදියකු බව පොලීසිය කියයි.
පහළොස් දෙනකුගෙන් යුත් මිතුරන් කණ්ඩායමක් ගෝනපල, කෝරලඉම හන්දිය අසල රාත්රී තේ කඩයකින් ආහාර ගනිමින් සිටියදී
එහි තිබූ යතුරු පැදියක් විනෝදයට පැදීමට යාමේදී වේගය පාලනය කර ගැනීමට නොහැකිව මාර්ගයෙන් ඉවතට පැන ආරක්ෂිත තාප්පයක හා විදුලි කණුවක ගැටී මෙම තරණයා බරපතළ තුවාල ලබා කළුබෝවිල ශික්ෂණ රෝහලට ඇතුළත් කිරීමෙන් අනතුරුව මෙසේ මියගොස් ඇතැයි මොරගහහේන පොලීසිය පවසයි.
මේ අතරතුරදී මෙම තරුණයා කිසිවකුට නොදන්වා එහි නවතා තිබූ පල්සර් වර්ගයේ යතුරු පැදියක් පණගන්වා එක්වරම අධික වේගයෙන් කොළඹ දෙසට ධාවනය කොට ඇති අතර, ඉන් මීටර් 200ක් පමණට දුරට යද්දි මාර්ගයෙන් ඉවතට පැන ආරක්ෂිත තාප්පයක් කඩාගෙන ගොස් විදුලි කණුවක ගැටී අනතුරක් සිදුව තිබුණි.
අනතුරින් එම තරුණයාගේ වම් අත සහ දෙපා බිඳී ගොස් තිබූ අතර උදරයට සහ පපු පෙදෙසට බරපතළ හානි සිදුව තිබූ අතර දකුණු පාදයේ දණ හිසේ සිට පහළට බරපතළ කැපුම් තුවාලයක් ද තිබූ බව පොලීසිය කියයි.
පසුව මෘත දේහය පිළිබඳ හදිසි මරණ පරීක්ෂණය කළුබෝවිල ශික්ෂණ රෝහලේ හදිසි මරණ පරීක්ෂක පාරින්ද කොටුගොඩ මහතා විසින් සිදු කළ අතර මෘත දේහය පිළිබඳ පශ්චාත් මරණ පරීක්ෂණය කළුබෝවිල ශික්ෂණ රෝහලේ අධිකරණ වෛද්ය නිලධාරීනී එෆ්.එන්.ආර්.ඕ. සුෆ්යාන් මහත්මිය විසින් සිදු කරනු ලැබුවාය. එහිදී ඉදිරිපත් වූ සාක්ෂි සහ පශ්චාත් මරණ පරීක්ෂණ වෛද්ය වාර්තාවට අනුව ධාවනය වූ යතුරුපැදියක් වේගය පාලනය කර ගැනීමට නොහැකිව විදුලි කණුවක ගැටී, පපුවට උදරයට, අත් පාවලට සිදු වූ බරපතළ තුවාල මරණයට හේතුව බව හදිසි මරණ පරීක්ෂක පාරින්ද කොටුගොඩ මහතා නිගමනය කළේය.
(කොට්ටාව - ප්රදීප් කුමාර)
Comments
Post a Comment
Your comment will be visible after approval