තුන් හැවිරිදි දැරියක් ඖෂධ කැබැල්ලක් ශ්වසන නාළයේ සිරවීමෙන් මිය යයි

හෙම්මාතගම පෙතිගම්මන ප්‍රදේශයේ පදිංචි වයස අවුරුදු තුනක දැරියක් ඖෂධ කැබැල්ලක් ශ්වසන නාළයේ සිරවීමෙන් පසුගිය 27 වැනිදා පෙරවරුවේ මිය ගොස් ඇති බව හෙම්මාතගම පොලිසිය වාර්තා කරයි.

මියගිය දැරිය හෙම්මාතගම පොලිස් වසමේ පෙතිගම්මන ප්‍රදේශයේ පදිංචිව සිටි ඩබ්ලිව්.එම්. මෙත්සිදි සෙනුල්යා නම් වූ තුන් හැවිරිදි දැරියයි. සෙම ආසාදනයක් හේතුවෙන් අසනීප වී සිටි දැරියට පියා විසින් බලහත්කාරයෙන් ඖෂධ ලබාදීමට උත්සාහ කිරීමේදී ඖෂධ කැබැල්ලක් ශ්වසන නාළයේ සිරවී දැරියගේ මරණය සිදුව ඇති බව මරණ පරීක්ෂණයෙන් තහවුරු වී තිබේ.



හෙම්මාතගම පොලිසිය සඳහන් කරන්නේ මිය ගිය දැරියට සෙම අසනීප තත්ත්වයක් ඇතිවීම හේතුවෙන් හෙම්මාතගම නගරයේ පිහිටි පෞද්ගලික වෛද්‍ය මධ්‍යස්ථානයකට දින කිහිපයකට පෙර රැගෙන ගොස් ප්‍රතිකාර ලබා දී ඇති බවයි. නමුත් දැරිය ඖෂධ පානය කිරීම දිගින් දිගටම ප්‍රතික්ෂේප කර ඇති බව පොලිසිය වැඩිදුරටත් පවසයි.

දැරියගේ මාපියන් ඖෂධ කුඩු කර ජලය සමග ලබා දීමට උත්සාහ කළද, දැරිය එයද ප්‍රතික්ෂේප කර ඇත. පසුගිය 27 වැනිදා පෙරවරු 8.00ට පමණ පියා නැවතත් දැරියට ඖෂධ දීමට උත්සාහ කළ අවස්ථාවේදී, දැරිය එය ප්‍රතික්ෂේප කර ඇත. මේ අවස්ථාවේදී පියා දැරියගේ මුඛය බලහත්කාරයෙන් විවෘත කර ඖෂධ පෙත්තකින් කැබැල්ලක් දැරියගේ උගුරට දමා ජලය දී ඇති බව පොලිසිය වාර්තා කරයි.

සුළු මොහොතකින් දැරිය මළානික වී නිල් පැහැ ගැන්වී ඇති අතර, වහාම හෙම්මාතගම රජයේ රෝහලට රැගෙන ගොස් ඇත. හෙම්මාතගම රෝහලේදී දැරියට මූලික ප්‍රතිකාර ලබා දෙන අවස්ථාවේ ඖෂධ කැබැල්ල දැරියගේ මුඛයෙන් පිටතට විසි වී ඇත. නමුත් ප්‍රතිකාර ලබාදීමෙන් මිනිත්තු 25කට පමණ පසු දැරිය මිය ගොස් ඇත.



මිය ගිය දැරියගේ දේහය පශ්චාත් මරණ පරීක්ෂණය සඳහා කෑගල්ල මහ රෝහලට රැගෙන ගොස් ඇති අතර, පශ්චාත් මරණ පරීක්ෂණය කෑගල්ල මහ රෝහලේ විශේෂඥ අධිකරණ වෛද්‍ය නිලධාරි වෛද්‍ය රුචිර නදීර මහතා විසින් සිදු කර තිබේ. මරණය ඖෂධ කැබැල්ලක් ශ්වසන නාළයේ සිරවීමෙන් සිදුවූ හදිසි මරණයක් බවට මාවනැල්ල ප්‍රාදේශීය ලේකම් කොට්ඨාසයේ හදිසි මරණ පරීක්ෂක ආනන්ද වීරකෝන් මහතා තීරණය කර ඇත.

මෙම සිද්ධිය සම්බන්ධයෙන් අදහස් දක්වමින් කෑගල්ල මහ රෝහලේ විශේෂඥ අධිකරණ වෛද්‍ය නිලධාරි වෛද්‍ය රුචිර නදීර මහතා පවසා ඇත්තේ, දරුවෙකු අසනීප වී සිටින අවස්ථාවක මව්පියන් ඖෂධ ලබාදීමේදී වැඩි සැලකිල්ලක් දැක්විය යුතු බවයි. විශේෂයෙන්ම ඖෂධ පානය කිරීම ප්‍රතික්ෂේප කර වැලපෙමින් සිටින අවස්ථාවක බලහත්කාරයෙන් ඖෂධ දරුවන්ගේ මුඛයට ඇතුළු කිරීම අවදානම් බව වෛද්‍යවරයා අවධාරණය කර ඇත.

වෛද්‍ය රුචිර නදීර මහතා වැඩිදුරටත් පැහැදිලි කර ඇත්තේ, දැරියගේ ශ්වසන නාලයේ ඖෂධ කැබැල්ල සිරවී ඇති බවත්, ජලය සමඟ ඖෂධ කැබැල්ල දියවී විශාල වන බවත්ය.

මෙහිදී ශ්වසන නාලය අවහිර වී පෙනහළුවලට වාතය ගමන් නොකිරීමෙන් මරණය සිදුවන බවද වෛද්‍යවරයා පෙන්වා දී තිබේ. දරුවන් හඬා වැලපෙමින් සිටින අවස්ථාවක ඖෂධ ලබා දීමක් සිදු නොකරන ලෙසද වෛද්‍යවරයා දෙමාපියන්ට උපදෙස් දී ඇත.

මෙම අවාසනාවන්ත සිද්ධිය දරුවන්ට ඖෂධ ලබාදීමේදී දෙමාපියන් අනුගමනය කළයුතු නිවැරදි ක්‍රමවේදයන් පිළිබඳව ජනතාව දැනුවත් කිරීමේ අවශ්‍යතාව පෙන්වා දෙන අතර, දරුවන්ට ඖෂධ ලබාදීමේදී මනා සැලකිල්ලෙන් කටයුතු කිරීමේ වැදගත්කම අවධාරණය කරයි.