පොලී ප්‍රතිශත රවටා FB ‍අයගෙන් ලක්ෂ 450ක් වංචා කළ කාන්තාවක් අත්අඩංගුවට

ආකර්ෂණීය පොලී මුදලක් ලබා දෙන බවට මුහුණුපොත (ෆේස්බුක්) ඔස්සේ දැන්වීම් පළ කරමින් දිවයිනේ විවිධ ප්‍රදේශවල පුද්ගලයන්ගෙන් රුපියල් ලක්ෂ 450කට ආසන්න මුදලක් වංචනික ලෙස ලබාගත් කාන්තාවක් හැටන් පොලිසිය විසින් අත්අඩංගුවට ගෙන තිබේ.

මෙම වංචනික කාන්තාව මාර්තු 09 වන දින අත්අඩංගුවට ගෙන පසුදින (මාර්තු 10) හැටන් මහෙස්ත්‍රාත් එම්. ෆරුඩීන් මහතා හමුවට ඉදිරිපත් කිරීමෙන් අනතුරුව මාර්තු 18 වන දින දක්වා රක්ෂිත බන්ධනාගාරගත කිරීමට නියෝග කර ඇත.


හැටන් පොලිසියේ නිලධාරියෙකුගේ ප්‍රකාශය අනුව, මෙම සැකකාර කාන්තාව හැටන් ප්‍රදේශයේ කාන්තාවකගෙන් මෙවැනි ආකාරයට රුපියල් ලක්ෂ පහක මුදලක් ලබාගෙන එම මුදලට පොලිය හෝ මූලික මුදල නොගෙවීම සම්බන්ධයෙන් පීඩාවට පත් කාන්තාව විසින් හැටන් පොලිසිය වෙත පැමිණිල්ලක් ඉදිරිපත් කර ඇත.

ඒ අනුව සැකකාරිය පොලිසිය විසින් අත්අඩංගුවට ගෙන හැටන් මහෙස්ත්‍රාත් අධිකරණය වෙත ඉදිරිපත් කිරීමෙන් පසු දැඩි ඇප කොන්දේසි මත සැකකාරිය මුදාහැර තිබේ. එම ඇප කොන්දේසි යටතේ සැකකාර කාන්තාව සෑම මසකම අවසාන ඉරිදා දිනයේ හැටන් පොලිසියේ අපරාධ විමර්ශන අංශයේ පෙනී සිට අත්සන් කිරීම අනිවාර්ය කොන්දේසියක් වී ඇත. නමුත් සැකකාරිය මාස පහක කාලයක් තිස්සේ නඩු වාර තුනකට පෙනී නොසිට අධිකරණය මඟහැර සිටි බව පොලිසිය වැඩිදුරටත් පවසයි.

මෙම නඩුව සම්බන්ධයෙන් පොලිසිය සඳහන් කරන්නේ, සැකකාර කාන්තාව ඇගේ සැමියාගෙන් සහ දරුවන්ගෙන් වෙන් වී මහනුවර,
තැන්නේගෙදර ප්‍රදේශයේ සැඟවී සිටි බවයි. ඇය ඇගේ යෙහෙළියක් හමුවීමට මාර්තු 09 වන දින සවස කාලයේ දුම්රියෙන් හැටන් දුම්රිය ස්ථානයට පැමිණෙන බවට හැටන් පොලිසියේ පාලන අංශයේ ස්ථානාධිපති පොලිස් පරීක්ෂක නිශාන්ත ද සිල්වා මහතා වෙත තොරතුරක් ලැබී ඇත.

එම තොරතුර මත පදනම්ව, හැටන් කොට්ඨාස භාර පොලිස් අධිකාරි ප්‍රදීප් වීරසේකර මහතා සහ හැටන් මූලස්ථාන ප්‍රධාන පොලිස් පරීක්ෂක රංජිත් ජයසේන මහතාගේ අධීක්ෂණය යටතේ විශේෂ පොලිස් මෙහෙයුමක් සංවිධානය කරන ලදී. එම මෙහෙයුම අනුව සැකකාරිනිය හැටන් දුම්රිය ස්ථානයට පැමිණි අවස්ථාවේ පොලිසිය විසින් අත්අඩංගුවට ගෙන හැටන් මහෙස්ත්‍රාත් අධිකරණය වෙත ඉදිරිපත් කර ඇත.

පොලිස් පරීක්ෂණවලට අනුව, සැකකාර කාන්තාව ඉහළ පොලී ප්‍රතිශතයක් ගෙවන බවට පොරොන්දු වී ෆේස්බුක් සමාජ මාධ්‍ය ජාලය හරහා දැන්වීම් පළ කර විවිධ ප්‍රදේශවල පුද්ගලයන්ගෙන් මුදල් එකතු කර ඇති අතර, මේ වන විට රුපියල් ලක්ෂ 450කට ආසන්න මුදලක් වංචා කර ඇති බව තහවුරු වී තිබේ.


පොලිසිය වැඩිදුරටත් පවසන්නේ, තව තවත් වින්දිතයන් ඉදිරිපත් වනු ඇතැයි අපේක්ෂා කරන බවත්, අදාළ වංචනික කාන්තාව ගැන තොරතුරු ඇති පුද්ගලයන් හැටන් පොලිසිය වෙත දැනුම් දෙන ලෙසත්ය.

සැකකාර කාන්තාව මේ මස 18 වන දින දක්වා රක්ෂිත බන්ධනාගාරගත කරන අතර, තවදුරටත් විමර්ශන පැවැත්වෙමින් ඇති බව හැටන් පොලිසිය පවසයි.

මූල්‍ය වංචනික ක්‍රියා වැඩි වෙමින් පවතින බැවින්, මහජනතාව ඉහළ පොලී ප්‍රතිශත පොරොන්දු වන මූල්‍ය ආයෝජන සහ යෝජනා සම්බන්ධයෙන් පරීක්ෂාකාරී විය යුතු බවත්, එවැනි ආයෝජන කිරීමට පෙර නිසි පරිශීලනයක් කිරීම වැදගත් බවත් පොලිසිය අවධාරණය කරයි.