අපරාධ පරීක්ෂණ දෙපාර්තමේන්තුව විසින් ඉන්ධන බෙදාහැරීමේ ක්රියාවලිය අඩපණ කිරීම සම්බන්ධයෙන් ලැබුණු පැමිණිල්ලක් මත විමර්ශන කටයුතු ආරම්භ කර ඇති බව පොලිස් මාධ්ය කොට්ඨාසය විසින් නිවේදනය කර තිබේ.
එම නිවේදනයට අනුව, ඉන්ධන බෙදාහරින නියෝජිතයන් ලෙස හඳුන්වාගන්නා කණ්ඩායමක් විසින් ඉන්ධන බෙදාහැරීමේ ක්රියාවලිය සාවද්ය ලෙස අඩපණ කිරීම තුළින් රජය අපහසුතාවයට පත් කිරීමේ අරමුණින් කටයුතු කරන බවට හා එමගින් මහජනතාව දැඩි පීඩාවකට ලක් කිරීමට උත්සාහ දරන බවට
අපරාධ පරීක්ෂණ දෙපාර්තමේන්තුවට පැමිණිල්ලක් ලැබී ඇත.
සාමාන්ය ජන ජීවිතය අඩාල කිරීම සහ රටේ අස්ථාවරභාවයක් ඇති කර මහජන පීඩාවක් ඇති කරන පුද්ගලයන්ට එරෙහිව අවශ්ය නීතිමය පියවර ගැනීමට කටයුතු කරන බවද පොලිස් මාධ්ය කොට්ඨාසය වැඩිදුරටත් ප්රකාශ කර ඇත.
මෙම විමර්ශන ආරම්භ කිරීමට හේතු වූයේ ඉන්ධන බෙදුම්කරුවන්ගේ සංගමය විසින් මෙතෙක් ලැබුණු 3% ක කොමිස් මුදල අහෝසි කිරීමට එරෙහිව විරෝධය පළ කරමින් පෙබරවාරි 28 වන සිකුරාදා සිට ඉන්ධන ඇණවුම් කිරීමෙන් වැළකී සිටීමට ගත් තීරණයයි.
අදාළ විමර්ශන කටයුතු සම්බන්ධයෙන් වැඩිදුර තොරතුරු අනාගතයේදී දැනුම් දෙනු ඇතැයි බලාපොරොත්තු වේ.
Comments
Post a Comment
Your comment will be visible after approval