පිළියන්දල පොලිසිය විසින් නිකුත් කරන ලද නිවේදනයකට අනුව, මාර්ගයක් අවහිර වන පරිදි මෝටර් රථයක් නවතා තැබීම පිළිබඳව ඇති වූ ආරවුලකින් පසු පුද්ගලයකුට පහර දීමට තැත් කළ බවට චෝදනා ලබමින් ශ්රී ලංකා ජාතික ක්රිකට් කණ්ඩායමේ ක්රීඩක අෂේන් බණ්ඩාර අත්අඩංගුවට ගෙන තිබේ.
අෂේන් බණ්ඩාර ශ්රී ලංකා පොලිස් ක්රිකට් කණ්ඩායමේද ක්රීඩා කරන, පොලිස් ක්රීඩා අංශයට අනුයුක්ත උප පොලිස් පරීක්ෂකවරයෙකි. පිළියන්දල කොළමුන්න ප්රදේශයේ පදිංචි වයස අවුරුදු 26ක් වන අෂේන් තම අසල්වාසියකු සමඟ ඇති කරගත් ආරවුලක් හේතුවෙන් අත්අඩංගුවට ගත් බව පොලිසිය වැඩිදුරටත් පැවසීය.
සිද්ධිය පිළිබඳ විස්තර අනුව, මෙම ගැටලුව ආරම්භ වී ඇත්තේ සැකකරුගේ නිවස පිහිටි මාර්ගය අවහිර වන පරිදි මෝටර් රථයක් නවතා තැබීම සම්බන්ධයෙනි. මෙම කරුණ නිසා පසුගිය මාර්තු 7 වන දින දෙපාර්ශවය අතර බහින්බස් වීමක් සිදු වී ඇත. එම බහින්බස් වීමෙන් පසු, අෂේන් බණ්ඩාර පැමිණිලිකරුගේ නිවසට අයුතු ලෙස ඇතුළු වී පහර දීමට තැත් කළ බවට පැමිණිල්ලක් ලැබී තිබේ.
පොලිසිය විසින් සිද්ධිය පිළිබඳව පූර්ණ පරීක්ෂණයක් සිදු කර, සැකකාර ක්රිකට් ක්රීඩකයා මාර්තු 8 වන දින අත්අඩංගුවට ගෙන ඇත. ම
ෙම සිද්ධිය සම්බන්ධයෙන් අෂේන් බණ්ඩාර මාර්තු 9 වන දින කැස්බෑව අධිකරණයට ඉදිරිපත් කිරීමට නියමිතව තිබූ බවද පොලිසිය වැඩිදුරටත් දන්වා සිටියේය.
ගාල්ල දිස්ත්රික්කයෙන් බිහි වූ අෂේන් බණ්ඩාර තුන් ඉරියව් ක්රීඩකයෙකි. ඔහු එක්දින ජාත්යන්තර තරග 6කදී සහ විස්සයි20 ජාත්යන්තර තරග 6කදී ශ්රී ලංකා ජාතික කණ්ඩායම නියෝජනය කර ඇත. ඔහු දක්ෂ පිතිකරුවකු මෙන්ම දක්ෂ පන්දු රකින්නෙකු ලෙසද ප්රසිද්ධියක් දරයි.
මෙම සිද්ධිය සම්බන්ධයෙන් ශ්රී ලංකා ක්රිකට් ආයතනය හෝ පොලිස් දෙපාර්තමේන්තුව විසින් මේ වන තෙක් නිල ප්රකාශයක් නිකුත් කර නොමැති අතර, සිද්ධිය පිළිබඳ වැඩිදුර පරීක්ෂණ සිදු කෙරෙමින් පවතී.
Comments
Post a Comment
Your comment will be visible after approval