
අලුත්කඩේ මහේස්ත්රාත් අධිකරණයේදී පසුගියදා වෙඩි තබා ඝාතනය කළ ගණේමුල්ල සංජීවගේ ඝාතන සිද්ධිය පිටුපස සිටින ප්රධාන සැකකරුවන්ගෙන් එක් අයෙකු වන "අවිශ්ක" නමැත්තා, මෙම ඝාතනය සැලසුම් කිරීමේදී නීතිඥ උදුල් ප්රේමරත්න මහතාගේ නම සහ ඡායාරූපය අනවසරයෙන් භාවිත කර ඇති බව පොලිස් පරීක්ෂණවලින් හෙළි වී තිබේ.
පොලිස් අපරාධ කොට්ඨාසයේ උසස් නිලධාරියෙකු පවසන පරිදි, දැනට ඩුබායි රාජ්යයේ සැඟවී සිටින අවිශ්ක නමැති සැකකරු, ඝාතනය සිදු කළ සමිඳු නමැති වෙඩික්කරු සමඟ සම්බන්ධතා පැවැත්වීම සඳහා නීතිඥ උදුල් ප්රේමරත්නගේ නම සහ ඡායාරූපය යොදාගෙන සමාජ මාධ්ය ගිණුමක් නිර්මාණය කර තිබේ. මෙම උපක්රමය මඟින් ඔවුන් තම සැබෑ අනන්යතාවය සඟවා තබාගැනීමට උත්සාහ කර ඇත.
ඝාතනය සිදු කළ සමිඳු නමැත්තා පොලිස් අත්අඩංගුවට පත්වීමෙන් අනතුරුව, ඔහුගේ ජංගම දුරකතනය පරීක්ෂා කිරීමේදී නීතිඥ උදුල් ප්රේමරත්න මහතාගේ නමින් සමාජ මාධ්ය ගිණුමකින් ලැබී ඇති ඇමතුම් රැසක් සොයාගෙන තිබේ. මේ සම්බන්ධයෙන් සැක සහිත වූ පොලිසිය, වැඩිදුර විමර්ශන කිරීමේදී එම ගිණුම පවත්වාගෙන ගොස් ඇත්තේ නීතිඥවරයා නොව, ගණේමුල්ල ඝාතන සිද්ධියේ කුමන්ත්රණකරුවකු ලෙස හඳුනාගෙන ඇති අවිශ්ක නමැත්තා බව තහවුරු කරගෙන ඇත.
ගණේමුල්ල සංජීව නමැත්තා අධිකරණ කටයුත්තක් සඳහා ඉකුත් 19 වැනිදා පෙරවරුවේ කොළඹ අලුත්කඩේ අධිකරණ සංකීර්ණයේ 5 වැනි අධිකරණ ශාලාවට ගෙනවිත් සිටියදී, නීතිඥ වෙස්ගත් වෙඩික්කරුවකු විසින් විත්තිකූඩුව අසලටම පැමිණ වෙඩි තබා ඔහු ඝාතනය කරන ලදී. ඩුබායි රාජ්යයේ වෙසෙන කෙහෙල්බද්දර පද්ම, කමාන්ඩෝ සලින්ද සහ අවිශ්ක යන තිදෙනා
මෙම ඝාතනය මෙහෙයවා ඇති බවට පොලිසිය තොරතුරු හෙළි කරගෙන ඇත.
මේ වන විට ප්රධාන වෙඩික්කරු ඇතුළු සැකකරුවන් 8 දෙනකු අත්අඩංගුවට ගෙන ඇති අතර, ඝාතනය සඳහා භාවිත කළ පිස්තෝලය දණ්ඩ නීති සංග්රහය පොත තුළ සඟවා උසාවියට රැගෙන ආ සැකකාරිය මෙතෙක් අත්අඩංගුවට ගෙන නොමැති බව වාර්තා වෙයි. කොළඹ අපරාධ කොට්ඨාසයේ අධ්යක්ෂ ජ්යෙෂ්ඨ පොලිස් අධිකාරි ඉන්දික ලොකුහෙට්ටි මහතාගේ මෙහෙයවීමෙන් සහ අධීක්ෂණයෙන් කොළඹ අපරාධ කොට්ඨාසය මෙම සිද්ධිය සම්බන්ධයෙන් විමර්ශන පවත්වාගෙන යයි.
සිද්ධිය සම්බන්ධයෙන් නීතිඥ උදුල් ප්රේමරත්න මහතාගෙන් කළ විමසීමකදී ඔහු පවසා ඇත්තේ මෙවැනි සිදුවීමක් සම්බන්ධයෙන් තමන් දැනුවත් නොමැති බවයි. තමාගේ නම සහ ඡායාරූපය යොදා කිසිවකු සමාජ මාධ්ය ගිණුමක් පවත්වාගෙන යන්නේ නම් ඒ සම්බන්ධයෙන් සොයා බැලීමක් සිදුකරන බව ද ඔහු පවසා ඇත.
පොලිස් ප්රකාශිතයන්ට අනුව, මෙම ඝාතන සිද්ධියේ කුමන්ත්රණකරුවන් තම අනන්යතාව ආරක්ෂා කර ගැනීම සඳහා මෙවැනි උපක්රම භාවිත කර ඇති බවට සැක කෙරේ. ඝාතන සිද්ධිය සම්බන්ධයෙන් වැඩිදුර විමර්ශන දිගටම කරගෙන යනු ලැබේ.
Comments
Post a Comment
Your comment will be visible after approval