කුරුණෑගල, තෝරයාය ප්‍රදේශයේ අද (පෙබරවාරි 10) අලුයම 4.45ට පමණ සිදුවූ බිහිසුණු බස් රථ අනතුරකින් පුද්ගලයින් සිව් දෙනෙකු මරණයට පත්ව තවත් විස්සකට අධික පිරිසක් තුවාල ලබා ඇත. මියගිය පුද්ගලයින් අතර පිරිමි පුද්ගලයින් තිදෙනෙකු සහ කාන්තාවක් සිටින බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි කේ.බී. මනතුංග මහතා සඳහන් කළේය.
දඹුල්ල - කුරුණෑගල ප්‍රධාන මාර්ගයේ තෝරයාය ප්‍රදේශයේදී සිදුවූ මෙම අනතුර වූයේ මගීන් නංවා ගැනීම සඳහා නවතා තිබූ බස් රථයකට පසුපසින් පැමිණි තවත් බස් රථයක් ගැටීමෙනි. කඳුරුවෙල සිට කොළඹ දක්වා ධාවනය වූ මගී ප්‍රවාහන පුද්ගලික බස් රථයක් මගීන් නංවා ගැනීම සඳහා නවතා තිබියදී, මාදුරුඔය සිට කොළඹ බලා ධාවනය වූ තවත් පුද්ගලික බස් රථයක් නවතා තිබූ බස් රථයේ පිටුපස ගැටී ඇති බව පොලීසිය විසින් තහවුරු කර ඇත.
කුරුණෑගල රෝහලේ ප්‍රකාශකයෙකු අනාවරණය කළ පරිදි, අනතුරින් තුවාල ලැබූ 28 දෙනෙකු කුරුණෑගල ශික්ෂණ රෝහලේ හදිසි අනතුරු අංශයට ඇතුළත් කර ඇති අතර, ඔවුන් අතරින් සිව් දෙනෙකුගේ තත්ත්වය බරපතල බව වාර්තා වේ.
මියගිය පුද්ගලයින්ගේ අනන්‍යතාවය මේ වන තෙක් තහවුරු කර නොමැති අතර, ඔවුන්ගේ මෘත දේහ කුරුණෑගල රෝහලේ මෘත ශරීරාගාරයේ තැන්පත් කර ඇති බව රෝහල් ප්‍රකාශක වැඩිදුරටත් පැවසීය.
දැනට සිදුකර ඇති මූලික විමර්ශන වලින් හෙළි වී ඇති පරිදි, පසුපසින් පැමිණි බස් රථයේ අධික වේගය මෙම අනතුරට ප්‍රධාන හේතුව වී ඇති බව පොලීසිය සඳහන් කරයි. මෙම සිද්ධිය සම්බන්ධයෙන් දොරටියාව පොලීසිය විසින් වැඩිදුර විමර්ශන සිදුකරමින් පවතී.
Comments
Post a Comment
Your comment will be visible after approval