බාරගන්න කවුරුත් නෑ: කරාපිටියෙන් සුවය ලැබූ වැඩිහිටියෝ මහලු නිවාසවලට

කරාපිටිය ශික්ෂණ රෝහලේ ප්‍රතිකාර ලබා සුවය ලැබූ වැඩිහිටි රෝගීන් භාර ගැනීමට ඥාතීන් ඉදිරිපත් නොවන බවත්, මෙම තත්ත්වය දැඩි ගැටලුවක් බවට පත්ව ඇති බවත් රෝහල් පරිපාලනය පවසයි.

පසුගියදා පැවති ගාල්ල දිස්ත්‍රික් සම්බන්ධීකරණ කමිටු රැස්වීමේදී මෙම කරුණ සම්බන්ධයෙන් විශේෂ අවධානය යොමු විය. වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතාගේ ප්‍රධානත්වයෙන් ගාල්ල දිස්ත්‍රික් ලේකම් කාර්යාලයේදී පැවති මෙම රැස්වීමේදී කරාපිටිය රෝහලේ නියෝජ්‍ය අධ්‍යක්ෂ වෛද්‍ය දිනුක චන්ද්‍රසේන මහතා මෙම ගැටලුව පිළිබඳව විස්තරාත්මක කරුණු දැක්වීමක් සිදු කළේය.

"මෙය ඉතා බරපතල ගැටලුවක් බවට පත්ව තිබෙනවා. අපි මේ වැඩිහිටි රෝගීන් වැඩිහිටි නිවාසවලට යොමු කිරීමට උත්සාහ කළත්, බොහෝ අවස්ථාවල ඔවුන්ව භාර ගැනීම ප්‍රතික්ෂේප කරනවා," යනුවෙන් වෛද්‍ය චන්ද්‍රසේන මහතා පැවසීය.

විශේෂයෙන්ම 1990 සුවසැරිය ගිලන් රථ සේවාව මගින් හා පොදු ස්ථානවලින් රැගෙන එන රෝගීන් සම්බන්ධයෙන් මෙම ගැටලුව වඩාත් උග්‍ර වී ඇති බව රෝහල් පරිපාලනය පෙන්වා දෙයි. මෙම රෝගීන් රෝහලට ඇතුළත් කරන අවස්ථාවේදී කිසිදු හඳුනාගැනීමේ ලේඛනයක් හෝ වගකිවයුතු පුද්ගලයෙකු ඉදිරිපත් නොවන බවත්, රෝගීන් සුවය ලැබීමෙන් පසුව ඔවුන් භාර ගැනීමට කිසිවෙක් ඉදිරිපත් නොවන බවත් නියෝජ්‍ය අධ්‍යක්ෂවරයා වැඩිදුරටත් පැවසීය.

දකුණු පළාත් පරිවාස කොමසාරිස් රසිකා දිසානායක මහත්මිය මෙම ගැටලුව සම්බන්ධයෙන් අදහස් දක්වමින්, දකුණු පළාතේ වැඩිහිටි නිවාස 49ක් පවතින බවත්, මෙම නිවාස බොහොමයක් මෙවැනි රෝගීන් භාර ගැනීමට මැලිකමක් දක්වන බවත් පැවසුවාය. ඊට ප්‍රධාන හේතුව වශයෙන් ඇය පෙන්වා දුන්නේ රෝගීන් මියගිය අවස්ථාවල මරණ පරීක්ෂණවලට සහභාගී වීමට වැඩිහිටි නිවාස පාලකයින් දක්වන අකමැත්තයි.

කෙසේ වෙතත්, මෙවැනි රෝගීන් රිදියගම නිවර්තන නිවාසයට ඇතුළත් කිරීමේ හැකියාව පවතින බව පරිවාස කොමසාරිස්වරිය පැවසුවාය. එහිදී පොලීසිය මගින් අධිකරණ නියෝගයක් ලබා ගත යුතු බවත්, දැනට එම නිවාසයේ රැඳවියන් 600ක් පමණ සිටින බවත් ඇය සඳහන් කළාය.

මෙම ගැටලුවට විසඳුමක් ලෙස වැඩිහිටි නිවාස පාලකයින් සමඟ සාකච්ඡා කර තීරණයක් ගැනීම සඳහා වැඩිහිටි මහ ලේකම් කාර්යාලයට යෝජනාවක් ඉදිරිපත් කර ඇති බවද පරිවාස කොමසාරිස්වරිය පැවසුවාය.

මෙම ගැටලුව වසර ගණනාවක් තිස්සේ පවතින බවත්, එය විසඳීම සඳහා නිරන්තර සාකච්ඡා පැවැත්වුණද තවමත් ප්‍රමාණවත් විසඳුමක් නොමැති බවත් රෝහල් පරිපාලනය අවධාරණය කරයි. මෙම තත්ත්වය රෝහල් සේවාවන්ට සැලකිය යුතු බලපෑමක් ඇති කරන අතර, සමාජයීය වශයෙන්ද බරපතල ගැටලුවක් බවට පත්ව ඇති බව පැහැදිලි වේ.