කොළඹ ප්රධාන පෙළේ පාසල් කිහිපයක සේවයේ නියුතු ගුරුවරුන් පිරිසකට වසර පහක දේශීය නිවාඩු ලබාදීම සම්බන්ධයෙන් අධ්යාපන ක්ෂේත්රයේ බලවත් විරෝධයක් මතුවී ඇති බව ලංකා ගුරු සංගමයේ ප්රධාන ලේකම් ජෝසප් ස්ටාලින් මහතා ප්රකාශ කර සිටී.
රටේ දැනට පවතින ගුරු හිඟය සැලකිල්ලට ගත් කල, සියලුම පළාත් සභා ගුරුවරුන්ගේ වසර පහක දේශීය හා විදේශීය නිවාඩු අවලංගු කර තිබෙන අවස්ථාවක, මෙම විශේෂිත ගුරු පිරිසට පමණක් එවැනි වරප්රසාදයක් ලබාදීම සමානාත්මතාවයේ ප්රශ්නයක් බවට පත්වී ඇත.
ස්ටාලින් මහතාගේ ප්රකාශය අනුව, මෙම විශේෂ වරප්රසාද ලද ගුරුවරුන් කොළඹ ජනප්රිය පාසල් ලැයිස්තුවේ ඉහළින්ම පිහිටා ඇති පාසල්වල වසර 12, 13 වැනි දීර්ඝ කාලයක් තිස්සේ සේවයේ නියුතුව සිටින අය වෙති. සාමාන්යයෙන් ගුරුවරුන්ට වරින් වර ස්ථාන මාරු ලැබෙන අතර, එක් පාසලක දීර්ඝ කාලීනව රැඳී සිටීම ගුරු මාරු ප්රතිපත්තිවලට පටහැනි ක්රියාවක් බව ඔහු පෙන්වා දී ඇත.
"මෙම ගුරුවරුන් පිරිසට පසුගිය මාස කිහිපය තුළ ගුරු මාරු මණ්ඩල මගින් ස්ථාන මාරුවීම් ලබාදී තිබියදී, අධ්යාපන අමාත්යාංශය ඔවුන්ට දීර්ඝ නිවාඩු අනුමත කර තිබීම බරපතළ ගැටලුවක්," යැයි
ස්ටාලින් මහතා ප්රකාශ කර සිටී.
විශේෂයෙන්ම මෙම ගුරුවරුන් පිරිස ස්ථාන මාරුවීම් ලැබූ නව පාසල්වල රාජකාරියට වාර්තා නොකර, නිවාඩු ලබාගෙන වෙනත් රැකියාවල නියැළෙන බවට ද ලංකා ගුරු සංගමයේ ප්රධාන ලේකම්වරයා චෝදනා කරයි.
"මෙය ඉතා අසාධාරණ තත්ත්වයක්. ඔවුන්ගේ නිවාඩු කාල සීමාව අවසන් වන තෙක්, එනම් වසර පහක් ගතවන තෙක්, නැවත පාසලකට ඔවුන්ගේ සේවය ලබාගත නොහැකි වනවා. මේ අතර, රජයෙන් වැටුප් ලබමින් ඔවුන්ට වෙනත් රැකියා කිරීමේ අවස්ථාව ලැබෙනවා," යනුවෙන් ඔහු පැවසීය.
ස්ටාලින් මහතා පැහැදිලි කරන අන්දමට, පසුගිය රජය ගෙන ආ ප්රතිපත්ති යෝජනාවක් අනුව රාජ්ය සේවකයකුට දේශීයව හෝ විදේශීයව අවුරුදු පහක නිවාඩුවක් ලබා ගැනීමේ අවස්ථාව සලසා දී ඇත.
කෙසේ වෙතත්, අධ්යාපන අමාත්යාංශයේ ලේකම්වරයා ගුරුවරුන්ගේ නිවාඩු අනුමත කරන බලයලත් නිලධාරියා වන අතර,
ස්ථාන මාරුවීම් ලබා දුන් එම නිලධාරියාම, ගුරුවරුන්ගේ වසර පහේ දේශීය නිවාඩු අනුමත කිරීම පරස්පර විරෝධී ක්රියාවක් බව ඔහු පෙන්වා දෙයි.
ඒ අනුව, මෙම විශේෂ වරප්රසාද ලැබීම සම්බන්ධයෙන් ගුරුවරුන්ගෙන් එල්ල වී ඇති විරෝධය ගැන ලංකා ගුරු සංගමය දැනටමත් අධ්යාපන අමාත්යාංශයේ ලේකම්වරයාට දැනුම් දී ඇති බව ස්ටාලින් මහතා සඳහන් කළේය.
පාසල් පද්ධතිය තුළ සාධාරණත්වය සහ සමානාත්මතාවය රැකගැනීම සඳහා මෙවැනි විශේෂ වරප්රසාද ලබාදීම නැවත සලකා බැලිය යුතු බව ගුරු සංගමය අවධාරණය කරයි.
ශ්රී ලංකාවේ පාසල් පද්ධතිය දිගින් දිගටම ගුරු හිඟයෙන් පීඩා විඳින අතර, විශේෂයෙන් දුෂ්කර ප්රදේශවල පාසල්වල මෙම ගැටලුව වඩාත් උග්ර වී ඇත. එවැනි පසුබිමක, මෙම ජනප්රිය පාසල්වල ගුරුවරුන්ට මෙවැනි දීර්ඝ නිවාඩු ලබාදීම මගින් සමස්ත අධ්යාපන පද්ධතියට එල්ල වන බලපෑම පිළිබඳව අවධානය යොමු විය යුතු බව අධ්යාපන ක්ෂේත්රයේ පාර්ශවකරුවන් පෙන්වා දෙයි.
අධ්යාපන අමාත්යාංශය මෙම කරුණ සම්බන්ධයෙන් නිල ප්රකාශයක් කර නොමැති අතර, ඉදිරි දිනවලදී මෙම ගැටලුව සම්බන්ධයෙන් අමාත්යාංශය ගන්නා පියවර කෙරෙහි ගුරුවරුන්ගේ අවධානය යොමුවී ඇත.
Comments
Post a Comment
Your comment will be visible after approval