වැලන්ටයින් දින සැමරුම සඳහා යාපනයට ගොස් කාමරයක නැවතී සිටීමට සිය පෙම්වතිය දැක්වූ අකමැත්ත හේතුවෙන් බරපතල අසහනයට පත්වූ කිළිනොච්චිය ප්රදේශයේ තරුණයෙකු ළිඳකට පැන දිවි නසා ගැනීමේ කනගාටුදායක සිද්ධියක් පෙරේදා (12) වාර්තා විය.
කිළිනොච්චිය, ධර්මපුරම්, අම්බලපොක්කනෙයි ප්රදේශයේ පදිංචිව සිටි වයස අවුරුදු 29ක් වූ වර්ණකුලරාසා ප්රදීපන් නමැති මෙම තරුණයා, සිය පෙම්වතිය සමඟ වැලන්ටයින් දිනය සැමරීම සඳහා යාපනය නගරයේ සවාරියක යෑමටත් එහි නවාතැන්ගෙන විවිධ විනෝද අවස්ථා සඳහා එක්වීමටත් සැලසුම් කර තිබූ නමුත්, ඊට පෙම්වතිය දැක්වූ අකමැත්ත හේතුවෙන් ඔහු දැඩි මානසික පීඩනයකට ලක්ව සිට ඇති බව පොලිස් පරීක්ෂණවලින් හෙළි වී තිබේ.
පොලිස් වාර්තා අනුව, සිද්ධියට පෙර දින කිහිපය පුරාම තරුණයා සිය පෙම්වතියට වැලන්ටයින් දින සැමරුම සඳහා යාපනයට යාමට ආරාධනා කර ඇති අතර, ඒ සඳහා කිහිප වතාවක්ම ඇය සමඟ සාකච්ඡා කර තිබේ. කෙසේ වෙතත්, තරුණයාගේ නිරන්තර බල කිරීම් හේතුවෙන් තරුණිය ඔහු සමඟ අමනාප වී ඇති බවත්, මෙම තත්ත්වය තරුණයාගේ මානසික පීඩනය තවදුරටත් උග්ර කිරීමට හේතු වී ඇති බවත් ප්රදේශවාසීන් පවසති.
අවාසනාවන්ත සිද්ධිය සිදුවූ දිනයේදී, තරුණයා සිය පෙම්වතිය අමතා දුරකථන ඇමතුම් කිහිපයක්ම ලබා දී තිබුණද, ඇය ඉන් කිසිදු ඇමතුමකට ප්රතිචාර දක්වා නොමැති අතර, අවසානයේදී දුරකථනය සම්පූර්ණයෙන්ම විසන්ධි කර තිබේ. මෙම තත්ත්වයෙන් තවදුරටත් මානසික පීඩාවට පත්වූ තරුණයා, ප්රදේශයේ පිහිටි පොදු ළිඳකට පැන දිවි නසා ගැනීමට තීරණය කර ඇති බව ප්රාථමික පොලිස් පරීක්ෂණවලින් අනාවරණය වී තිබේ.
සිද්ධිය සම්බන්ධයෙන් ක්රියා කරමින් ධර්මපුරම් පොලීසිය විසින් මියගිය තරුණයාගේ මෘත දේහය ළිඳෙන් ගොඩගැනීමට කටයුතු කර ඇති අතර, පශ්චාත් මරණ පරීක්ෂණ කටයුතු සඳහා කිළිනොච්චිය රෝහල වෙත යොමු කර තිබේ. මරණය සම්බන්ධයෙන් වැඩිදුර විමර්ශන කටයුතු ධර්මපුරම් පොලීසිය විසින් සිදු කරමින් පවතී.
මෙම සිද්ධිය සම්බන්ධයෙන් අදහස් දක්වන මනෝ විද්යාඥයින් පෙන්වා දෙන්නේ පෙම් සබඳතා සම්බන්ධ ගැටලු නිසා සිදුවන මෙවැනි ආත්මඝාතන වැළැක්වීම සඳහා සමාජයේ සියලු පාර්ශ්වයන්ගේ අවධානය යොමු විය යුතු බවයි. විශේෂයෙන්ම තරුණ ප්රජාව තුළ ඇතිවන මානසික පීඩනයන් හඳුනාගැනීම සහ ඒවාට සුදුසු විසඳුම් ලබාදීම සඳහා පවුල, මිතුරන් සහ සමාජය විසින් වගකීමෙන් කටයුතු කළ යුතු බව ඔවුහු අවධාරණය කරති.
Comments
Post a Comment
Your comment will be visible after approval