ඩුබායි රාජ්යයේ සැඟවී සිටින බව කියන පලනි රෙනෝෂන් නැමැත්තාගේ මෙහෙයවීම යටතේ කොටහේන ප්රදේශයේ ජංගම දුරකතන අලෙවිසැලක පුද්ගලයෙකු වෙඩි තබා ඝාතනය කිරීමේ සිද්ධියට සම්බන්ධ තවත් සැකකරුවෙකු මෝදර කොට්ඨාස අපරාධ විමර්ශන ඒකකයේ නිලධාරීන් කණ්ඩායමක් විසින් පසුගිය 23 වැනිදා අත්අඩංගුවට ගෙන ඇත.
මෙම සැකකරු මෝදර මෙත්සඳ සෙවණ ප්රදේශයේදී අත්අඩංගුවට ගෙන ඇති අතර, ඔහු මෝදර ප්රදේශයේ පදිංචි 28 හැවිරිදි තරුණයෙක් බව පොලිසිය සඳහන් කරයි. දැනට ඩුබායි රාජ්යයේ සැඟවී සිටින සංවිධානාත්මක අපරාධකරුවකු වන 'ඩුබායි නිපුණ' නමැත්තාගේ මෙහෙයවීමෙන් තවත් සංවිධානාත්මක අපරාධකරුවකු වන පලනි රෙනෝෂන් නමැත්තා මෙම ඝාතන කොන්ත්රාත්තුව ලබා දී ඇති බව පොලිස් විමර්ශනවලදී අනාවරණය වී ඇත.
පොලිස් විමර්ශනවලට අනුව, අත්අඩංගුවට ගත් සැකකරු පලනි රෙනෝෂන් සමඟ සමීප සම්බන්ධතා පවත්වා ඇති බව තහවුරු වී තිබේ. කොටහේන ප්රදේශයේ ඝාතනය සිදු කිරීමට වෙඩික්කරු කොළඹ කොටුව ප්රදේශයේ සිට මෙම සැකකරුගේ ත්රීරෝද රථයෙන් කොස්ගස්හන්දිය ප්රදේශයේ සිය බිරිඳගේ නිවසට කැඳවාගෙන ගොස් එහිදී අපරාධය සඳහා ගිනි අවිය හා පතුරොම් ලබා දී ඇති බවට පොලිසිය කළ විමර්ශනවලදී හෙළි වී ඇත.
විශේෂයෙන් සඳහන් කළ යුතු කරුණක් නම්, මෙම සැකකරු පසුගිය ජනවාරි 10 වැනිදා කොටහේන පොලිස් වසමේදී පුද්ගලයකු වෙඩි තබා ඝාතනය කිරීමේ අපරාධය සඳහා ද ගිනි අවිය ලබා දුන් පුද්ගලයා බවට පොලිස් විමර්ශනවලදී හඳුනාගෙන ඇති බව පොලිසිය පවසයි.
මීට පෙර, කොටහේන ප්රදේශයේ ජංගම දුරකතන අලෙවිසැලක් තුළදී ශිවලිංගම් ශෂි කුමාර් නැමැත්තාට පසුගිය ජනවාරි 21 වැනිදා වෙඩි තබා ඝාතනය කර යතුරුපැදියකින් පලායමින් සිටියදී, වෙරළබඩ පොලිසියේ රථ වාහන අංශයේ රාත්රී යතුරුපැදි සංචාර රාජකාරියේ යෙදී සිටි ආධුනික කොස්තාපල්වරුන් දෙදෙනකු විසින් සැකකරුවන් ලුහුබැඳ ගොස් ඔරුගොඩවත්ත ප්රදේශයේදී අත්අඩංගුවට ගෙන තිබිණි.
එහිදී අත්අඩංගුවට ගත් සැකකරුවන් දෙදෙනා සම්බන්ධයෙන් සිදු කළ විමර්ශනවලදී, සැකකරුවන් මෝදර කාක දූපත ප්රදේශයේ සඟවා තිබූ ආයුධ තොගයක් සොයාගැනීම සඳහා එම ස්ථානයට රැගෙන ගිය අවස්ථාවේදී සැකකරුවන් පොලිස් ගිනි අවි උදුරා පොලිසියට වෙඩි තැබීමට යාමේදී පොලිසිය සිදු කළ ප්රති ප්රහාරවලින් සැකකරුවෝ දෙදෙනා බරපතළ තුවාල ලබා කොළඹ ජාතික රෝහලට ඇතුළත් කිරීමෙන් අනතුරුව මියගිය බව වාර්තා විය.
කොළඹ උතුර සහකාර පොලිස් අධිකාරී නාලක සේනානායක මහතාගේ උපදෙස් පරිදි මෝදර කොට්ඨාස අපරාධ විමර්ශන ඒකකය සහ කොටහේන පොලිසිය මෙම සිද්ධිය සම්බන්ධයෙන් වැඩිදුර විමර්ශන සිදු කරමින් සිටිති.
සංවිධානාත්මක අපරාධ ජාලයක් මෙරට තුළ ක්රියාත්මක වන බවට මෙම සිද්ධිය තුළින් හෙළි වී ඇති අතර, විදේශ රටවල සිට මෙරට අපරාධ මෙහෙයවීම ජාතික ආරක්ෂාවට සැලකිය යුතු තර්ජනයක් බව පොලිස් නිලධාරීන් පෙන්වා දෙයි. මෙම ඝාතන සමඟ සම්බන්ධ තවත් සැකකරුවන් සෙවීම සඳහා පොලිසිය දැඩි විමර්ශන දිගටම සිදු කරමින් සිටී.
Comments
Post a Comment
Your comment will be visible after approval