ජනාධිපති අනුර කුමාර දිසානායක මහතා අද (20) පාර්ලිමේන්තුවේදී ප්රකාශ කළේ රටේ පාතාල ක්රියාකාරකම් සම්පූර්ණයෙන්ම තුරන් කිරීම සඳහා සුවිශේෂී පියවර ගනු ලබන බවයි. දසවන පාර්ලිමේන්තුවේ ආරක්ෂක කටයුතු පිළිබඳ අමාත්යාංශීය උපදේශක කාරක සභාවේ ප්රථම රැස්වීමේදී මෙම ප්රකාශය සිදු කෙරිණි.
විමර්ශන වාර්තා අනුව පාතාල ජාලය රාජ්ය ආයතන දක්වා විහිදී ඇති බව හෙළි වී ඇති අතර, මෙම තත්ත්වය නිරාකරණය කිරීමට කාලයක් ගත වන බව ජනාධිපතිවරයා පිළිගත්තේය. කෙසේ වෙතත්, මෙම උවදුර සම්පූර්ණයෙන්ම මැඬපැවැත්වීමට රජය කැපවී සිටින බව ඔහු අවධාරණය කළේය.
අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා සඳහන් කළේ අධිකරණ සංකීර්ණවල ආරක්ෂාව වැඩිදියුණු කිරීම සඳහා විශේෂ යෝජනා මාලාවක් සකස් කර ඇති බවයි. මෙම සැලැස්ම යටතේ නවීන තාක්ෂණය යොදා ගනිමින් නීතිඥවරුන් ඇතුළු සියලු පාර්ශ්වකරුවන්ගේ ආරක්ෂාව තහවුරු කිරීමට පියවර ගනු ලැබේ.
උතුරු නැගෙනහිර ප්රදේශවල පිහිටි හමුදා කඳවුරු ඉඩම් සම්බන්ධයෙන් ද සාකච්ඡා කෙරුණු අතර, ආරක්ෂක අමාත්යාංශ ලේකම්වරයා පැවසුවේ දිවයින පුරා පිහිටි ත්රිවිධ හමුදා භූමි ප්රදේශ පිළිබඳ සමස්ත ඇගයීමක් සිදු කර, ඉඩම් නිදහස් කිරීම පිළිබඳ තීරණ ගනු ලබන බවයි.
හමුදාව විසින් පාලනය කරනු ලබන සංචාරක හෝටල් සහ වෙනත් ව්යාපාරික ආයතන සංචාරක කර්මාන්තයේ වර්ධනය සඳහා යොදා ගැනීමේ හැකියාව පිළිබඳව ද සාකච්ඡා කෙරිණි. මෙම ව්යාපාර ආර්ථික ප්රතිලාභ උදෙසා වඩාත් ඵලදායී ලෙස යොදා ගැනීම සඳහා විධිමත් අධ්යයනයක් සිදු කරන බව ජනාධිපතිවරයා පැවසීය.
උතුරු පළාතේ ඇතැම් ආගමික ස්ථාන හේතුවෙන් ජාතික හා ආගමික ගැටුම් ඇතිවීමේ අවදානම පිළිබඳව මන්ත්රීවරු අවධානය යොමු කළහ. මෙහිදී ජනාධිපතිවරයා අවධාරණය කළේ දේශපාලනයෙන් ආගම්වාදය සහ ජාතිවාදය සම්පූර්ණයෙන්ම ඉවත් කළ යුතු බවයි. ප්රදේශවාසීන්ගේ අවංක අවශ්යතා මත පදනම්ව මෙම ගැටලු විසඳිය හැකි බවත්, පටු දේශපාලන වාසි සඳහා ජාතිවාදය හා ආගම්වාදය අවුස්සන කිසිදු පාර්ශ්වයකට ඉඩ නොතබන බවත් ඔහු තවදුරටත් පැවසීය.
ජාතික ආපදා කමිටුව පිහිටුවීමේ අවශ්යතාවය ද සාකච්ඡාවට බඳුන් වූ අතර, එම කටයුතු කඩිනමින් සිදු කරන ලෙස ජනාධිපතිවරයා නිලධාරීන්ට උපදෙස් දුන්නේය.
රැස්වීමට නියෝජ්ය කථානායක වෛද්ය රිස්වි සාලි, ආරක්ෂක නියෝජ්ය අමාත්ය මේජර් ජෙනරල් අරුණ ජයසේකර (විශ්රාමික), අමාත්යවරුන්, නියෝජ්ය අමාත්යවරුන්, පාර්ලිමේන්තු මන්ත්රීවරුන්, ආරක්ෂක අමාත්යාංශ ලේකම් එයාර් වයිස් මාර්ෂල් සම්පත් තුයිය කොන්තා (විශ්රාමික), ත්රිවිධ හමුදාපතිවරුන්, ආරක්ෂක අමාත්යාංශයේ හා අනුබද්ධ ආයතනවල නිලධාරීන්, පාර්ලිමේන්තුවේ කාර්ය මණ්ඩල ප්රධානී සහ නියෝජ්ය මහලේකම් වමින්ද කුලරත්න මහතා ඇතුළු පිරිසක් සහභාගී වූහ.
Comments
Post a Comment
Your comment will be visible after approval