වාරිමාර්ග දෙපාර්තමේන්තුව විසින් අද දින නිකුත් කරන ලද විශේෂ නිවේදනයකට අනුව, දැඩි වර්ෂාපතනය හේතුවෙන් නැගෙනහිර පළාතේ අම්පාර සහ මඩකලපුව දිස්ත්‍රික්කවල ප්‍රදේශ කිහිපයක සුළු ගංවතුර තත්ත්වයක් ඇතිවිය හැකි බව අනතුරු අඟවා තිබේ.
මෙම නිවේදනයට අනුව, අම්පාර දිස්ත්‍රික්කයේ මහ ඔය ප්‍රාදේශීය ලේකම් කොට්ඨාසයේත්, මඩකලපුව දිස්ත්‍රික්කයේ එරාවුර්පත්තු සහ කොරලෙයිපත්තු ප්‍රාදේශීය ලේකම් කොට්ඨාසවල මුන්දෙනි ද්‍රෝණිය ආශ්‍රිත පහත් බිම් ප්‍රදේශවලත් ඉදිරි පැය 24 තුළ සුළු ගංවතුර තත්ත්වයක් ඇතිවීමේ අවදානමක් පවතින බව දෙපාර්තමේන්තුව පෙන්වා දෙයි.
එමෙන්ම, අම්පාර දිස්ත්‍රික්කයේ මාදුරු ඔය, මල්වතු ඔය සහ යාන් ඔය ආශ්‍රිත ප්‍රදේශ සඳහාද මෙම අනතුරු ඇඟවීම් නිකුත් කර ඇත. මීට අමතරව, මහවැලි ගඟ ආශ්‍රිත මනම්පිටිය ප්‍රදේශයටද ගංවතුර තර්ජනයක් එල්ල වී ඇති බව වාරිමාර්ග දෙපාර්තමේන්තුව සිය නිවේදනයේ සඳහන් කරයි.
මෙම තත්ත්වය හමුවේ අදාළ ප්‍රදේශවල ජනතාව විශේෂ අවධානයෙන් පසුවන ලෙසත්,
හදිසි අවස්ථාවකදී ආරක්ෂිත ස්ථානවලට යාමට සූදානමින් සිටින ලෙසත් බලධාරීන් උපදෙස් ලබා දී තිබේ. වැසි තත්ත්වය තවදුරටත් පැවතුනහොත් තත්ත්වය තවත් උග්‍ර විය හැකි බැවින් ප්‍රදේශවාසීන් නිරන්තර අවධානයෙන් පසුවීම වැදගත් බව දෙපාර්තමේන්තු නිලධාරීහු පෙන්වා දෙති.
0 Comments